កីឡា

កីឡាករ ស៊ុំ គង់ហេង ចាត់ទុកលោក ប៉ាល់ ជីវ័ន ដូចជាឪពុកព្រោះបានការបង្ហាញផ្លូវលើវិថីកីឡានេះរហូតបានជោគជ័យ

បានផុស

៣ ខែ មុន

នៅ

ថ្ងៃព្រហស្បតិ៍ ៥ កុម្ភៈ ២០២៦

ដោយ

កីឡាករឆ្នើមខាងតេក្វាន់ដូ ITF ស៊ុំ គង់ហេង ថាមានថ្ងៃនេះក្នុងអាជីពកីឡាគឺបានមកពីការស្ដីប្រដៅ និងបង្ហាញផ្លូវពីលោក ប៉ាល់ ជីវ័ន ដែលជាគ្រូបង្ហាត់ជាង ១០ឆ្នាំកន្លងមកនេះ ដូច្នេះហើយរូបគេចាត់ទុកគ្រូម្នាក់នេះដូចជាឪពុក ជាសាច់ញ្ញាត្តិរបស់ខ្លួនអីចឹងដែរ។

ស៊ុំ គង់ហេង និងលោក ប៉ាល់ ជីវ័ន

កីឡាករ ស៊ុំ គង់ហេង បានឲ្យដឹងថា រូបគេហ្វឹកហាត់តេក្វាន់ដូ ITF នេះបានរយៈពេលជាង ១០ឆ្នាំមកហើយជាមួយលោក ប៉ាល់ ជីវ័ន ដែលជាគ្រូនៃក្លឹបយុវជន និងគ្រូជម្រើសជាតិ។ ដោយចិត្តស្រឡាញ់ និងចង់មានសមត្ថភាពខ្លាំងរូបគេតែងតែខំប្រឹងប្រែងហ្វឹកហាត់ និងព្យាយាមបំផុតពិសេសមុនចេញទៅប្រកួតនៅក្រៅស្រុកម្ដងៗ។

កីឡាករ ស៊ុំ គង់ហេង ពេលសម្ដែង

កីឡាករជម្រើសជាតិកម្ពុជារូបនេះបន្ថែមទៀតថា មេដាយលើឆាកអន្តរជាតិ ១៤គ្រឿង និងមានសមត្ថភាពប្រកួតល្អ ចំណេះដឹងបង្ហាត់សិស្ស និងការទទួលបានក្របខ័ណ្ឌជាមន្ត្រីកីឡាក្រសួងមហាផ្ទៃនៅពេលថ្មីៗនេះគឺសុទ្ធតែជាការបង្ហាញផ្លូវ ស្ដីប្រដៅពីលោក ប៉ាល់ ជីវ័ន ទាំងអស់។ ដូច្នេះហើយរូបគេគោរពស្រឡាញ់លោក ប៉ាល់ ជីវ័ន ដូចទៅហ្នឹងសាច់ញ្ញាត្តិ ជាបង ជាឪពុក តែម្ដង។ រូបគេពិតជាដឹងគុណបំណាចដ៏ធំធេងមួយនេះ និងព្យាយាមបន្តទៀតដើម្បីស្វែងរកភាពជោគជ័យជូនគ្រូបន្ថែមទៀតជាការតបស្នងផងដែរ។

កីឡាករ ស៊ុំ គង់ហេង

បញ្ជាក់ដែរថា ស៊ុំ គង់ហេង ជាកីឡាករជម្រើសជាតិតេក្វាន់ដូ ITF កម្ពុជា។ រូបគេចូលហ្វឹកហាត់កីឡាមួយនេះជាង ១០ឆ្នាំមកហើយ។ សិស្សគុនតេក្វាន់ដូរូបនេះធ្លាប់ឈ្នះមេដាយលើឆាកអន្តរជាតិសរុប ១៤គ្រឿង និងមានសមិទ្ធផលជូនជាតិមាតុភូមិជាច្រើនទៀតផងដែរ។ រូបគេប្រកួតតំណាងឲ្យក្រសួងមហាផ្ទៃ និងទើបទទួលបានក្របខ័ណ្ឌជាមន្ត្រីកីឡាក្រសួងមហាផ្ទៃផងដែរកាលពីពេលថ្មីៗនេះ៕