តារាចម្រៀងជើងចាស់ លោក ផៃ ផុងរ៉ាក់ បង្ហាញការដឹងគុណដល់សប្បុរសជន ដែលជួយឱ្យទទួលបានការព្យាបាល

នៅរសៀលថ្ងៃទី២ ខែមីនានេះ តារាចម្រៀងជើងចាស់ លោក ផៃ ផុងរ៉ាក់ បានចេះសារថ្លែងអំណរគុណដល់សប្បុរសជនគ្រប់រូប ដែលបានជួយលោកតាមរយៈការបរិច្ចាគថវិកា ខណៈដែលកំពុងខ្វះលទ្ធភាពទៅព្យាបាល។ សារថ្លែងអំណែងគុណនេះ ធ្វើឡើងបន្ទាប់ពីលោកទទួលបានការជួយជ្រោមជ្រែងជាថវិកាព្យាបាលជំងឺ ពីសប្បុរសជននានាថ្មីៗនេះ។

តាមរយៈសារពីគណនីហ្វេសប៊ុកឈ្មោះ Ka Record កាលពីចុងសប្តាហ៍មុននេះ បានបង្ហើបស្ថានភាពទុក្ខលំបាករបស់តារាចម្រៀងជើងចាស់លោក ផៃ ផុងរ៉ាក់ ដែលកំពុងធ្លាក់ខ្លួនឈឺក្នុងវ័យចំណាស់។

ដោយមើលឃើញទុក្ខលំបាកនេះ អ្នកគាំទ្រវិស័យសិល្បៈចម្រៀងជាច្រើន បានសួររក QR Code ធនាគាររបស់លោកផ្ទាល់ ក្នុងបំណងបរិច្ចាគថវិកាខ្លះៗជូនម្ចាស់បទ «យក្សកើតអេដស៍» រូបនេះ ដើម្បីបានទៅពិនិត្យព្យាបាលជំងឺ។

គួរជម្រាបថា តារាចម្រៀងជើងចាស់ លោក ផៃ ផុងរ៉ាក់ ជាសិល្បករល្បីល្បាញនាអំឡុងទសវត្សរ៍៨០ (អតីតជ័យលាភីលេខ១ ប្រឡងចម្រៀងឆ្នាំ១៩៨១) ពោលគឺជំនាន់ លោក ណូយ វ៉ាន់ណេត និងលោក នូ សុិប ខណ:លោកមានស្នាដៃបទចម្រៀងល្បីៗជាច្រើនបទសម្រាប់បំពេរអារម្មណ៍មហាជន។

ក្រោយពេលសាងប្រជាប្រិយភាព និងកេរ្តិ៍ឈ្មោះល្បីរន្ទឺ លោក ផៃ ផុងរ៉ាក់ បានស្ងប់ស្ងាត់ពីវិថីសិល្បៈមួយរយៈ។ លុះក្រោយមកទៀត ស្រាប់តែផ្ទុះការគាំទ្រជាថ្មីតាមរយៈបទ “រង្វាន់បានពេទ្យ” ដែលបទចម្រៀង​នេះបាន​បង្ហាញ​ពីអត្ថន័យអប់រំស៊ីជម្រៅពិសេស សម្រាប់អ្នកនិយមផឹកស្រាតាមរករង្វាន់។

គួររំលឹកដែរថា កាលពីឆ្នាំ២០២៤ កន្លងទៅ តារាចម្រៀង លោក សុះ ម៉ាច បានបង្ហើបឱ្យដឹងពីសុខទុក្ខរបស់លោក ផៃ ផុងរ៉ាក់ ម្តងរួចមកហើយ ដោយបញ្ជាក់ថា លោក ផុងរ៉ាក់ ឃ្លាតឆ្ងាយពីសិល្បៈទៅរស់នៅឯខេត្តសៀមរាប។ គ្រានោះ តារាចម្រៀង សុះ ម៉ាច បានឱ្យដឹងដែរថា លោក ផុងរ៉ាក់ ធ្លាប់បានបម្រើវិស័យសិល្បៈជាង ៤០ឆ្នាំ ដោយមានស្នាដៃ និងបទចម្រៀងល្បីៗជាច្រើនតែបើនិយាយពីការផ្តល់កិត្តិយស និងគ្រឿងឥស្សរិយយសនៅពុំទាន់មាននៅឡើយទេ នេះតាមការអះអាងពីគាត់កន្លងមក៕