ត្រាំបោះសម្តីមិនត្រូវការជំនួយអ៊ុយក្រែន ខណៈហ្សេលេនស្គី ថាឲ្យអ្នកជំនាញទៅរួច​ហើយ

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានបញ្ជាក់ជាថ្មីពីការត្រៀមខ្លួនរួចជាស្រេចរបស់ទីក្រុងកៀវ ក្នុងការគាំទ្រកិច្ចខិតខំប្រឹងប្រែងរបស់សហរដ្ឋអាមេរិកប្រឆាំងនឹងអ៊ីរ៉ង់ ដោយផ្តល់ជូននូវអ្នកជំនាញដ្រូនកម្រិតខ្ពស់ និងបច្ចេកវិទ្យាស្ទាក់ចាប់សញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់សារព័ត៌មាន The New York Post កាលពីថ្ងៃចន្ទ​ទី​១៦​ខែ​មីនា​ឆ្នាំ​២០២៦ លោក ហ្សេលេនស្គី បានលើកឡើងថា អ៊ុយក្រែនបានឆ្លើយតបភ្លាមៗ ក្នុងការផ្តល់ជំនួយគ្រប់ពេល​ទៅ​ឲ្យ​អាមេរិក។ ការលើកឡើងនេះ កើតឡើងក្រោយមានរបាយការណ៍ថា អ៊ុយក្រែនទើបតែបានបញ្ជូនក្រុមអ្នកជំនាញដ្រូនទៅការពារមូលដ្ឋានទ័ពអាមេរិកក្នុងប្រទេសហ្ស៊កដានី។

ទោះបីជាអ៊ុយក្រែនមានបទពិសោធន៍ខ្លាំង​ក្នុងការការពារខ្លួនពីដ្រូន Shahed របស់អ៊ីរ៉ង់ដែលរុស្ស៊ីប្រើក៏ដោយ ក៏​ប្រធានាធិបតី ដូណាល់ ត្រាំ បានចេញមុខមកច្រានចោលការផ្តល់ជូននេះជាសាធារណៈ។ លោកត្រាំ បានប្រាប់ Fox News កាល​ពីថ្ងៃ​សុក្រ​សប្ដាហ៍​មុន​ថា «អាមេរិកមិនត្រូវការជំនួយពីអ៊ុយក្រែន លើការការពារដែនអាកាសនៅមជ្ឈិមបូព៌ានោះឡើយ»។ លោកថែមទាំងបានបញ្ជាក់ក្នុងសម្ភាសន៍មួយ​ផ្សេង​ទៀតថា លោកហ្សេលេនស្គី គឺជា​មនុស្សចុងក្រោយគេដែលអាមេរិក​​​នឹង​សុំ​ជំនួយ។

នេះគឺជាលើកទី២​ហើយដែលរដ្ឋបាលលោកត្រាំ បានបដិសេធភាពជាដៃគូនេះ ដែលសារព័ត៌មាន Axios បានពណ៌នាថាជា «ការគណនាខុសផ្នែកយុទ្ធសាស្ត្រដ៏ធំមួយ» ចាប់តាំងពីអាមេរិក និងអ៊ីស្រាអែល ចាប់ផ្តើមទម្លាក់គ្រាប់បែកលើអ៊ីរ៉ង់កាលពីថ្ងៃទី២៨ខែកុម្ភៈ។ អ្វីដែលគួរឲ្យចាប់អារម្មណ៍នោះគឺ ខណៈដែលលោកត្រាំ បដិសេធជាសាធារណៈ ប៉ុន្តែមានរបាយការណ៍ថា តាមពិតទៅអាមេរិក​ធ្លាប់បានស្នើសុំជំនួយពីអ៊ុយក្រែនដោយសម្ងាត់មែន ដើម្បីការពារមូលដ្ឋានទ័ពរបស់ខ្លួននៅហ្ស៊កដានី បន្ទាប់ពីមានការវាយប្រហារដោយដ្រូនរបស់អ៊ីរ៉ង់។

រហូតមកដល់ពេលនេះ សេតវិមាននៅតែរក្សាភាពស្ងប់ស្ងាត់ មិនទាន់មានការបកស្រាយផ្លូវការថា តើខ្លួនពិតជាបានស្នើសុំជំនួយដែលត្រូវបានបញ្ជូនទៅដល់ហ្ស៊កដានីនោះមែនឬយ៉ាងណាទេ។

អ៊ុយក្រែននៅតែសង្ឃឹមថា នឹងអាចដោះដូរបទពិសោធន៍សមរភូមិរបស់ខ្លួន ដើម្បីទទួលបានមកវិញនូវថវិកា និងបច្ចេកវិទ្យាទំនើបៗសម្រាប់​ទុក​ការពារខ្លួនពីការឈ្លានពានរបស់រុស្ស៊ី៕

ប្រែសម្រួល៖ ឈាង