សេដ្ឋកិច្ច

កម្ពុជា រំពឹងទទួលបានទិន្នផលគ្រាប់ស្វាយចន្ទីចំនួន ១ លានតោន នៅឆ្នាំនេះ

បានផុស

៤ ខែ មុន

នៅ

ថ្ងៃសុក្រ ១៣ កុម្ភៈ ២០២៦

ដោយ

សមាគមស្វាយចន្ទីកម្ពុជាបានព្យាករថា ទិន្នផលគ្រាប់ស្វាយចន្ទីនៅកម្ពុជានឹងសម្រេចបាន ៨០ ម៉ឺនតោន ដល់ ១ លានតោន នៅក្នុងរដូវប្រមូលផលឆ្នាំ ២០២៦ ដោយសារការកើនឡើង នៃផ្ទៃដីដាំដុះ រួមផ្សំនឹងការអំណោយផលពីអាកាសធាតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អួន ស៊ីឡុត ប្រធានសមាគមស្វាយចន្ទីកម្ពុជា មានប្រសាសន៍ថា ការប្រមូលផលស្វាយចន្ទីនាពេលខាងមុខរបស់កម្ពុជានឹងស្ថិតចន្លោះពី ៨០ ម៉ឺន ទៅដល់ ១ លានតោន ដោយសារការកើនឡើងនៃផ្ទៃដីដាំដុះ និងការផ្ដល់អំណោយផលពីអាកាសធាតុ។

លោក អួន ស៊ីឡុត បញ្ជាក់ថា៖ «ផ្ទៃដីដាំដុះកើនឡើង ហើយយើងអាចប៉ាន់ស្មានថា អាកាសធាតុវាមិនអាក្រក់ពេក ដោយសារតែការពន្យាការផ្ដល់ផលរយៈពេលមួយខែ យើងសង្ឃឹមថា ខែមេសា និងឧសភា នឹងក្លាយជាខែប្រមូលផលច្រើនបំផុត ខុសពី ៣ ឆ្នាំមុន ដែលការប្រមូលផលក្នុងខែមីនា»។

កម្ពុជាកំពុងខិតខំទាក់ទាញទីផ្សារនាំចេញគ្រាប់ស្វាយចន្ទីថ្មី ទៅប្រទេសឥណ្ឌា ដើម្បីបង្កើនពិពិធកម្មក្នុងការនាំចេញគ្រាប់ស្វាយចន្ទី ខណៈស្វាយចន្ទីកម្ពុជានាំចេញភាគច្រើនទៅប្រទេសវៀតណាម។

យោងតាមសមាគមស្វាយចន្ទី គិតមកដល់ពេលនេះ កម្ពុជាមានផ្ទៃដីដាំដុះស្វាយចន្ទីប្រមាណ ៧៤ ម៉ឺនហិកតា។ នៅឆ្នាំ ២០២៥ កម្ពុជារកចំណូលបាន ១,៥ ពាន់លានដុល្លារ ពីការនាំចេញគ្រាប់ស្វាយចន្ទីឆៅ ១ លានតោន កើនឡើង ២៧% ធៀបនឹងឆ្នាំ ២០២៤៕