ព័ត៌មានជាតិ

អភិបាលខេត្តស្ទឹងត្រែង៖ មិនអាចហាមឃាត់ទំនិញថៃទាំងស្រុង តែអាវុធដ៏មុតស្រួចរបស់ពលរដ្ឋកម្ពុជាគឺបន្តពហិការ

បានផុស

៤ ខែ មុន

នៅ

ថ្ងៃពុធ ១៨ មីនា ២០២៦

ដោយ

ឆ្លើយតបសំនួររបស់អ្នកសារព័ត៌មានក្នុងដំណើរទស្សនកិច្ចផ្សព្វផ្សាយពីសក្តានុពលក្នុងខេត្តស្ទឹងត្រែង លោក សរ សុពុត្រា អភិបាលខេត្តស្ទឹងត្រែងបានលើកឡើងជុំវិញការនាំទំនិញចេញចូលឆ្លងកាត់ព្រំដែនក្នុងខេត្តស្ទឹងត្រែង ក្នុងនោះផ្តោតសំខាន់លើទំនិញពីប្រទេសថៃដែលឆ្លងកាត់ច្រកព្រំដែនប្រទេសឡាវចូលមកប្រទេសកម្ពុជា។

លោក សរ សុពុត្រា អភិបាលខេត្តស្ទឹងត្រែងបានគូសបញ្ជាក់ថា បើទោះបីជាមានបញ្ហានៅតាមព្រំដែនកម្ពុជាថៃ តែទំនិញថៃមួយចំនួន (មិនស្ថិតនៅក្នុងបញ្ជីហាមឃាត់) នៅតែអាចបន្តនាំចូលមកប្រទេសកម្ពុជាតាមរយៈច្រកព្រំដែនឡាវជាប់ខេត្តស្ទឺងត្រែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា រដ្ឋាភិបាលមិនអាចហាមឃាត់ការនាំចូលទំនិញពីថៃបានទាំងស្រុងនោះទេ គឺដោយសារកម្ពុជាជាសមាជិករបស់អង្គការពាណិជ្ជកម្មពិភពលោក (WTO) និងអាស៊ាន។

ប្រសិនបើកម្ពុជាបដិសេធទំនិញពីប្រទេសជាសមាជិក កម្ពុជានឹងត្រូវទទួលទណ្ឌកម្មដែលនឹងធ្វើឱ្យប៉ះពាល់ដល់សេដ្ឋកិច្ចជាតិ ខណៈពេលដែលប្រទេសជាតិកំពុងមមាញឹកក្នុងការការពារព្រំដែន និងដោះស្រាយបញ្ហាជនភៀសសឹក។

យ៉ាងណាមិញ លោកអភិបាលខេត្តបានលើកឡើងពីវិធានការក្នុងការគ្រប់គ្រងទំនិញនាំចូល ត្រូវតែទំនិញស្របច្បាប់ដែលត្រូវបង់ពន្ធចូលថវិកាជាតិ។ ផ្ទុយទៅវិញចំពោះទំនិញដែលនាំចូលតាមច្រកខុសច្បាប់ អាជ្ញាធរនឹងធ្វើការចាប់កម្ទេច ឬដុតចោល និងអនុវត្តទោសលើអ្នកនាំចូលថែមទៀត។

បន្ថែមពីនេះលោកផ្តល់ជាយោបល់ដល់ជនរួមជាតិថា «អាវុធដ៏មានប្រសិទ្ធភាពបំផុតរបស់ប្រជាជនកម្ពុជាក្នុងការទប់ស្កាត់ទំនិញពីប្រទេសឈ្លានពាន គឺការធ្វើពហិការមិនទិញ និងមិនប្រើប្រាស់។ ប្រសិនបើប្រជាជនឈប់ប្រើប្រាស់ អ្នកនាំចូលនឹងមិនអាចនាំចូលមកទុកឱ្យខាតបង់ឡើយ ហើយវានឹងបាត់ទៅដោយឯកឯង»។

លោកបានរំលឹកពីមេរៀនប្រវត្តិសាស្ត្រ ដែលពលរដ្ឋត្រូវចងចាំដើម្បីកុំឱ្យធ្លាក់ទៅក្នុងស្ថានភាពឯកោ ឬការបិទខ្ទប់សេដ្ឋកិច្ចដូចកាលពីក្រោយឆ្នាំ ១៩៧៩។

លោកថា ស្មារតីជាតិនិយមគួរតែត្រូវបានប្រើប្រាស់ដើម្បីប្រែក្លាយការឈឺចាប់ ទៅជាការខិតខំប្រឹងប្រែងកសាង និងការពារប្រទេសជាតិវិញ។

ពាក់ព័ន្ធការនាំទំនិញឆ្លងកាត់ច្រកត្រពាំងក្រៀលក្នុងខេត្តស្ទឹងត្រែងជាប់ខេត្តចម្ប៉ាសាក់របស់ប្រទេសឡាវ លោក ឡាច ប៊ុនឡុង ប្រធានស្នាក់ការត្រួតពិនិត្យច្រកទ្វារព្រំដែនអន្តរជាតិត្រពាំងក្រៀលបានប្រាប់កម្ពុជាថ្មីថា ក្រោយកើតមានការបិទខ្ទប់ព្រំដែនកម្ពុជាថៃ លោកទទួលស្គាល់មានការហូរចូលទំនិញថៃមួយចំនួនតាមច្រកត្រពាំងក្រៀល ដោយឆ្លងកាត់ពីប្រទេសឡាវ។

យ៉ាងណាមិញលោកថា សន្ទុះក្នុងការនាំចូលបានថយចុះយ៉ាងខ្លាំង ខណៈពលរដ្ឋកម្ពុជាបានធ្វើពហិការទំនិញថៃដែលធ្វើឲ្យទំនិញថៃថយចុះការគាំទ្រ និងស្ទើរតែឈានទៅកាត់បន្ថយការនាំចូលទាំងស្រុង៕