ក្រុមហ៊ុនចំនួន ២ ដេញថ្លៃបាន​គម្រោងអភិវឌ្ឍន៍មូលដ្ឋាននៅសង្កាត់ក្រចេះ

គម្រោងដេញថ្លៃសាងសង់ប្រឡាយឥដ្ឋ បង្ហូរទឹកនិងគម្រោងសាងសង់ផ្លូវបេតុង នៅក្នុងសង្កាត់ក្រចេះ ក្រុងក្រចេះ មានក្រុមហ៊ុនចំនួន ១៤ បានចូលរួមដេញថ្លៃប្រកបដោយការប្រកួតប្រជែងយ៉ាងស្វិតស្វាញ និងតម្លាភាព។

ការប្រកួតប្រជែងដេញថ្លៃ សម្រាប់គម្រោងអភិវឌ្ឍន៍នៅមូលដ្ឋានខាងលើនេះធ្វើឡើងនៅព្រឹកថ្ងៃទី២៩ ខែមេសា ឆ្នាំ​២០២៦ ក្រោមអធិបតីភាពលោកស្រី អ៊ុយ ស៊ីដែន អភិបាលរងក្រុងក្រចេះ និងលោក ឈិន លាងយី ចៅសង្កាត់ក្រចេះ និង​មានការចូលរួមពីមន្ត្រីជំនាញលទ្ធកម្មខេត្ត ក្រុមប្រឹក្សាសង្កាត់ អាជ្ញាធរភូមិ និងក្រុមហ៊ុនចំនួន ១៤ ក្រុមហ៊ុន។

លោក ឈិន លាងយី ចៅសង្កាត់ក្រចេះ បានបង្ហាញពីលទ្ធផលនៃការដេញថ្លៃសម្រាប់គម្រោងអភិវឌ្ឍន៍មូលដ្ឋាន គឺទទួល​បានភាពជោគជ័យ ដែលមានក្រុមហ៊ុនចំនួន ១៤ បានចូលរួមដេញថ្លៃ ប្រកបដោយការប្រកួតប្រជែងយ៉ាងស្វិតស្វាញ និងតម្លាភាព។

លោកបន្តថា គម្រោងអភិវឌ្ឍន៍ទាំងពីរគឺមានក្រុមហ៊ុនចំនួនពីរដែលបានប្រកួតប្រជែងនិងដេញថ្លៃបាន ក្នុងនោះសម្រាប់ផ្លូវបេតុងប្រវែង ០,៥០៥ គីឡូម៉ែត្រ ទទឹង ៥ ម៉ែត្រ គឺមានក្រុមហ៊ុនចំនួន ៧ ដាក់ពាក្យដេញថ្លៃ ហើយក្រុមហ៊ុនឈ្នះការដេញថ្លៃ៖ គឺក្រុមហ៊ុន OSP (ចម្រើនវឌ្ឍនៈ) ដែលមានតំណាងក្រុមហ៊ុន លោក មេន ម៉េងហ័ង នៅក្នុងតម្លៃទឹកប្រាក់ ១៥១,២៤៧,៥០០ រៀល។

លោក ម៉េត ម៉េងហ័ង ធ្លាប់បានចូលរួមដេញថ្លៃកាលពីលើកទី​១ ប៉ុន្តែមិនទទួលបានជោគជ័យ ដោយសារកាលនោះមាន​តែ​លោកម្នាក់ឯងគត់ដែលបានដាក់ពាក្យ ហើយលើកទី២ ការដេញថ្លៃលើកនេះត្រូវបានចាត់ទុកថាជាជោគជ័យធំធេង ដោយសារមានការចូលរួមពីក្រុមហ៊ុនច្រើន មិនមានគម្លាតតម្លៃខ្លាំងពេក និងមានភាពយុត្តិធម៌សម្រាប់គ្រប់ភាគី។

ដោយឡែក សម្រាប់គម្រោងប្រព័ន្ធប្រឡាយឥដ្ឋដោះទឹកប្រវែង ០,៤៧ គីឡូម៉ែត្រ មាត់ប្រឡាយទទឹង ៣៥០ ម.ម ជម្រៅ ៥០០ ម.ម គឺមានក្រុមហ៊ុនចំនួន ៦ បានដាក់ពាក្យដេញថ្លៃ ហើយក្រុមហ៊ុនដែលឈ្នះក្នុងការដេញថ្លៃ គឺបានទៅលើក្រុមហ៊ុន (ញឹក មុនីដែន) ដែលតំណាងក្រុមហ៊ុន លោក ស្រ៊ុន ស៊ីវន ក្នុងតម្លៃទឹកប្រាក់ចំនួន ១២៤,៦១៦,៨០០រៀល។

លោកស្រី អ៊ុយ ស៊ីដែន អភិបាលរងក្រុងក្រចេះ មានប្រសាសន៍ថា ការដែលមានក្រុមហ៊ុនចូលរួមច្រើនបែបនេះ គឺជាសញ្ញាវិជ្ជមានដែលបង្ហាញពីទំនុកចិត្ត និងភាពត្រឹមត្រូវ តម្លាភាព និងយុត្តិធម៌ ហើយអរគុណដល់ក្រុមអ្នកសារព័ត៌មាន ដែលបានចុះមកយកព័ត៌មានផ្ទាល់ ដែលនេះបង្ហាញពីភាពស្មោះត្រង់ និងតម្លាភាពនៃរដ្ឋបាលឃុំ/សង្កាត់ផងដែរ៕

អត្ថបទ៖ ប្រុញ វិធិន