កីឡា

លោក ប៉ាល់ ជីវ័ន ចូលហាត់តេក្វាន់ដូ ITF ដំបូងគិតត្រឹមទទួលបានសុខភាពល្អ ប៉ុន្តែអ្វីដែលទទួលបានលើសពីនេះ

បានផុស

៤ ខែ មុន

នៅ

ថ្ងៃសុក្រ ១៣ មីនា ២០២៦

ដោយ

លោក ប៉ាល់ ជីវ័ន គ្រូបង្វឹកជម្រើសជាតិតេក្វាន់ដូ ITF កម្ពុជា និងជាជើងខ្លាំងប្រចាំកីឡាមួយនេះ ថាមុនដំបូងចូលហាត់គឺគ្រាន់តែគិតត្រឹមទទួលបានសុខភាពល្អ និងមានរាងកាយរឹមាំនោះទេ ប៉ុន្តែមកដល់ពេលនេះលើសពីអ្វីដែលលោកធ្លាប់គិតពីមុនមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉ាល់ ជីវ័ន

គ្រូជម្រើសជាតិកីឡាតេក្វាន់ដូ ITF លោក ប៉ាល់ ជីវ័ន បានលើកឡើងថា លោកហ្វឹកហាត់កីឡាមួយនេះតាំងតែអាយុប្រហែល ១៤ឆ្នាំអំឡុងឆ្នាំ១៩៩៧-១៩៩៨ មកម្ល៉េះ។ គិតមកដល់ឆ្នាំ២០២៦ នេះមានប្រហែលប្រហែលជិត ៣០ឆ្នាំមកហើយចាប់តាំងពីជាកីឡាកររហូតជាប់ជាគ្រូជម្រើសជាតិ។

លោក ប៉ាល់ ជីវ័ន

ម្ចាស់ខ្សែក្រវាត់ខ្មៅ ៥ដាន រូបនេះបន្ថែមទៀតថា ការចាប់ហ្វឹកហាត់ដំបូងគឺគិតត្រឹមថាទទួលបានសុខភាពល្អ និងរាងកាយរឹងមាំប៉ុណ្ណោះ។ លោកមិននឹកស្មានថាទទួលបានលើសពីអ្វីដែលធ្លាប់គិតកាលនោះទេគឺមានសុខភាពល្អរឹងមាំហើយបានផ្ដល់កិត្តិយសជូនក្រុមគ្រួសារ ខ្លួនឯង និងបានជួយលើកមុខមាត់ប្រទេសកម្ពុជាលើឆាកអន្តរជាតិតាមរយៈការស្នាដៃនៃការឈ្នះមេដាយផ្សេងៗ។ បន្ថែមពីនេះមិនថារូបលោក និងកីឡាករដទៃទេនៅពេលមានសមត្ថភាពដណ្ដើមបានមេដាយផ្សេងៗគឺទទួលបានថវិកាលើកទឹកចិត្តពីរាជរដ្ឋាភិបាលដែលនេះជាផ្នែកមួយជួយសម្រួលដល់ជីវភាពក្រុមគ្រួសារឲ្យមានភាពប្រសើរឡើងទៀតផង។

លោក ប៉ាល់ ជីវ័ន

ម្ចាស់មេដាយមាសពិភពលោកខាងលើបន្ថែមទៀតថា លោកក៏បានចេញបង្ហាត់កីឡាតេក្វាន់ដូ ITF នេះតាំងពីឆ្នាំ២០០៨ នៅតាមសាលាឯកជន និងនៅក្លឹបយុវជនបន្តពីគ្រូធំរហូតមកដល់ពេលនេះ។ ការបង្ហាត់បង្រៀននេះក៏ទទួលបានថវិកាមួយចំនួនជួយសម្រួលដល់ការចំណាយលើការរៀនសូត្ររបស់លោកអំឡុងពេលនោះមួយផ្នែកដែរ។ សរុបទៅកីឡាតេក្វាន់ដូ ITF នេះពិតជាមានផលប្រយោជន៍ច្រើនចំពោះអ្នកហ្វឹកហាត់ដូចជារូបលោក។

រូបភាពផេកតេក្វាន់ដូសៅរ៍-អាទិត្យ

បញ្ជាក់ដែរថា លោក ប៉ាល់ ជីវ័ន បច្ចុប្បន្ននេះជាគ្រូជម្រើសជាតិកីឡាតេក្វាន់ដូ ITF កម្ពុជា និងមានកម្រិតខ្សែក្រវាត់ខ្មៅ ៥ដាន។ លោកជាអតីតកីឡាករដែលមានសមត្ថភាព និងកេរ្តិ៍ឈ្មោះល្បីក្នុងវិស័យកីឡានៅកម្ពុជានាពេលកន្លងមក។ គ្រូបង្វឹករូបនេះជាកីឡាករតែម្នាក់គត់ដែលធ្លាប់ឈ្នះមេដាយមាសអន្តរជាតិគ្រប់កម្រិតទាំងអស់រួមមាន ឈ្នះមេដាយមាសជើងឯកពិភពលោក មេដាយមាសជើងឯកអាស៊ី ឈ្នះមេដាយមាស ជើងឯកអាស៊ីអាគ្នេយ៍ និងឈ្នះមេដាយជាច្រើនទៀតផងដែរ។ មិនត្រឹមតែជាគ្រូបង្ហាត់នោះទេលោកក៏មានជំនាញដឹកនាំសិស្សសម្ដែងជូនថ្នាក់ដឹកនាំ និងមហាជនទស្សនាក្នុងកម្មវិធីតូច-ធំ ទៀតផង។ លោកក៏ជាកម្លាំងស្នូលដ៏សំខាន់ម្នាក់របស់លោក កែវ រ៉េមី ប្រធានសហព័ន្ធដែលដឹកនាំឲ្យកីឡាតេក្វាន់ដូ ITF ល្បីឈ្មោះជាខ្លាំងដូចសព្វថ្ងៃ៕