យោធាចិន​បង្ហាញ​ការ​ចាក់​ប្រេង​លើអាកាស​ដោយ​ប្រព័ន្ធ AI ក្រោយ​យន្តហោះអាមេរិកធ្លាក់​

យោងតាមកាសែត SCMP កងទ័ពរំដោះប្រជាជនចិន (PLA) បានណែនាំប្រព័ន្ធចាត់តាំងភារកិច្ចជំនួយបញ្ញាសិប្បនិម្មិត (AI) សម្រាប់យន្តហោះដឹកប្រេងឥន្ធនៈតាមផ្លូវអាកាសក្នុងប្រទេសចិន ប៉ុន្មានថ្ងៃបន្ទាប់ពីឧបទ្ទវហេតុ​នៃការ​បាញ់​ធ្លាក់​យន្តហោះដឹកប្រេងតាមអាកាសរបស់យោធាអាមេរិកនៅមជ្ឈិមបូព៌ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធនេះមានឈ្មោះថា «ប្រព័ន្ធគ្រប់គ្រងតំបន់ចាក់ប្រេងតាមអាកាស» ត្រូវបានបង្កើតឡើងដោយអ្នកបច្ចេកទេសមកពីកងទ័ពអាកាស PLA ហើយបានសាកល្បងជាលើកដំបូងក្នុងអំឡុងពេលហ្វឹកហាត់នៅចុងឆ្នាំមុន។ ជាពិសេស វាអាចតាមដានស្ថានភាពដែនអាកាសជាក់ស្តែង និងប្រើប្រាស់ក្បួនដោះស្រាយដែលភ្ជាប់មកជាមួយ ដើម្បីគណនាកម្រិតប្រេងតាមអាកាសដោយស្វ័យប្រវត្តិសម្រាប់យន្តហោះដែលចូលរួមទាំងអស់នៅក្នុងតំបន់។

ប្រព័ន្ធនេះក៏មានគោលបំណងបង្កើនប្រសិទ្ធភាព និងសុវត្ថិភាពនៃប្រតិបត្តិការចាក់ប្រេងតាមអាកាសក្នុងប្រទេសចិន ដោយប្រើប្រាស់ទិន្នន័យពេលវេលាជាក់ស្តែង និងក្បួនដោះស្រាយស្វ័យប្រវត្តិ។ ដោយផ្អែកលើកម្រិតប្រេង សមត្ថភាពដែនអាកាស និងរយៈពេលហោះហើររបស់យន្តហោះនីមួយៗ ប្រព័ន្ធនេះបង្កើតផែនការផ្គូផ្គងដ៏ល្អបំផុតរវាងយន្តហោះដឹកប្រេង និងយន្តហោះចម្បាំង ដោយចេញអនុសាសន៍តាមតម្រូវការដល់អ្នកបើកយន្តហោះ។

លោក Yu He មន្ត្រីកងទ័ពអាកាស PLA ដែលចូលរួមក្នុងកម្មវិធីនេះ បានប្រាប់កាសែតរដ្ឋថា មុខងារការចាត់តាំងភារកិច្ចឆ្លាតវៃ ផ្តល់នូវដំណោះស្រាយដែលមានភាពត្រឹមត្រូវខាងវិទ្យាសាស្ត្រ និងមានប្រសិទ្ធភាពខ្ពស់ ដែលអាចឲ្យមានប្រសិទ្ធភាពខ្ពស់បំផុតក្នុងការចាក់ប្រេងឥន្ធនៈតាមអាកាស។

ទោះជាយ៉ាងណា ការប្រកាសនេះបានកើតឡើងប៉ុន្មានថ្ងៃបន្ទាប់ពីយន្តហោះ Boeing KC 135 របស់កងទ័ពអាកាសអាមេរិកបានធ្លាក់នៅភាគខាងលិចប្រទេសអ៊ីរ៉ាក់ ក្នុងអំឡុងពេលប្រតិបត្តិការ Epic Fury របស់អាមេរិកប្រឆាំងនឹងអ៊ីរ៉ង់ ដោយសម្លាប់សមាជិកនាវិកទាំង៦នាក់នៅក្នុងហេតុការណ៍មួយនេះ៕

អត្ថបទ៖ សាង ស្រីល័ក្ខ