ប្រធាន​ IAEA ជំរុញឲ្យ​គ្រប់ភាគី​អត់ធ្មត់ ក្រោយគ្រាប់​ផ្លោងវាយប្រហារចំរោងចក្រនុយក្លេអ៊ែរ​អ៊ីរ៉ង់

អ្នកឃ្លាំមើលកម្មវិធី​​នុយក្លេអ៊ែររបស់អង្គការសហប្រជាជាតិ (UN) លោក Rafael Grossi នៅថ្ងៃពុធទី១៨មីនានេះ បានអំពាវនាវឲ្យគ្រប់ភាគីអត់ធ្មត់​យ៉ាង​ខ្លាំង​បំផុត​​ ដើម្បីចៀសវាងហានិភ័យនៃគ្រោះថ្នាក់នុយក្លេអ៊ែរ បន្ទាប់ពីអាជ្ញាធរអ៊ីរ៉ង់បានរាយការណ៍ពីផលប៉ះពាល់នៃគ្រាប់ផ្លោង ដែលវាយប្រហារក្បែររោងចក្រថាមពលនុយក្លេអ៊ែរ កំពុងដំណើរការតែមួយគត់នៅក្នុងប្រទេស​អ៊ីរ៉ង់​​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារថាមពលអាតូមិកអន្តរជាតិ​ (IAEA) ត្រូវបានជូនដំណឹងដោយ​ភាគី​​អ៊ីរ៉ង់ថា គ្រាប់ផ្លោងមួយបានវាយប្រហារ​​បរិវេណរោងចក្រ Bushehr NPP កាលពីល្ងាចថ្ងៃអង្គារ។ នេះបើយោងតាមការបង្ហោះនៅលើប្រព័ន្ធផ្សព្វផ្សាយសង្គមរបស់ទីភ្នាក់ងារដែលមានមូលដ្ឋាននៅទីក្រុងវីយែន។ ប៉ុន្តែមិនមានការខូចខាតដល់រោងចក្រ ឬរបួសដល់បុគ្គលិកណាម្នាក់ឡើយ។

លោក Rafael Grossi ប្រធានទីភ្នាក់ងារនៃថាមពលអាតូមិកអន្តរជាតិ (IAEA) បាន​គូសបញ្ជាក់សារជាថ្មីនូវការអំពាវនាវរបស់លោក សូមឲ្យអត់ធ្មត់ខ្ពស់បំផុត នៅក្នុងអំឡុងពេលជម្លោះមួយនេះ។ ជាពិសេស គឺដើម្បីចៀសវាង ហានិភ័យ​នៃគ្រោះថ្នាក់នុយក្លេអ៊ែរ។

ទីក្រុងតេហេរ៉ង់បានស្ថិតនៅក្រោមទណ្ឌកម្មដ៏ធ្ងន់ធ្ងររបស់អាមេរិកចាប់តាំងពីឆ្នាំ ២០១៨ នៅពេលដែលទីក្រុងវ៉ាស៊ីនតោន បានដកខ្លួនចេញពីកិច្ចព្រមព្រៀងមួយដែលផ្តល់ការបន្ធូរបន្ថយទណ្ឌកម្ម​លើ​ប្រទេស​អ៊ីរ៉ង់ ជាថ្នូរនឹងការទប់ស្កាត់សកម្មភាព​នុយក្លេអ៊ែររបស់ខ្លួនដែលត្រូវបានរចនាឡើងដើម្បីការពារខ្លួនពីការអភិវឌ្ឍក្បាលគ្រាប់បរមាណូ។ យ៉ាងណា អ៊ីរ៉ង់តែងតែបដិសេធមហិច្ឆតាណាមួយក្នុងការអភិវឌ្ឍអាវុធនុយក្លេអ៊ែរ ដោយលើកហេតុផលថា សកម្មភាពរបស់ខ្លួនគឺសន្តិភាពទាំងស្រុង៕

អត្ថបទ៖ សាង ស្រីល័ក្ខ