​កម្ពុជា ​អនុម័ត​គម្រោងវិនិយោគចំនួន ​៣៧ ​ជាមួយទុន ​៥៧០ ​លានដុល្លារ នៅខែឧសភា​

កម្ពុជាទទួលបានគម្រោងវិនិយោគចំនួន ៣៧ គម្រោង ​ជាមួយទុន ៥៧០ លានដុល្លារ នៅក្នុងខែឧសភា ២០២៥ និងអាចបង្កើតការងារបាន ២៦ ពាន់កន្លែង។​

​ក្នុង​ចំណោមគម្រោងទាំង​ ៣៧ ​មានគម្រោងចំនួន​ ២៩ ត្រូវបានចុះបញ្ជីដោយក្រុម​ប្រឹក្សា​អភិវឌ្ឍន៍កម្ពុជា ខណៈ​គម្រោងដែលត្រូវបានចុះបញ្ជីដោយអនុគណៈ​កម្ម​ការ​វិនិ​យោគ​រាជធានីខេត្ត​មានចំនួន​ ៨ ​ក្នុង​ទំហំទុន​វិនិយោគ​ប្រមាណ ២៧ លាន​ដុល្លារ និងអាច​បង្កើត​ការងារ​បានប្រមាណ ២,២ពាន់កន្លែង។

លោកឧបនាយករដ្ឋមន្ត្រី​ ស៊ុន ចាន់ថុល ​អនុប្រធានទី១ ​ក្រុម​ប្រឹក្សាអភិវឌ្ឍន៍​កម្ពុជា ​មាន​ប្រ​សា​សន៍​​ថា​ រំហូរវិនិយោគមានវឌ្ឍនភាពល្អប្រសើរ ​ក្នុងនោះតំបន់សេដ្ឋកិច្ចពិសេស ​បានដើរតួនាទីសំខាន់ ក្នុងការទាក់ទាញ​វិនិយោគ ​និងជាយន្តការគន្លឹះក្នុងការជំរុញពិពិធកម្ម​ឧស្សា​ហ​កម្ម​នៅកម្ពុជា មុខសញ្ញាវិនិយោគ ​ក្នុងវិស័យឧស្សាហកម្មថ្មីៗ ​ក្រៅពីវិស័យកាត់ដេរ សម្លៀក​បំពាក់​ ស្បែកជើង និងផលិតផលធ្វើដំណើរ ភាគច្រើនប្រមូលផ្ដុំ និងមានសកម្មភាព​ក្នុងតំបន់​សេដ្ឋកិច្ច​ពិសេស ដូចជា ការផ្គុំដំឡើងយានយន្ត គ្រឿងបង្គុំយានយន្ត គ្រឿងអេឡិចត្រូនិក និងអគ្គិ​សនី។

​លោក ស៊ុន ចាន់ថុល បាន​បន្ថែមថា ​ការបន្តទទួលបានរំហូរវិនិយោគ ​មិនត្រឹមតែបង្ហាញពីស្ថិរភាព និង​កំណើន​​ប៉ុណ្ណោះ​ទេ ​ប៉ុន្តែ​ឆ្លុះ​បញ្ចាំង​អំពីទំនុកចិត្ត​របស់​វិនិយោគ​នៅ​កម្ពុជា។​

​នៅ​ក្នុង​ឆ្នាំ ​២០២៥ ​ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ៦៣០ ជាមួយនឹង​ទុន​វិនិយោគ ១០ ពាន់លានដុល្លារ ​កើនឡើងជាង ​៤០% ធៀបនឹងឆ្នាំ ២០២៤៕​

អត្ថបទ៖ ឡេង ដេត