លោក រូប៊ីយ៉ូ ជាប់​ក្នុង​បញ្ជី​ទណ្ឌកម្មចិន ចុះហេតុអ្វី​បាន​អាច​អម​ដំណើរ ត្រាំ ក្នុងក្រុងប៉េកាំង?

ព្រឹត្តិការណ៍ដ៏គួរឱ្យចាប់អារម្មណ៍មួយ បានកើតឡើងនៅក្នុងវិមានប្រជាជននៅទីក្រុងប៉េកាំង ខណៈដែលរដ្ឋមន្ត្រីការបរទេសអាមេរិក លោក ម៉ាកូ រូប៊ីយ៉ូ (Marco Rubio) បានបង្ហាញខ្លួនយ៉ាងក្លាហានអមដំណើរប្រធានាធិបតី ដូណាល់ ត្រាំ ក្នុងជំនួបជាមួយមេដឹកនាំចិន។ រឿងដែលធ្វើឱ្យមហាជន មានការងឿងឆ្ងល់យ៉ាងខ្លាំងនោះគឺ លោក រូប៊ីយ៉ូ ជាបុគ្គលម្នាក់ ដែលធ្លាប់ត្រូវបានរដ្ឋាភិបាលចិនដាក់ទណ្ឌកម្មចំនួនពីរលើករួចមកហើយ តាំងពីមុនពេលលោកចូលកាន់តំណែងជារដ្ឋមន្ត្រីការបរទេសមកម្ល៉េះ។

បើតាម​ការ​ចុះផ្សាយ​នា​ថ្ងៃទី​១៤ ខែ​ឧសភា នេះ របស់​សារព័ត៌មាន Al Jazeera ដើម្បីអាចសម្រួលដល់ដំណើរទស្សនកិច្ចដ៏សំខាន់នេះ និងចៀសវាងការខូចខាតដល់ទំនាក់ទំនងការទូត ភាគីចិនបានប្រើប្រាស់ «ល្បិចបច្ចេកទេស» ដ៏ឆ្លាតវៃមួយ ដើម្បីជម្នះឧបសគ្គផ្លូវច្បាប់ ដែលខ្លួនបានបង្កើតឡើង។ តាមរយៈការផ្លាស់ប្តូរអក្ខរាវិរុទ្ធឈ្មោះរបស់លោក រ៉ូប៊ីយ៉ូ នៅក្នុងឯកសារផ្លូវការ សម្រាប់ដំណើរទស្សនកិច្ចនេះ ចិនបាន «កែសម្រួល» នីតិវិធីផ្ទៃក្នុងរបស់ខ្លួន ដើម្បីឱ្យរដ្ឋមន្ត្រីការបរទេសអាមេរិកអាចមានវត្តមាន នៅក្នុងប្រទេស ដោយស្របច្បាប់តាមទម្រង់ឯកសារថ្មី។

និយាយ​ឱ្យ​ងាយយល់ គឺ​ថា ឈ្មោះ​របស់រដ្ឋមន្ត្រី​ការបទេស​អាមេរិក ត្រូវបាន​ប្ដូរ​ទៅ​ជាភាសាចិន ថា Lu biao ដែលពីមុន​ក្នុង​បញ្ជីទណ្ឌកម្ម លោកត្រូវគេសរសេរ​ឈ្មោះ​​ថា Lubi ao។

ការប្រើប្រាស់ល្បិចកលតាមបែបការទូតបែបនេះ បង្ហាញឱ្យឃើញថា ទោះបីជាមានភាពតានតឹង ឬការដាក់ទណ្ឌកម្មគ្នាកន្លងមកយ៉ាងណាក៏ដោយ ក៏ទាំងអាមេរិក និងចិន នៅតែមានឆន្ទៈខ្ពស់ ក្នុងការរំលងបញ្ហាផ្ទាល់ខ្លួន ដើម្បីផ្តោតលើកិច្ចពិភាក្សាធំៗ ដែលប៉ះពាល់ដល់សេដ្ឋកិច្ច និងសន្តិសុខសកល។ ការដែលលោក រូប៊ីយ៉ូ អាចចូលរួមក្នុងជំនួបដ៏ខ្ពង់ខ្ពស់នេះ បានឆ្លុះបញ្ចាំងពីតថភាពនៃការទូត ដែលថា ផលប្រយោជន៍ជាតិ និងយុទ្ធសាស្ត្រនយោបាយ តែងតែមានទម្ងន់ធ្ងន់ជាងការប្រកាន់ខ្ជាប់នូវបញ្ជីទណ្ឌកម្មចាស់ៗ៕

ប្រែសម្រួល៖ ឈាង