ត្រៀមទូរស័ព្ទដៃ! ចុងសប្តាហ៍នេះ ក្រសួងទេសចរណ៍ បើកប្រកួតថតវីដេអូខ្លីពីព្រឹត្តិការណ៍ “សមរាត្រីអង្គរ”

ក្រសួងទេសចរណ៍ បានប្រកាសបើកការប្រកួតថតវីដេអូខ្លី ដើម្បីផ្តិតយកភាពអស្ចារ្យនៃព្រឹត្តិការណ៍ “សមរាត្រីអង្គរ” ដែលនឹងកើតមានចន្លោះថ្ងៃទី២១-២៣ ខែមីនា តាមរយៈកាមេរ៉ាទូរស័ព្ទដៃ ក្រោមប្រធានបទ «អច្ឆរិយភាពអង្គរ» ជាមួយលក្ខខណ្ឌតម្រូវមួយចំនួន។ ក្នុងនោះ ក្រសួងក៏បានកំណត់យកជ័យលាភីចំនួន៥ ជាមួយរង្វាន់ជាទឹកប្រាក់ពី ៦០មុឺនរៀល ដល់ ២លានរៀល ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះមិនមែនជាលើកទី១ទេ សម្រាប់ការប្រកួតផ្តិតយករូបភាព នៃព្រឹត្តិការណ៍ដ៏កម្រនេះ។ ឆ្លៀតក្នុងឱកាសនេះ ក្រសួងទេសចរណ៍បានរៀបចំឱ្យមានការប្រកួតថតវីដេអូខ្លី ក្រោមប្រធានបទ «អច្ឆរិយភាពអង្គរ» ឡើង ដើម្បីទាក់ទាញយុវជន និងសាធារណជនក្នុងការចូលរួមថតវីដេអូពីព្រឹត្តិការណ៍សមរាត្រី ខណៈនេះមិនមែនជាលើកទី១ សម្រាប់ការប្រកួតផ្តិតយករូបភាពនៃព្រឹត្តិការណ៍ដ៏កម្រនេះ។

យោងតាមសេចក្តីជូនដំណឹង ការប្រកួតនឹងប្រព្រឹត្តទៅក្នុងអំឡុងថ្ងៃទី២១ ដល់ថ្ងៃទី២៣ ខែមីនា ឆ្នាំ២០២៦ ដោយបេក្ខជនត្រូវប្រើប្រាស់ទូរស័ព្ទដៃថតវីដេអូផ្ទាល់ ដោយមានលក្ខខណ្ឌតម្រូវដូចជា៖
១. ត្រូវស្នើសុំការចូលរួមប្រកួតតាមរយ: QR Code ។
២. វីដេអូត្រូវតែថតជាមួយទូរសព្ទដៃ ។
៣. វីដេអូត្រូវមានរយៈពេលចន្លោះ ១:៣០នាទី-២:០០នាទី
៤. ត្រូវផ្ញើវីដេអូសម្រេច ដោយភ្ជាប់ជាមួយឈ្មោះតាមរយៈ https://bit.ly/VideoContestEquinoxAngkor ។

ក្រសួងបញ្ជាក់ដែរថា ចំពោះរយៈពេលនៃការទទួលវីដេអូ មានចំនួន២ថ្ងៃ ចាប់ពីថ្ងៃទី២៣ ដល់ថ្ងៃទី២៤ ខែមីនា ឆ្នាំ២០២៦។ ឯការប្រកាសលទ្ធផល គឺនៅថ្ងៃទី២៦ ខែមីនា ឆ្នាំ២០២៦។

ការប្រកួតនេះ នឹងជ្រើសរើសជ័យលាភីចំនួន ៥រូប ដែលនឹងទទួលបានរង្វាន់ជាទឹកប្រាក់ចាប់ពី ៦០ម៉ឺនរៀល ដល់ ២លានរៀល។ ឯការវាយតម្លៃធ្វើឡើងដោយគណៈកម្មការជាអ្នកជំនាញថតរូប ដើម្បីធានាបាននូវគុណភាព និងភាពត្រឹមត្រូវនៃលទ្ធផល ក្នុងនោះរួមមាន លោក ឡាង សុលីណា អគ្គនាយករង នៃក្រសួងទេសចរណ៍ និងជាអ្នកជំនាញថតរូបមានបទពិសោធ ២០ឆ្នាំ និងលោក យីន ពិសិដ្ឋ អ្នកជំនាញថតរូបដែលមានបទពិសោធជាង ១០ឆ្នាំ ។

ក្រសួងទេសចរណ៍រំពឹងដែរថា កម្មវិធីនេះនឹងរួមចំណែកលើកស្ទួយការផ្សព្វផ្សាយ តំបន់អង្គរ ដែលជាមរតកវប្បធម៌ពិភពលោក និងជំរុញការចូលរួមរបស់យុវជនក្នុងការបង្កើតមាតិកាឌីជីថល ដើម្បីបង្ហាញអត្តសញ្ញាណជាតិទៅកាន់អន្តរជាតិ។ សម្រាប់ព័ត៌មានផ្សេងៗ អាចទំនាក់ទំនងតាមរយៈលេខ ០៦១ ៨៧៩ ៥៨៤ ។

ព្រឹត្តិការណ៍សមរាត្រីអង្គរ គឺជាបាតុភូតធម្មជាតិដ៏កម្រ ជាវេលាដែលព្រះអាទិត្យរះត្រង់កំពូលប្រាង្គនៃប្រាសាទអង្គរវត្ត មិនត្រឹមបង្កើតទិដ្ឋភាពដ៏អស្ចារ្យ តែក៏ឆ្លុះបង្ហាញពីសិល្បៈស្ថាបត្យកម្មបុរាណ និងចំណេះដឹងវិទ្យាសាស្ត្ររបស់បុព្វបុរសខ្មែរ ដែលរៀបចំលំនាំទំនើប អាចកំណត់ទីតាំងដែលព្រះអាទិត្យរះនៅចំណុចប្រាង្គនេះ ជាប្រចាំឆ្នាំ។

តួយ៉ាង បាតុភូតនេះ តែងកើតឡើង ២ដងរៀងរាល់ឆ្នាំ គឺនៅរដូវប្រាំង (មីនា) និង រដូវវស្សា (កញ្ញា) ខណៈបានក្លាយជាសក្តានុពលទេសចរណ៍ក្នុងការទាក់ទាញភ្ញៀវទេសចរជាតិ និងអន្តរជាតិ៕