ត្រាំ គំរាមជាថ្មីថា អ៊ីរ៉ង់ នឹងត្រូវបំផ្លិចបំផ្លាញកាន់តែមហន្តរាយ បើមិនព្រមព្រៀង

ប្រធានាធិបតីអាមេរិក ដូណាល់ ត្រាំ នៅតែបោះពាក្យសម្តីធ្ងន់ៗទៅកាន់ប្រទេសអ៊ីរ៉ង់ ដោយឥឡូវបានគំរាមជាថ្មីទៀតថា បើទីក្រុងតេហេរ៉ង់ នឹងរងការបំផ្លិចបំផ្លាញកាន់តែមហន្តរាយបើមិនឈានដល់កិច្ចព្រមព្រៀងណាមួយទេនោះ។

តាមរយៈសារបង្ហោះលើបណ្តាញសង្គម Truth Social កាលពីថ្ងៃចន្ទទី៣០ខែមីនាឆ្នាំ២០២៦ ប្រមុខសេតវិមានសរសេរថា លោកនឹងកម្ទេចហេដ្ឋារចនាសម្ព័ន្ធថាមពលដ៏សំខាន់របស់អ៊ីរ៉ង់ ប្រសិនបើមិនសម្រេចបាននូវកិច្ចព្រមព្រៀងណាមួយ ក្នុងពេលឆាប់ៗនេះទេ។ ទីក្រុងតេហេរ៉ង់ នឹងរងការបំផ្លិចបំផ្លាញកាន់តែមហន្តរាយថែមទៀត បើច្រកសមុទ្រ Hormuz មិនបើកឡើងវិញជាបន្ទាន់ទេនោះ។

លោកគំរាមខ្លាំងៗថា បើអ្វីៗមិនសម្រេចបានទេ សហរដ្ឋអាមេរិកនឹងកម្ទេចឲ្យខ្ទេចហ្មត់នូវរោងចក្រផលិតអគ្គិសនី អណ្តូងប្រេង និងកោះ Kharg ហើយទីក្រុងវ៉ាស៊ីនតោន ក៏នឹងពិចារណាវាយប្រហារលើហេដ្ឋារចនាសម្ព័ន្ធសំខាន់ៗផ្សេងទៀត រួមទាំងរោងចក្រចម្រោះទឹកស្អាតទាំងអស់ ផងដែរ។

រឿងនេះកើតឡើងបន្ទាប់ពីប្រធានាធិបតីអាមេរិក សារភាពថា លោកពិតជាចង់បានប្រេងរបស់អ៊ីរ៉ង់មែន ហើយអាចឈានទៅដល់ការរឹបអូសយកកោះ Kharg តែម្តង។

ក្នុងកិច្ចសម្ភាសន៍ជាមួយ Financial Times កាលពីថ្ងៃអាទិត្យទី២៩ខែមីនាឆ្នាំ២០២៦ ត្រាំ និយាយថា ជម្រើសដែលលោកចូលចិត្តបំផុត គឺការយកប្រេង។ 

លោកត្រាំប្រាប់ថា៖ «និយាយឲ្យត្រង់ទៅ អ្វីដែលខ្ញុំចូលចិត្តបំផុត គឺការយកប្រេងនៅក្នុងប្រទេសអ៊ីរ៉ង់ ប៉ុន្តែមានមនុស្សល្ងង់ខ្លះនៅឯសហរដ្ឋអាមេរិកនិយាយថា ហេតុអ្វីបានជាលោកធ្វើបែបហ្នឹង? ប៉ុន្តែពួកគេទេដែលជាមនុស្សល្ងង់នោះ»។

សូមជម្រាបជាថ្មី យុទ្ធនាការយោធារបស់អាមេរិក និងអ៊ីស្រាអែល ប្រឆាំងអ៊ីរ៉ង់ មានរយៈពេលជាងមួយខែហើយ ខណៈ​គោលដៅសំខាន់បំផុតបានងាក​​ទៅរក​ «កោះ Kharg» ដែលជាកោះផ្កាថ្ម​ដ៏​តូចមួយ ប៉ុន្តែជាដង្ហើមសេដ្ឋកិច្ចរបស់អ៊ីរ៉ង់ ដោយសារវាជាកន្លែងដែលនាំចេញប្រេងរហូតដល់ ៩០% នៃប្រទេសទាំងមូល៕

អត្ថបទ៖ សុខ សុវណ្ណ