ព័ត៌មានជាតិ

អភិបាលខេត្តបាត់ដំបង ណែនាំឲ្យមានលេណដ្ឋានតាមសាលារៀន និងមន្ទីរពេទ្យ តាមព្រំដែនកម្ពុជា-ថៃ

បានផុស

៣ ខែ មុន

នៅ

ថ្ងៃព្រហស្បតិ៍ ២៩ មករា ២០២៦

ដោយ

អ៊ិន ពិសី

លោក សុខ លូ អភិបាល នៃគណៈអភិបាលខេត្តបាត់ដំបង ណែនាំឲ្យមានលេណដ្ឋានតាមសាលារៀន និងមន្ទីរពេទ្យ ដែលនៅតាមព្រំដែនកម្ពុជា-ថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការណែនាំនេះ ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តបាត់ដំបង អាណត្តិទី ៤ ដែលប្រារព្ធធ្វើឡើងនៅស្រុកកំរៀង ក្រោមអធិបតីភាព លោក យី សុងគីម ប្រធានមន្ទីរអប់រំ យុវជន និងកីឡាខេត្តបាត់ដំបង ដោយមានការអញ្ជើញចូលរួមពីសំណាក់ លោកគ្រូ អ្នកគ្រូ មន្ត្រីរាជការជុំវិញស្រុក កងកម្លាំងប្រដាប់អាវុធ និងសិស្សានុសិស្សយ៉ាងច្រើនកុះករ កាលពីថ្មីៗ នេះ។

នៅអង្គពិធីនោះ លោកស្រី សោ សុខារី នាយិកាសាលាបឋមសិក្សាលំផាត់ បានសំណូមពរដល់អង្គពិធី ដែលធ្វើយ៉ាងណាសុំឲ្យមានលេណដ្ឋានគ្រប់តាមបណ្ដាសាលារៀន និងមន្ទីរពេទ្យ ស្ថិតនៅជាប់តាមបណ្ដោយព្រំដែនថៃ ដោយយោងទៅលើសភាពការណ៍ប្រទេសកំពុងមានសង្គ្រាម ដូច្នេះលេណដ្ឋានជាការចាំបាច់បំផុតសម្រាប់លោកគ្រូ អ្នកគ្រូ សិស្សានុសិស្ស និងគ្រូពេទ្យ ជាដើម។

ជាការឆ្លើយតប លោក យី សុងគីម លើកឡើងថា ដោយយោងទៅលើការណែនាំរបស់លោក សុខ លូ អភិបាលខេត្តបាត់ដំបង ដែលលោកទទួលបានបទបញ្ជាពីលោកអភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ គឺធ្វើយ៉ាងណាត្រូវបង្កើតឲ្យមានលេណដ្ឋាននៅតាមបណ្ដាសាលារៀន និងមន្ទីរពេទ្យ ស្ថិតតាមបណ្ដោយព្រំដែនកម្ពុជា-ថៃ។

លោកប្រធានមន្ទីរអប់រំ បានបន្ថែមថា នេះគឺជាការសាកល្បងចាំបាច់ត្រូវឲ្យមានលេណដ្ឋានតាមបណ្ដាសាលារៀន និងមន្ទីរពេទ្យ ក្នុងស្រុកចំនួន ៥ ដែលធ្លាប់រងគ្រោះដោយទាហានសៀមបាញ់ផ្លោង និងប្រើយន្តហោះទំនាក់គ្រាប់បែក ក្នុងនោះមានស្រុកសំពៅលូន ស្រុកភ្នំព្រឹក ស្រុកកំរៀង ស្រុកសំឡូត និងស្រុកបាណន់។

លោកក៏បានបន្តថា ការសាកល្បងជំហានដំបូង ត្រូវធ្វើនៅក្នុងវិទ្យាល័យតេជោ ហ៊ុន សែន សំពៅលូន អនុវិទ្យាល័យ និងបឋមសិក្សាកូនភ្នំ ៣២ ក្នុងស្រុកសំពៅលូន វិទ្យាល័យ ពេជ្រ ចិន្ដា ក្នុងស្រុកភ្នំព្រឹក វិទ្យាល័យកំរៀង ក្នុងស្រុកកំរៀង វិទ្យាល័យសំឡូត ក្នុងស្រុកសំឡូត អនុវិទ្យាល័យសម្ដេចឪ សម្ដេចម៉ែ និងវិទ្យាល័យ ហ៊ុន សែន ភ្នំសំពៅ ស្ថិតក្នុងស្រុកបាណន់ រួមជាមួយនឹងមណ្ឌលសុខភាព និងមន្ទីរពេទ្យបង្អែក មួយចំនួនទៀត ស្ថិតក្នុងស្រុកទាំង ៥ នេះ។ ក្នុងន័យនេះ មិនមែនជាការបំភ័យដល់ប្រជាពលរដ្ឋនោះឡើយ គ្រាន់តែជាការណែនាំ និងហ្វឹកហាត់ដល់សិស្សានុសិស្សឲ្យយល់ដឹងនៅពេលមានសង្គ្រាម ឬការទម្លាក់គ្រាប់បែក គ្រាប់ផ្លោង ជាដើម។

លោកប្រធានមន្ទីរអប់រំ យុវជន និងកីឡាខេត្ត ក៏បានសង្កត់ធ្ងន់ថា កន្លងមក គ្រឹះស្ថានសិក្សាដែលត្រូវបានបិទផ្អាកមួយរយៈ គឺមានចំនួន ២៤៥ គ្រឹះស្ថាន ដោយសារសង្គ្រាមឈ្លានពានរបស់កងទ័ពសៀម។ ដូច្នេះតទៅមុខ ចាំបាច់ត្រូវមានលេណដ្ឋានឲ្យបានគ្រប់សាលារៀន និងមន្ទីរពេទ្យទាំងអស់ ដែលជាប់នឹងព្រំដែនថៃ ដោយមិនចំពោះតែវិទ្យាល័យ និងអនុវិទ្យាល័យ នោះទេ គឺ បឋមសិក្សា ក៏ត្រូវតែមានដែរ៕

អត្ថបទ ៖ សោ និយមរ័ត្ន