ត្រាំកំពុងចរចារជាមួយ​​​ទីក្រុងហាវ៉ាណា ក្រោយដាក់សម្ពាធធ្ងន់ បិទប្រេងគុយបាចោល

ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃអាទិត្យទី១ ខែកុម្ភៈ ថា ទីក្រុងវ៉ាស៊ីនតោនកំពុងចរចាជាមួយថ្នាក់ដឹកនាំទីក្រុងហាវ៉ាណា (Havana) ដើម្បីឈានដល់កិច្ចព្រមព្រៀងមួយ ប៉ុន្មានថ្ងៃបន្ទាប់ពីលោកគំរាមកំហែងដល់សេដ្ឋកិច្ចដែលកំពុងធ្លាក់ចុះក្នុងប្រទេសគុយបា ដោយដាក់សម្ពាធកាន់តែខ្លាំងអមដោយកាត់ផ្តាច់ការផ្គត់ផ្គង់ប្រេងសំខាន់ៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន ABC News លោកត្រាំបានប្រាប់អ្នកយកព័ត៌មាននៅឯលំនៅដ្ឋាន Mar-a-Lago របស់លោកក្នុងរដ្ឋ Florida ថា «គុយបាគឺជាប្រទេសដែលបរាជ័យបំផុត! វាមានរយៈពេលយូរមកហើយ ប៉ុន្តែឥឡូវនេះវាមិនមានប្រទេសវ៉េណេស៊ុយអេឡាដើម្បីគាំទ្រទៀតទេ។ ដូច្នេះយើងកំពុងនិយាយជាមួយប្រជាជនមកពីប្រទេសគុយបា ដែលជាប្រជាជនខ្ពស់បំផុតនៅក្នុងប្រទេស ដើម្បីមើលថាតើមានអ្វីកើតឡើង។ ខ្ញុំគិតថា យើងនឹងធ្វើកិច្ចព្រមព្រៀងជាមួយប្រទេសគុយបា»។

យ៉ាងណា មេដឹកនាំអាមេរិកមិនបានផ្តល់ការចង្អុលបង្ហាញថា កិច្ចព្រមព្រៀងបែបនេះអាចរួមបញ្ចូលអ្វីខ្លះនោះទេ។ ប៉ុន្តែគ្រាន់តែបញ្ចាក់ «អាមេរិកកំពុងចាប់ផ្តើមនិយាយជាមួយប្រទេសគុយបាហើយ»។

ភាពតានតឹងរវាងអាមេរិកនិងគុយបាបានកើតឡើងបន្ទាប់ពី រដ្ឋបាលទីពីររបស់លោកត្រាំ បង្កើនសម្ពាធលើប្រទេសកោះដែលគ្រប់គ្រងដោយកុម្មុយនិស្តនៅភាគខាងត្បូងរដ្ឋផ្លរីដា ចាប់តាំងពីការបណ្តេញមេដឹកនាំវ៉េណេស៊ុយអេឡា លោក Nicolas Maduro ចេញពីតំណែងកាលពីថ្ងៃទី៣ ខែមករា ដែលប្រទេសរបស់លោកជាសម្ព័ន្ធមិត្តជិតស្និទ្ធជាមួយទីក្រុងហាវ៉ាណា និងជាប្រភពដ៏សំខាន់សម្រាប់ការនាំចេញប្រេងទៅកាន់គុយបា។

កាលពីថ្ងៃព្រហស្បតិ៍ ប្រធានាធិបតីត្រាំបានចុះហត្ថលេខាលើបទបញ្ជាប្រតិបត្តិដែលគំរាមកំហែង ដោយដាក់ពន្ធបន្ថែមលើប្រទេសដែលលក់ប្រេងទៅឲ្យគុយបា។ នៅថ្ងៃបន្ទាប់ ប្រជាជនគុយបាបានតម្រង់ជួរជាជួរវែងៗនៅតាមស្ថានីយប្រេងឥន្ធនៈក្នុងទីក្រុងហាវ៉ាណា។

ដោយឡែក ប្រធានាធិបតីម៉ិកស៊ិកលោកស្រី Claudia Sheinbaum បានព្រមានកាលពីថ្ងៃសុក្រថា វាអាចបង្កឲ្យមានវិបត្តិមនុស្សធម៌។ ដូច្នេះ ខ្លួននឹងស្វែងរកជម្រើសផ្សេងទៀតដើម្បីបន្តជួយប្រទេសគុយបា ខណៈរដ្ឋាភិបាលគុយបាបានចោទប្រកាន់ត្រាំថា កំពុងព្យាយាមច្របាច់កកោះសេដ្ឋកិច្ច ដោយការដាច់ចរន្តអគ្គិសនីប្រចាំថ្ងៃកំពុងកាន់តែខ្លាំងឡើង ហើយខ្សែប្រេងនៅស្ថានីយប្រេងឥន្ធនៈនៅតែបន្តវែង។

ប៉ុន្តែលោកត្រាំ បែរជាតបវិញថា វាមិនចាំបាច់ជាវិបត្តិមនុស្សធម៌ទេ។ ខ្ញុំគិតថាពួកគេប្រហែលជានឹងមករកយើង ហើយចង់ធ្វើកិច្ចព្រមព្រៀង។ ដូច្នេះគុយបា លែងមានប្រេង ឬលុយសម្រាប់ប្រទេសទៀតហើយ នោះមានន័យថា «ប្រេងសូន្យ» ហើយត្រៀមខ្លួនរួចជាស្រេចដើម្បីដួលរលំចុះ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

គុយបា ខឹងសម្បារ បន្ទាប់ពីអាមេរិកគំរាម បិទច្រកប្រេង