ការសិក្សា៖ ស្រ្តីមានផ្ទៃពោះផឹក​កាហ្វេ​ អាចកាត់បន្ថយ​ហានិភ័យនៃ​ជំងឺ​តំណពូជ​​

ការសិក្សាមួយដែលដឹកនាំដោយសាស្ត្រាចារ្យ Kim Yu-jun មកពីនាយកដ្ឋានវេជ្ជសាស្ត្របរិស្ថាននៃសាកលវិទ្យាល័យ Ewha Womans នៃ​ប្រទេសកូរ៉េខាងត្បូង ដែល​ត្រូវ​បានបោះពុម្ពផ្សាយនៅក្នុងទស្សនាវដ្ដី Healthcare Informatics Research បាន​រក​ឃើញ​ថា ទារកដែលកើតពីស្ត្រីដែលផឹកកាហ្វេ​ក្នុងកម្រិត​តិចជាង​មួយពែងក្នុងមួយថ្ងៃ មានហានិភ័យទាបជាង ១១ភាគរយនៃ​ប្រភេទ​ជំងឺ​​តំណពូជ​ (atopy) ជាង​ទារក​​ដែលកើត​​​​ពី​ម្តាយ​ដែល​មិនផឹកកាហ្វេទាល់តែសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចេញផ្សាយដោយ koreaherald ក្រុមស្រាវជ្រាវបានតាមដានស្ត្រីមានផ្ទៃពោះចំនួន ៣,២៥២ គូ និងកូនរបស់ពួកគេដែលត្រូវបានជ្រើសរើសរវាងឆ្នាំ ២០១៥ និង ២០១៩ ដោយបែងចែកពួកគេជាបីក្រុម៖ ស្ត្រីដែលមិនផឹកកាហ្វេ​ (១,៨០៩) ស្ត្រីដែលផឹកតិចជាងមួយពែងក្នុងមួយថ្ងៃ (១,២២៥) និងអ្នកដែលផឹកមួយពែង ឬច្រើនជាងនេះក្នុងមួយថ្ងៃ (១៨៨) ដើម្បីវាយតម្លៃពីផលប៉ះពាល់លើការវិវត្តនៃជំងឺតំណពូជ​។

ទារកដែលកើតពីស្ត្រីដែលផឹកមួយពែង ឬច្រើនជាងនេះក្នុងមួយថ្ងៃមានឱកាសតិចជាង ៩​ភាគរយក្នុងការវិវត្តទៅជាជំងឺ​​តំណពូជ (ហ្សែន) ជាងទារក​​ដែលម្តាយមិនបានផឹកកាហ្វេ ទោះបីជាទំនាក់ទំនងនេះមិនមានសារៈសំខាន់ខាងស្ថិតិក៏ដោយ។

ជំងឺតំណពូជ​ត្រូវបានផ្សារភ្ជាប់ជាមួយនឹងក្រុមនៃប្រតិកម្មអាឡ័កស៊ី។ អ្នកស្រាវជ្រាវបានណែនាំថា សមាសធាតុជីវសកម្មនៅក្នុងកាហ្វេ អាចមានឥទ្ធិពលលើការវិវត្តនៃប្រព័ន្ធភាពស៊ាំ។ ពួកគេបាននិយាយថា សារធាតុប្រឆាំងអុកស៊ីតកម្ម និងលក្ខណៈសម្បត្តិប្រឆាំងនឹងការរលាកនៅក្នុងកាហ្វេ អាចប៉ះពាល់ដល់ការវិវត្តនៃប្រព័ន្ធភាពស៊ាំរបស់ទារក។

ក្រុមនេះបាននិយាយទៀតថា នេះគឺជាការវិភាគក្រុមទារកដំបូងនៅក្នុងប្រទេសកូរ៉េខាងត្បូង ដែលបង្ហាញថា ការទទួលទានកាហ្វេក្នុងកម្រិតមធ្យមអំឡុងពេលមានផ្ទៃពោះក៏អាចត្រូវបានផ្សារភ្ជាប់ជាមួយនឹងការថយចុះហានិភ័យនៃជំងឺ​តំណពូជ​ក្នុងវ័យកុមារភាព។ ទោះជាយ៉ាងណាក៏ដោយ ការស្រាវជ្រាវបន្ថែមទៀតគឺត្រូវការដើម្បីបង្កើតទំនាក់ទំនង​នៃ​មូលហេតុពិតប្រាកដ​ក្នុង​ដំណើរ​​​​ការ​​នេះ​​៕

អត្ថបទ៖ សាង ស្រីល័ក្ខ