មេទ័ព​អ៊ីរ៉ង់៖ «អ៊ីរ៉ង់មិនមែនចំណីដែលងាយលេបទេ» ស្វាគមន៍​ទាំង​ចំណាត់ការការ​ទូត និង​សង្គ្រាម

ក្នុងឯកសណ្ឋានយោធាដើម្បីបញ្ជាក់ពីជំហរការពារជាតិ លោក Ali Shamkhani ទីប្រឹក្សាជាន់ខ្ពស់នៃក្រុមប្រឹក្សាការពារជាតិកំពូលរបស់អ៊ីរ៉ង់ ចេញ​មុខ​មក​ពន្យល់​យ៉ាង​ច្បាស់​អំពី​ផែនការ​សម្រាប់​កម្មវិធី​នុយក្លេអ៊ែរ​របស់​ប្រទេស និង​ជំហរ​ការពារ​ជាតិ​យ៉ាង​មុតមាំ​ប្រឆាំង​នឹង​សហរដ្ឋ​អាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍ផ្តាច់មុខជាមួយ Al Mayadeen ហើយ​ត្រូវ​យក​ចុះ​ផ្សាយ​បន្ត​ដោយ Mehr News នា​ថ្ងៃ​ទី៣​កុម្ភៈ២០២៦ លោក Shamkhani បានបដិសេធសំណើក្នុងការផ្លាស់ប្តូរសារធាតុ​អ៊ុយរ៉ាញ៉ូម​ដែល​ចម្រាញ់រួចទៅក្រៅប្រទេស ហើយបានបញ្ជាក់ថា ខណៈពេលដែលអ៊ីរ៉ង់ត្រៀមខ្លួនសម្រាប់សង្គ្រាមដែល«ជៀសមិនរួច» ច្រកចេញខាងនយោបាយនៅតែមាន បើសហរដ្ឋអាមេរិកយល់ព្រមចរចាក្នុងឋានៈស្មើគ្នា។

មន្ត្រីយោធាជាន់ខ្ពស់រូបនេះ បានបញ្ជាក់ច្បាស់ពីគោលបំណងយុទ្ធសាស្ត្រនៅពីក្រោយការចម្រាញ់អ៊ុយរ៉ាញ៉ូមកម្រិត ៦០% របស់អ៊ីរ៉ង់ ដោយពិពណ៌នាថា វាជាឧបករណ៍​មុខ​ពីរ៖ ជាខែលការពារប្រឆាំងនឹង «ការឃុបឃិតរបស់សត្រូវ» និងជាឧបករណ៍សម្រាប់ប្រើប្រាស់ក្នុងកិច្ចការការទូត។ លោក Shamkhani បានលើកឡើងថា កម្រិតនៃការចម្រាញ់អាចត្រូវបានកាត់បន្ថយមកត្រឹម ២០% បើការព្រួយបារម្ភរបស់លោកខាងលិចត្រូវបានដោះស្រាយ ប៉ុន្តែលោកបានសង្កត់ធ្ងន់ថា «ភាគីម្ខាងទៀតត្រូវតែផ្តល់អ្វីមកវិញ» សម្រាប់ការសម្បទានបែបនេះ។

លោកក៏បានទម្លាយនូវចំណុចសំខាន់មួយទាក់ទងនឹងស្តុកទុករបស់អ៊ីរ៉ង់ ដោយកត់សម្គាល់ថា ផ្នែកខ្លះនៃសារធាតុទាំងនោះនៅជាប់ «ក្រោមគំនរបាក់បែក» ពីព្រឹត្តិការណ៍វាយ​ប្រហារ​មុនៗ ដែលធ្វើ​ឲ្យ​ការប៉ាន់ប្រមាណបរិមាណជាក់លាក់មានការលំបាក ដោយសារគ្រោះថ្នាក់ខ្លាំងក្នុងការយកវាចេញមកក្រៅ។

លើវិស័យការទូត លោក Shamkhani បានផ្តល់សញ្ញានៃការផ្លាស់ប្តូរដ៏សំខាន់មួយ ដោយបង្ហាញពីការត្រៀមខ្លួនសម្រាប់កិច្ចចរចាទ្វេភាគីដោយផ្ទាល់ជាមួយសហរដ្ឋអាមេរិកតែមួយគត់។ លោកបានរិះគន់យ៉ាងខ្លាំងដល់មហាអំណាចអឺរ៉ុប ដោយអះអាងថា ពួកគេគ្មាន​បាន​ការ​ទេ ចាប់តាំងពីការដកខ្លួនរបស់​អាមេរិកពីកិច្ចព្រមព្រៀងនុយក្លេអ៊ែរក្នុងឆ្នាំ​២០១៨។ លោក Shamkhani បានកំណត់លក្ខខណ្ឌថា រាល់កិច្ចសន្ទនាត្រូវតែមានកម្រិតត្រឹមតែសំណុំរឿងនុយក្លេអ៊ែរប៉ុណ្ណោះ ហើយត្រូវធ្វើឡើង​ឲ្យ​ឆ្ងាយពី «ការគំរាមកំហែង និងការបង្ខិតបង្ខំ»។ ខណៈពេលដែលការចរចាដោយប្រយោលនឹងត្រូវធ្វើឡើងជាមុន លោកបានកត់សម្គាល់ថា ជំនួបដោយផ្ទាល់អាចនឹងកើតមានឡើងក្នុងទឹកដីអព្យាក្រឹត ដូចជាប្រទេសតួកគី បើការយល់ដឹងគ្នាទៅវិញទៅមកត្រូវបានបង្កើតឡើង។

បទសម្ភាសន៍បានបញ្ចប់ដោយការព្រមានយ៉ាងធ្ងន់ធ្ងរដល់សត្រូវដែលស្វែងរកការ «លេបត្របាក់អ៊ីរ៉ង់»។ លោក Shamkhani បានបញ្ជាក់ថា ប្រទេសនេះគឺជា «ចំណីដែលនឹងត្រូវស្លាក់នៅក្នុងបំពង់ករបស់ពួកគេ» ដោយចង្អុលបង្ហាញពីវិធានការបរាជ័យជាច្រើនទសវត្សរ៍ប្រឆាំងនឹងសាធារណរដ្ឋអ៊ីស្លាម។ ដ្បិត​មានការត្រៀមខ្លួនខាងយោធាតាមរយៈការស្លៀកពាក់ឯកសណ្ឋានក៏ដោយ លោក Shamkhani បានរក្សាជំហរថា អ៊ីរ៉ង់មិនស្វែងរកការបង្កជម្លោះនោះឡើយ ប៉ុន្តែបានព្រមានថា លោកខាងលិចត្រូវតែបោះបង់ចោល «ការទាមទារដែលមិនសមហេតុផល» បើចង់សម្រេចបាននូវដំណោះស្រាយប្រកបដោយសន្តិភាព៕

ប្រែសម្រួល៖ ឈាង