ម្ទេស ត្រប់ស្រួយ ផ្កាត់ខាត់ណា ​ធ្លាក់ថ្លៃ​ចាល់ពេញ​ទីផ្សារ​​ ខណៈ​​​កសិករ​ប្រមូលផលលក់​ស្របពេល​គ្នា

ផល​កសិកម្ម​របស់​កសិករដែល​បានប្រមូលផលព្រមៗគ្នាស្ទើរគ្រប់បណ្តាស្រុកគោលដៅ បានកកស្ទះនៅផ្សារ​ក្រុ​ងបាត់ដំបង​ ដែល​ធ្វើឲ្យតម្លៃធ្លាក់ចុះរកកម្រៃចំណេញស្ទើរគ្មាន។

កសិផលដែលកសិករបានប្រមូលផលព្រមៗគ្នានេះ មានដូចជា ត្រសក់ ត្រប់ស្រួយ ម្ទេសដៃនាង ផ្កាខាត់​ណា ជាដើម ខណះកសិផលទាំងនេះបានដាក់លក់​ចាល់នៅលើទីផ្សារធំៗក្នុង​ក្រុង​បាត់ដំបង ដូចជាផ្សារ ពូ ពុយ ជាដើម ដែលកសិករបានសម្រុកដឹកលក់ឲ្យឈ្មួញកណ្តាល ហើយឈ្មួញកណ្តាលត្រូវខាតបន្តទៀត ដោយធ្វើការចែកចាយបន្តឲ្យម៉ូយតាម​បណ្តា​ខេត្តក្នុងតម្លៃទាបដូចគ្នា។

កសិករនៅស្រុកបវេល លោក វ៉ាន់ ណាក់ កំពុងប្រមូលទិន្នផលត្រសក់ប្រាប់​ថា ត្រសក់ឆ្នាំនេះចុះថោក លក់ឲ្យឈ្មួញកណ្តាបាន ១ ថង់ (ស្មើ១០គីឡូក្រាម) បានជាង ២ ពាន់រៀលប៉ុណ្ណោះ ខណះការ​ជួលកម្មករចំណាយ​អស់ច្រើន។

លោកថា បើទោះបីឆ្នាំនេះថោកក៏លោកសង្ឃឹមថា នៅឆ្នាំខាងមុខបានតម្លៃកើនឡើងវិញ ហើយលោកក៏​មិនបោះបង់ការដាំដុះដែរ ព្រោះឆ្នាំនេះលោកថាធ្លាក់ថ្លៃដោយសារកសិករប្រមូលផលព្រមៗគ្នា ទើបមានការកកស្ទះទីផ្សារបែបនេះ។

លោក ភា សុភ័ក្រ ដែលជាឈ្មួញកណ្តាលទិញផលកសិកម្មក្នុងស្រុកដាក់លក់លើផ្សារ ពូ ពុយ ជាយូរឆ្នាំមកហើយបានត្អូញត្អែរថា ត្រសក់ឆ្នាំនេះចុះថោក លោកលក់បន្តឲ្យម៉ូយបាន ១ថង់ (ស្មើនិង​ ១០ ​គីឡូក្រាម) បានតម្លៃ ៣ ៥០០ រៀល ខណះទិញពីកសិករ ១ ថង់ (ស្មើ ១០ គីឡូក្រាម) បាន ២ ៥០០រៀល គ្រាន់បានចំណេញ​​ក្បាលកាក់ខ្លះ តែត្រូវបានកកស្ទះមិនមានម៉ូយកម្ម៉ង់ដូចឆ្នាំមុនទេ ស្ទើរតែខាតដើមផង។

ចំណែកផ្កាខាត់ណា បានធ្លាក់តម្លៃបើធៀបឆ្នាំមុន ១ ថង់ (ស្មើ ១០ គីឡូក្រាម) លោកលក់បានជាង ៣ មុឺនរៀល តែឆ្នាំនេះ ១០ គីឡូក្រាម បានតែជាង ៣ ពាន់រៀលប៉ុណ្ណោះ។

បើទោះមានការកកស្ទះទីផ្សារ សម្រាប់លោក​នៅតែ​ទទួលទិញពីកសិករជាម៉ូយ ហើយកសិផលដែលលោកទទួលទិញលក់លើទីផ្សារ មានដូចជា ត្រសក់ ម្ទេស ផ្កាខាត់ណា ត្រប់ស្រួយ ជាដើម។

បើតាមលោក ភា សុភក្រតាមលោកសង្កេតឃើញ ស្របពេលបន្លែក្នុងស្រុកដាក់លក់យ៉ាងសម្បូរបែបហើយ ក៏ត្រូវបានឈ្មួញ​ខ្លះបាននាំផ្លែត្រសក់មកដាក់លក់លើផ្សារផងដែរ ដែល​ដឹកពីវៀតណាមមកលក់នៅក្នុងផ្សារ ក្នុងមួយថ្ងៃមិនក្រោម ១០០ តោន នោះទេ។

លោក ប៊ុន ធឿន កសិករដាំត្រប់ស្រួយក្នុងស្រុកបាណន់បានត្អូញត្អែរថា ត្រប់ស្រួយគឺងាយប្រឈមទីផ្សារ តែលោកក៏នៅតែបន្តដាំ ហើយឆ្នាំនេះបើទោះមានតម្លៃទាប តែលោកបានលក់អស់ជិត ១ តោន ដោយ​សារ​តែផ្លែត្រប់លោកបានប្រមូលជាលើកទីមួយផ្លែត្រប់មានគុណភាពល្អ។

លោកថា បើប្រមូលលើកទី២ ក៏ផ្លែមិនសូវល្អដែរ។ ត្រប់លោកលក់បាន ២៥០ រៀល ក្នុង ១ គីឡូក្រាម ខណះកសិករដាំនៅស្រុកផ្សេងទៀត​​ដូច​នៅស្រុកសំឡូត លក់បានចន្លោះ ១៥០ ទៅ ២០០ រៀលប៉ុណ្ណោះ ១ គីឡូក្រាម។

លោកថា ដោយសារតែគុណភាពផ្លែត្រប់មិនសូវល្អ ណាមួយម៉ូយក៏ខុសគ្នាដោយម៉ូយខ្លះយកចំណេញតិចតួចពីកសិករ ហើយម៉ូយខ្លះចង់បានចំណេញច្រើនពីកសិករ ទើបមានតម្លៃខុសគ្នាខ្លះបែបនេះ។

បើតាមកសិកររូបនេះ​ ការបន្តដាំដុះនៅឆ្នាំមុខលោកត្រូវស្វែងយល់ពីទីផ្សារជាមុនសិន បើទីផ្សារចង្អៀតលោកផ្អាកការដាំ​ងាក​ដាំបន្លែផ្សេង។

មន្ត្រីកសិកម្មខេត្តបាត់ដំបង​បាន​ឆ្លើយត​ប​ថា ឆ្នាំនេះកសិករសម្រុកដាំបន្លែច្រើន ទើបកសិផល​មួយចំនួន ដូចជា ត្រសក់ ផ្កាខាត់ណា ត្រប់ស្រួយ ជាដើម បានកកស្ទះលើទីផ្សារ។

បើទោះបែបនេះក្តី កសិផលទាំងនេះក៏បានចែកចាយនៅតាមបណ្តាខេត្តផ្សេងៗនៅភ្នំពេញផងដែរ ខណះឆ្នាំនេះកសិករបានចាប់ប្រមូលផលស្របពេលតែមួយ ទើបមានការកកស្ទះលើទីផ្សារ។

លោកណែនាំថា បើកសិករមួយចំនួននៅមិនទាន់បាន​ប្រមូលផលត្រសក់ឬបន្លែផ្សេងៗ ក្នុងរយះពេល ១ ខែទៀត អាចនឹងមានតម្លៃល្អឡើងវិញ៕

អត្ថបទ÷សៅ សារិទ្ធ