ព័ត៌មានអន្ដរជាតិ

អ៊ីស្រាអែលវាយប្រហារនៅលីបង់ បណ្តាលឲ្យស្លាប់និងរបួសកងកម្លាំងរក្សាសន្តិភាព

បានផុស

៣ សប្តាហ៍ មុន

នៅ

ថ្ងៃចន្ទ ៣០ មីនា ២០២៦

ដោយ

អគ្គលេខាធិការអង្គការសហប្រជាជាតិ (UN) លោក Antonio Guterres បានថ្កោលទោសយ៉ាងខ្លាំង ចំពោះការសម្លាប់កងកម្លាំងរក្សាសន្តិភាពឥណ្ឌូណេស៊ីម្នាក់នៃកងកម្លាំងបណ្តោះអាសន្នរបស់អង្គការសហប្រជាជាតិនៅលីបង់ (UNIFIL) អំឡុងមានភាពតានតឹង នៅថ្ងៃអាទិត្យរវាងអ៊ីស្រាអែល និងក្រុមហេសបូឡា។

យោងតាម TRT World ផ្សាយថ្ងៃទី៣០ ខែមីនា លោក Antonio សរសេរលើបណ្តាញសង្គម X ថា៖«នេះគ្រាន់តែជាឧប្បត្តិហេតុមួយក្នុងចំណោមឧប្បត្តិហេតុថ្មីៗមួយចំនួនដែលបានធ្វើឱ្យប៉ះពាល់ដល់សុវត្ថិភាព និងសន្តិសុខរបស់កងកម្លាំងរក្សាសន្តិភាព»។

ប្រធានអង្គការសហប្រជាជាតិរូបនេះ បានអំពាវនាវដល់គ្រប់ភាគីទាំងអស់ឱ្យគោរពច្បាប់អន្តរជាតិ ធានាសុវត្ថិភាព និងសន្តិសុខរបស់បុគ្គលិក ជាពិសេសទ្រព្យសម្បត្តិរបស់អង្គការសហប្រជាជាតិ។

កងកម្លាំងរក្សាសន្តិភាពរបស់អង្គការសហប្រជាជាតិ។ រូបភាព៖ Reuters

នៅមុននេះបន្តិចកងកម្លាំងបណ្តោះអាសន្នរបស់អង្គការសហប្រជាជាតិនៅលីបង់ (UNIFIL) លើកឡើងក្នុងសេចក្តីថ្លែងការណ៍មួយថា កងកម្លាំងរក្សាសន្តិភាពម្នាក់ត្រូវបានសម្លាប់យ៉ាងសោកសៅ កាលពីថ្ងៃអាទិត្យ ពេលដែលគ្រាប់ផ្លោងមួយបានផ្ទុះនៅទីតាំង UNIFIL ជិតភូមិ Adchit al-Qusayr ភាគខាងត្បូងប្រទេសលីបង់ ចំណែកម្នាក់ទៀតរងរបួសយ៉ាងធ្ងន់ធ្ងរ។

យ៉ាងណា UNIFIL ឱ្យដឹងថា ខ្លួនមិនទាន់ដឹងពីប្រភពដើមនៃគ្រាប់ផ្លោងនោះទេ។ កងកម្លាំងបន្តថា៖ « យើងបានចាប់ផ្តើមការស៊ើបអង្កេត ដើម្បីកំណត់ពីភស្តុតាងទាំងអស់»។

ចំណែកក្រសួងការបរទេសឥណ្ឌូនេស៊ីនិយាយថា៖ «ការបាញ់កាំភ្លើងធំដោយប្រយោល នៅជិតទីក្រុង Adchit al Qusayr សម្លាប់កងកម្លាំងរក្សាសន្តិភាពម្នាក់ និងរបួសបីនាក់»។

ប្រទេសឥណ្ឌូនេស៊ីបានថ្កោលទោសយ៉ាងខ្លាំងចំពោះឧប្បត្តិហេតុនេះ ហើយអំពាវនាវឱ្យមានការស៊ើបអង្កេត ដោយបន្ថែមថាសុវត្ថិភាព និងសន្តិសុខរបស់កងកម្លាំងរក្សាសន្តិភាពអង្គការសហប្រជាជាតិត្រូវតែគោរពនិងធានាឱ្យមានសុវត្ថិភាពគ្រប់ពេលវេលា៕

ប្រែសម្រួល៖ ណឺ មិនា