កីឡា

កីឡាការិនី ហេង ស៊ីវហ៊ាង ប្ដេជ្ញាខំប្រឹងបន្ថែមទៀតដើម្បីដណ្ដើមមេដាយជូនជាតិឲ្យបានកាន់តែច្រើន

បានផុស

៧ ថ្ងៃ មុន

នៅ

ថ្ងៃសុក្រ ១៧ មេសា ២០២៦

ដោយ

កីឡាការិនីឆ្នើមផ្នែកកីឡាជឺជីតស៊ូកម្ពុជា ហេង ស៊ីវហ៊ាង ប្ដេជ្ញាចិត្តនឹងខំប្រឹងប្រែងហ្វឹកហាត់បន្ថែមទៀតដើម្បីបង្កើនសមត្ថភាព និងដណ្ដើមមេដាយឲ្យបានកាន់តែច្រើនជូនជាតិមាតុភូមិក្នុងព្រឹត្តិការណ៍អន្តរជាតិផ្សេងៗនាពេលខាងមុខដើម្បីជាការតបស្នង។

ហេង ស៊ីវហ៊ាង និងមេដាយដែលឈ្នះ

ថ្លែងក្រោយទទួលប្រាក់រង្វាន់លើកទឹកចិត្តកីឡាការិនី ហេង ស៊ីវហ៊ាង ដឹងគុណជាខ្លាំងចំពោះរាជរដ្ឋាភិបាលកម្ពុជាដែលតែងតែលើកទឹកចិត្ត និងយកចិត្តទុកដាក់លើការអភិវឌ្ឍន៍វិស័យកីឡានៅប្រទេសកម្ពុជាកន្លងមក។ ការលើកទឹកចិត្តកន្លងទៅនេះបានធ្វើឲ្យកីឡាករ កីឡាការិនីកម្ពុជាមានភាពកក់ក្ដៅ និងទឹកចិត្តកាន់តែមោះមុតក្នុងការប្រកួតប្រជែងលើឆាកអន្តរជាតិ។

កីឡាការិនីជឺជីតស៊ូរូបនេះបន្ថែមទៀតថា ជាការតបស្នងចំពោះរាជរដ្ឋាភិបាលវិញនោះរូបគេប្ដេជ្ញាចិត្តនឹងខំប្រឹងប្រែងហ្វឹកហាត់បន្ថែមទៀតដើម្បីឲ្យមានសមត្ថភាពកាន់តែល្អឈានទៅដណ្ដើមមេដាយកម្រិតអន្តរជាតិបានច្រើនជាងនេះជូនជាតិមាតុភូមិ។

ហេង ស៊ីវហ៊ាង (កណ្ដាល)

បញ្ជាក់ដែរថា កីឡាការិនី ហេង ស៊ីវហ៊ាង ថ្មីៗនេះទើបតែចូលរួមទទួលប្រាក់រង្វាន់លើកទឹកចិត្តពីរដ្ឋាភិបាលផងដែរដល់ ១៦ប្រភេទកីឡាដែលបានឈ្នះមេដាយលើឆាកអន្តរជាតិកន្លងទៅនេះ។ ហេង ស៊ីវហ៊ាង អំឡុងឆ្នាំ២០២៥ នេះបានឈ្នះមេដាយសរុប ៨គ្រឿងមាន មាស៥ ប្រាក់៣ គ្រឿងនៃពីរព្រឹត្តិការណ៍ផ្សេងគ្នា។ ថវិកាលើកទឹកចិត្តដែលរូបគេទទួលបាននោះសរុប ១០៧លានរៀល៕