ព័ត៌មានអន្ដរជាតិ

បើលោកស្រី តាកាអ៊ិឈិ អាចបន្តកាន់តំណែងក្រោយបោះឆ្នោត នោះចិនគួរគិតឡើងវិញ

បានផុស

៣ ខែ មុន

នៅ

ថ្ងៃសុក្រ ៣០ មករា ២០២៦

ដោយ

អ្នកវិភាគនយោបាយជើងចាស់ និងមន្ត្រីរបស់ជប៉ុន បាននិយាយថា ប្រទេសចិនអាចពិចារណាសាជាថ្មី សម្រាប់យុទ្ធសាស្រ្តរបស់ខ្លួន ដែលបានដាក់សម្ពាធលើនាយករដ្ឋមន្រី្តជប៉ុន លោកស្រី សាណាអេ តាកាអ៊ិឈិ [Sanae Takaichi] ប្រសិនបើលោកស្រីទទួលបានសន្លឹកឆ្នោតច្រើននៅថ្ងៃទី៨ ខែកុម្ភៈ ខាងមុខ។

លោកស្រី តាកាអ៊ិឈិ អំឡុងពេលឃោសនារកសំឡេងឆ្នោត។ EPA

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរ៉យទ័រ ប៉ុន្មានសប្តាហ៍បន្ទាប់ពីការឡើងកាន់តំណែងកាលពីឆ្នាំមុន លោកស្រី តាកាអ៊ិឈិ ឈានដល់មានជម្លោះការទូតដ៏ធំបំផុតជាមួយទីក្រុងប៉េកាំង ដោយបង្ហាញជាសាធារណៈថា ទីក្រុងតូក្យូអាចឆ្លើយតបដោយកម្លាំងយោធានឹងការវាយប្រហាររបស់ចិនលើកោះតៃវ៉ាន់។

មិនតែប៉ុណ្ណោះ ទីក្រុងប៉េកាំង បានទាមទារឱ្យលោកស្រីដកពាក្យសម្តីដែលខ្លួនបានលើកឡើងនោះវិញ។ តែលោកស្រីហាក់មិនខ្វល់ បន្ទាប់មកបានដាក់ចេញនូវវិធានការសងសឹកជាបន្តបន្ទាប់ ដែលកំពុងតែចាប់ផ្តើមថ្លឹងថ្លែងពីជប៉ុនដែលមានសេដ្ឋកិច្ចធំជាងគេទីបួនរបស់ពិភពលោក។

លោក Kazuhisa Shimada អតីតអនុរដ្ឋមន្ត្រីក្រសួងការពារជាតិ បាននិយាយថា៖ «ការគិតរបស់ប្រទេសចិនគឺប្រហែលជាព្យាយាមទម្លាក់រដ្ឋាភិបាល លោកស្រី តាកាអ៊ិឈិ»។

លោកសង្កត់ធ្ងន់ទៀតថា៖«ការបោះឆ្នោតនេះមានសារៈសំខាន់ខ្លាំងណាស់ […] រដ្ឋាភិបាលទន់ខ្សោយនឹងមិនត្រូវបានគេយកចិត្តទុកដាក់ឡើយ»។

មេដឹកនាំស្ត្រីដំបូងគេរបស់ប្រទេសជប៉ុនសង្ឃឹមថា ខ្លួននឹងទាញប្រយោជន៍ក្នុងការរកសន្លឹកឆ្នោត និងទទួលបានការវាយតម្លៃខ្ពស់ពីការបោះឆ្នោតគាំទ្រផ្ទាល់ខ្លួនរបស់លោកស្រី។ ពិសេសស្ទើរតែមិនជាប់ពាក់ព័ន្ធជាមួយភាគីណា ដើម្បីជំរុញឱ្យមានសំឡេងច្រើននៃក្រុមចម្រុះរបស់ខ្លួននៅក្នុងសភាឡើយ។

ការស្ទង់មតិមួយបានបង្ហាញកាលពីថ្ងៃព្រហស្បតិ៍ថា លោកស្រីអាចនឹងទទួលបានសន្លឹកឆ្នោតច្រើន ទោះបីជាអ្នកវិភាគបានពណ៌នាថា សន្លឹកឆ្នោតរបស់ប្រទេសជប៉ុន មិនអាចទាយទុកមុនបានទេ ក្នុងរយៈពេលប៉ុន្មានឆ្នាំចុងក្រោយនេះ។

រ៉យទ័រក៏បានដកស្រង់សម្តីរបស់មន្ត្រីរដ្ឋាភិបាលជាន់ខ្ពស់ជប៉ុនម្នាក់ដែលមិនបានបញ្ចេញឈ្មោះ បាននិយាយថា ជ័យជម្នះដ៏ធំមួយនឹងជួយផ្ញើសារទៅកាន់ទីក្រុងប៉េកាំង ថា ការវាយប្រហាររបស់ចិនមិនបានធ្វើឱ្យខូចខាតដល់រដ្ឋាភិបាលរបស់លោកស្រី តាកាអ៊ិឈិ ឡើយ។

មន្ត្រីរូបនោះបានបន្ថែមទៀតថា ការទប់ស្កាត់សេដ្ឋកិច្ចរបស់ប្រទេសចិនលើដៃគូពាណិជ្ជកម្មកំពូលមួយរបស់ខ្លួនក៏អាចមានប្រតិកម្មផងដែរ។ ខណៈការប៉ុនប៉ងដេញ លោកស្រី តាកាអ៊ិឈិ ជាមនោគមវិជ្ជាដ៏គ្រោះថ្នាក់ ដែលអាចនាំឱ្យអតីតកាលយោធានិយមរបស់ជប៉ុនបរាជ័យក្នុងការទាក់ទាញអន្តរជាតិ៕

ប្រែសម្រួល៖ ណឺ មិនា