ព័ត៌មានអន្ដរជាតិ

ច្រក Hormuz ក្លាយជាចំណុចក្តៅបំផុតសាកល្បងបទឈប់បាញ់អាមរិកនិងអ៊ីរ៉ង់ ខណៈអ៊ីស្រាអែលជាអ្នកបំបែក

បានផុស

៣ សប្តាហ៍ មុន

នៅ

ថ្ងៃព្រហស្បតិ៍ ៩ មេសា ២០២៦

ដោយ

មន្ត្រីសេតវិមានរបស់ប្រធានាធិបតីសហរដ្ឋអាមេរិក បានលើកឡើងថា អ៊ីរ៉ង់ត្រូវតែបើកច្រកសមុទ្រ Hormuz ឱ្យឆាប់រហ័សនិងដោយសុវត្ថិភាព បន្ទាប់ពីមានរបាយការណ៍ថា ផ្លូវទឹកនាវាចរណ៍ប្រេងយុទ្ធសាស្ត្រនេះត្រូវបានបិទវិញដោយភាគីអ៊ីរ៉ង់ ទោះបីជាបទឈប់បាញ់រវាងសហរដ្ឋអាមេរិកនិងអ៊ីរ៉ង់ចែងច្បាស់លាស់ក៏ដោយ។

មិនតែប៉ុណ្ណោះ មន្ត្រីទីក្រុងវ៉ាស៊ីនតោន ក៏បានសង្កត់ធ្ងន់ថា រាល់ការបិទច្រកនេះក្នុងករណីណាមួយដែលធ្វើឡើងដោយភាគីអ៊ីរ៉ង់ ដែលបញ្ឈប់ចរាចរណ៍ផ្លូវសមុទ្រគឺនឹងមិនអាចទទួលយកបានទេ។ នេះបើយោងតាមសារព័ត៌មានអាមេរិក TIME និង euro News ផ្សាយថ្ងៃទី៩ខែមេសា ឆ្នាំ២០២៦ ស្របពេលដែលមានព័ត៌មានថា អ៊ីរ៉ង់សម្រេចបិទច្រកនេះ ដោយសារតែអ៊ីសា្រអែល មិនបញ្ឈប់ការវាយប្រហារលើប្រទេសលីបង់ ដូចមានចែកក្នុងបទឈប់បាញ់។

លោកស្រី Karoline Leavitt អ្នកនាំពាក្យសេតវិមាន។ រូបភាព៖ Reuters

លោកស្រី Karoline Leavitt អ្នកនាំពាក្យសេតវិមានប្រាប់អ្នកយកព័ត៌មានថា៖ « ការបិទច្រកនេះ[Hormuz] ក្នុងករណីណាមួយគឺមិនអាចទទួលយកបានទាំងស្រុងទេ។ ខ្ញុំនឹងបញ្ជាក់ជាថ្មីពីការរំពឹងទុករបស់ប្រធានាធិបតី និងទាមទារឱ្យច្រកសមុទ្រ Hormuz ត្រូវបានបើកឡើងវិញភ្លាមៗយ៉ាងឆាប់រហ័ស និងដោយសុវត្ថិភាព»។

ចំណុចសំខាន់មួយនៅក្នុងកិច្ចព្រមព្រៀងឈប់បាញ់រយៈពេលពីរសប្តាហ៍ គឺអ៊ីរ៉ង់នឹងអនុញ្ញាតឱ្យមានការបន្តការដឹកជញ្ជូនឡើងវិញតាមរយៈច្រកសមុទ្រ Hormuz ដោយបន្ធូរបន្ថយការរំខានដល់លំហូរប្រេងនិងឧស្ម័ន ដែលធ្វើឱ្យតម្លៃប្រេងឡើងថ្លៃនៅជុំវិញពិភពលោក។

លោកស្រី Leavitt បន្តទៀតថា៖ « លោកប្រធានាធិបតី ត្រាំ ចង់ឃើញផ្លូវទឹកនេះ [Hormuz] អាចចរាចរណ៍កប៉ាល់ដឹកប្រេងនិងអាទិភាពបន្ទាន់របស់ប្រធានាធិបតីគឺការបើកច្រកសមុទ្រឡើងវិញ ដោយគ្មានការរឹតត្បិតណាមួយឡើយ រួមទាំងការបង់ថ្លៃសេវាផងដែរ»។

ការអត្ថាធិប្បាយរបស់លោកស្រី Leavitt បានកើតឡើងបន្ទាប់ពីប្រព័ន្ធផ្សព្វផ្សាយរដ្ឋអ៊ីរ៉ង់រាយការណ៍កាលពីថ្ងៃពុធថា ទីក្រុងតេហេរ៉ង់បានបិទច្រកសមុទ្រ Hormuz ដើម្បីឆ្លើយតបទៅនឹងការវាយប្រហាររបស់អ៊ីស្រាអែលលើប្រទេសលីបង់។

គួរបញ្ជាក់ថា សកម្មភាពនេះបានកើតឡើងនៅថ្ងៃដដែល ដែលបទឈប់បាញ់រយៈពេលពីរសប្តាហ៍រវាងទីក្រុងតេហេរ៉ង់និងទីក្រុងវ៉ាស៊ីនតោនចូលជាធរមាន ដោយបញ្ចប់ការប្រយុទ្ធគ្នាជាងមួយខែនេះ៕

ប្រែសម្រួល៖ ណឺ មិនា