សម្តេចធិបតី ហ៊ុន ម៉ាណែត៖ កម្ពុជាសង្ឃឹមថាថៃបន្តគោរពកិច្ចព្រមព្រៀង GBC និងរួមចំណែកដល់ការខ័ណ្ឌសីមាព្រំដែនដោយសន្តិវិធី

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានបញ្ជាក់ថា ចាប់តាំងពីបទឈប់បាញ់នៅខែធ្នូ ឆ្នាំ២០២៥ មកទល់ពេលបច្ចុប្បន្ន ភាគីកម្ពុជា និងភាគីថៃ តែងតែប្រកាសជំហរគោរព និងអនុវត្តតាមខ្លឹមសារនៃសេចក្តីប្រកាសរួម នៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) រវាង កម្ពុជា និងថៃដែលបានធ្វើឡើងនៅថ្ងៃទី២៧ ខែធ្នូ ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយះបណ្តាញសង្គមហ្វេសបុកសម្តេចធិបតីបានលើកឡើងថា កម្ពុជាសង្ឃឹមថា ភាគីថៃនឹងបន្តគោរពយ៉ាងម៉ឺងម៉ាត់ចំពោះខ្លឹមសារនៃសេចក្តីប្រកាសរួម ជាពិសេសចំណុចទី៣ ដែលបានកំណត់ថា កិច្ចព្រមព្រៀងទាំងអស់ក្រោមសេចក្តីប្រកាសនេះ មិនត្រូវប៉ះពាល់ដល់ដំណើរការខ័ណ្ឌសីមាព្រំដែន និងព្រំដែនអន្តរជាតិរវាងប្រទេសទាំងពីរឡើយ។ ភាគីទាំងពីរបានឯកភាពប្រគល់ភារកិច្ចឱ្យគណៈកម្មការចំរុះព្រំដែន បន្តការងារវាស់វែង និងខ័ណ្ឌសីមាព្រំដែនឱ្យបានឆាប់រហ័ស ស្របតាមកិច្ចព្រមព្រៀងដែលមានស្រាប់ ដើម្បីសម្រេចបាននូវសន្តិភាពយូរអង្វែងតាមបណ្តោយព្រំដែន។

ក្នុងសារដដែល ក៏បានបញ្ជាក់ផងដែរថា ភាគីទាំងពីរនឹងប្រើប្រាស់យន្តការដែលមានស្រាប់ ដើម្បីធានាសុវត្ថិភាព និងសន្តិសុខដល់ក្រុមការងារវាស់វែងនៅលើទីតាំងជាក់ស្តែង រួមទាំងការការពារពីគ្រោះថ្នាក់មីន។ ជាមួយគ្នានេះ ការងារវាស់វែង និងខ័ណ្ឌសីមាព្រំដែននៅតំបន់ដែលមានប្រជាពលរដ្ឋរស់នៅ នឹងត្រូវផ្តល់អាទិភាពខ្ពស់ជាមុនគេ។

សម្តេចធិបតី ហ៊ុន ម៉ាណែត បានបន្ថែមថា កម្ពុជាសង្ឃឹមយ៉ាងមុតមាំថា គណៈកម្មការចំរុះព្រំដែនរបស់ប្រទេសទាំងពីរ អាចចាប់ផ្តើមអនុវត្តការងារវាស់វែងបានយ៉ាងឆាប់រហ័ស និងដោយស្មោះត្រង់ តាមស្មារតីដែលបានឯកភាពគ្នា ដើម្បីឈានទៅរកការខ័ណ្ឌសីមាព្រំដែនឱ្យបានច្បាស់លាស់ដោយសន្តិវិធី។

សម្តេចបានសង្កត់ធ្ងន់ថា ការខ័ណ្ឌសីមាព្រំដែនឱ្យបានច្បាស់លាស់ នឹងក្លាយជាមូលដ្ឋានសំខាន់សម្រាប់សន្តិភាពយូរអង្វែង និងធានាឱ្យប្រជាពលរដ្ឋរស់នៅតាមបណ្តោយព្រំដែន នៃប្រទេសទាំងពីរ អាចរស់នៅដោយសុខសាន្ត។ ក្នុងន័យនេះ កម្ពុជាបានត្រៀមខ្លួនរួចជាស្រេចសម្រាប់ដំណើរការនេះ៕