លោក តូ ឡឹម ត្រៀម​ក្ដាប់​តំណែង​កំពូល​២​ក្នុង​ពេល​តែ​មួយ ស្រដៀង​គំរូ​មេ​ដឹកនាំ​ចិន

មេដឹកនាំកំពូល លោក តូ ឡឹម (To Lam) ត្រូវបានគេរំពឹងយ៉ាងមុតមាំថានឹងក្លាយជា «ប្រធានាធិបតី» ថ្មីរបស់ប្រទេសវៀតណាម នៅក្នុងសម័យប្រជុំរដ្ឋសភាខាងមុខនេះ។ នេះ​បើ​យោង​តាម​​ទីភ្នាក់ងារ​ព័ត៌មាន​រ៉យទ័រ ចុះ​ផ្សាយ​ថ្ងៃទី​២៣​មីនា​២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការត្រៀមឡើងកាន់តំណែងកំពូលនេះបានកើតឡើង បន្ទាប់ពីបក្សកុម្មុយនិស្តវៀតណាមបានទទួលជ័យជម្នះយ៉ាងធំធេងក្នុងការបោះឆ្នោត ដោយក្ដោបក្ដាប់អាសនៈសភារហូតដល់៤៨២ ក្នុងចំណោម៥០០អាសនៈ ឬស្មើនឹងជិត ៩៧% នៃអាសនៈសរុប។

ការដែលលោក តូ ឡឹម គ្រោងនឹងកាន់តំណែងជាប្រធានាធិបតីផង និងជាអគ្គលេខាធិការបក្សផង (ដែលលោកបានទទួលតំណែងតាំងពីខែមករា) នឹងធ្វើឲ្យ​រចនាសម្ព័ន្ធដឹកនាំរបស់វៀតណាមដើរតាមគំរូរបស់ប្រទេសចិន។ នៅក្នុងគំរូនេះ មេដឹកនាំតែម្នាក់គឺជាអ្នកកាន់កាប់អំណាចកំពូលទាំងផ្នែកបក្ស និងផ្នែករដ្ឋក្នុងពេលតែមួយ។ សមាជិកសភានឹងធ្វើការបញ្ជាក់ជាផ្លូវការលើតំណែងមេដឹកនាំរដ្ឋថ្មីៗ រួមទាំងនាយករដ្ឋមន្ត្រីផងដែរ នៅក្នុងសម័យប្រជុំដែលនឹងចាប់ផ្តើមនៅថ្ងៃទី៦ខែមេសាខាងមុខ។

ការបោះឆ្នោតលើក​​នេះមានចំនួនអ្នកទៅបោះឆ្នោតលើសពី ៩៩ភាគរយ ដែលជាអត្រាខ្ពស់ដូចអាណត្តិកន្លងមកដែរ។ ការពង្រឹងអំណាចនយោបាយនេះ កើតឡើងស្របពេលដែលវៀតណាមកំពុងដោះស្រាយផលប៉ះពាល់លើពាណិជ្ជកម្មសកល និងទីផ្សារថាមពល ដែលបណ្តាលមកពីវិបត្តិនៅមជ្ឈិមបូព៌ា៕

ប្រែសម្រួល៖ ឈាង