ព័ត៌មានអន្ដរជាតិ

រុស្ស៊ីគំរាមប្រទេសណាដែលផ្តល់សិទ្ធិឲ្យអ៊ុយក្រែនប្រើជាមូលដ្ឋានវាយប្រហារកំពង់ផែបាល់ទិក

បានផុស

២ ខែ មុន

នៅ

ថ្ងៃពុធ ១ មេសា ២០២៦

ដោយ

មន្ត្រីនៃវិមានប្រធានាធិបតីរុស្ស៊ី ដែលគេដឹងថា វិមានក្រឹមឡាំង បាននិយាយនៅថ្ងៃទី៣១ខែមីនាថា រុស្ស៊ីនឹងសឹកវិញភ្លាមៗទៅលើប្រទេសដទៃណាមួយដែលផ្តល់សិទ្ធិឲ្យអ៊ុយក្រែនប្រើប្រាស់ដែនអាកាសររបស់ពួកគេ ដើម្បីបើកការវាយប្រហារដោយយន្តហោះដ្រូន ទៅលើកំពង់ផែរបស់រុស្ស៊ីនៅតំបន់បាល់ទិក។ នេះបើយោងតាមទៅប្រភពដែលស្រង់សម្តីពីភ្នាក់ងារព័ត៌មាន Reuters។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា៖«ប្រសិនបើដែនអាកាស [ប្រទេសណាមួយ] ត្រូវបានផ្តល់ឲ្យដើម្បីអនុវត្តសកម្មភាពអរិភាព និងភេរវកម្មប្រឆាំងនឹងសហព័ន្ធរុស្ស៊ី នេះនឹងជំរុញឲ្យពួកយើងធ្វើការសន្និដ្ឋានសមស្រប ហើយចាត់វិធានការសងសឹកដែលត្រូវគ្នាភ្លាម»»។

លោក Peskov បានលើកឡើងដែរថា ជាក់ស្ដែង យោធារុស្ស៊ីកំពុងតាមដាន និងវិភាគស្ថានការណ៍យ៉ាងដិតដល់ ហើយកំពុងណែនាំអនុសាសន៍សម្រាប់វិមានក្រឹមឡាំងពិចារណា។ នៅក្នុងនោះដែរ កិច្ចខិតខំប្រឹងប្រែងជាច្រើនកំពុងត្រូវបានធ្វើឡើងដើម្បីការពារហេដ្ឋារចនាសម្ព័ន្ធសំខាន់ៗទាំងមូល ប៉ុន្តែមិនអាចធានាការការពារ ១០០% ប្រឆាំងនឹងការវាយប្រហារភេរវកម្មនោះទេ។

ដូចគ្នានេះដែរនៅក្នុងការចែករំលែកមួយតាមបណ្តាញសង្គម កាលពីថ្ងៃទី ៣១មីនា លោក Peskov បាននិយាយថា រុស្ស៊ីមិនទទួលយកកិច្ចព្រមព្រៀងឈប់បាញ់បណ្តោះអាសន្ននៅក្នុងជម្លោះអ៊ុយក្រែនទេ ហើយបានអំពាវនាវឲ្យមានសន្តិភាពរយៈពេលវែងនៅក្នុងប្រទេសអ៊ុយក្រែន។

ក្នុងរយៈពេលមួយខែកន្លងមកនេះ អ៊ុយក្រែនបានបង្កើនការវាយប្រហារលើហេដ្ឋារចនាសម្ព័ន្ធនាំចេញប្រេងរបស់រុស្ស៊ី ដោយបានធ្វើការវាយប្រហារដោយយន្តហោះដ្រូនដ៏ខ្លាំងក្លាបំផុតនៅក្នុងជម្លោះជាង ៤ឆ្នាំ ដោយផ្តោតលើកំពង់ផែបាល់ទិកដូចជា Ust-Luga និង Primorsk ជាដើម៕

អត្ថបទ៖ សាង ស្រីល័ក្ខ