ក្រុមផ្តាច់ខ្លួន ភាគខាងត្បូងថៃ បំផ្ទុះគ្រាប់បែក វាយប្រហារក្បួនរថយន្ត ចៅហ្វាយស្រុក ក្នុងខេត្ត Pattani 

ភាគខាងត្បូងប្រទេសថៃ កើតមានការវាយប្រហារឥតស្រាកស្រាន្តឡើយ ដោយលើកចុងក្រោយនេះ មានការបំផ្ទុះគ្រាប់បែក បន្ថែមទៀត ដែលកំណត់គោលដៅ លើចៅហ្វាយស្រុក Mayo នៃខេត្ត Pattani ប៉ុន្តែមិនបានជោគជ័យទេ។

តាមការផ្សាយរបស់ Amarin, ការវាយប្រហារ កើតឡើងនៅម៉ោង ៤:៤០នាទី រសៀលថ្ងៃព្រហស្បតិ៍ ទី១១ ខែមិថុនា ឆ្នាំ២០២៦ សំដៅលើក្បួនរថយន្ត របស់ចៅហ្វាយស្រុក លោក ​Danuch Naksanga ​ដែលធ្វើដំណើរវិលត្រឡប់ មកពីពិធីបើកកម្មវិធីប្រកួតកីឡាបាល់ទាត់ ក្នុងឃុំ Lubo Yirai។

យ៉ាងណា លោក Danuch មិនរងគ្រោះឡើយ ប៉ុន្តែគ្រាប់បែក បានបណ្តាលឲ្យមន្ត្រីប៉ូលិស ៦នាក់ ត្រូវរបួស មានធ្ងន់មានស្រាល។

នៅកន្លែងកើតហេតុ មន្ត្រីសមត្ថកិច្ច បានរកឃើញបំណែកឧបករណ៍ផ្ទុះខ្ចាត់ខ្ចាយនៅលើផ្លូវ ខណៈការស៊ើបអង្កេតបឋមបង្ហាញថា វាជាឧបករណ៍ផ្ទុះកែច្នៃ (IED) ញាត់នៅក្នុងធុងដែក ដែលមានទម្ងន់ប្រហែល ១០ គីឡូក្រាម ដោយជនល្មើសប្រើតេឡេបញ្ជាពីចម្ងាយ ដើម្បីចុចបំផ្ទុះ។

ការវាយប្រហារនេះ កើតឡើងមួយថ្ងៃប៉ុណ្ណោះ បន្ទាប់ពីជនផ្តាច់ខ្លួនមួយក្រុម មានប្រដាប់ដោយអាវុធ និងគ្រាប់បែក ក៏បានបើកការវាយប្រហារផងដែរ លើមន្ត្រីល្បាត ចំនួន ១២នាក់ នៅឧទ្យានមួយ ប៉ុន្តែក្នុងខេត្ត Narathiwat ឯណោះ។

ការវាយប្រហារ កើតឡើងនាវេលាម៉ោង ២:៤០នាទី រសៀលថ្ងៃពុធ ទី១០ ខែមិថុនា ឆ្នាំ២០២៦ នៅត្រង់ចំណុចភូមិលេខ៧ ឃុំ Riko នៃស្រុក Suai Padi។

មន្ត្រីទាំង ១២នាក់នេះ គឺមកពីក្រុមល្បាតឧទ្យាន Budo-Suai Padi ដែលត្រូវរងការបាញ់ប្រហារយ៉ាងសន្ធាប់ ពីសំណាក់ក្រុមផ្តាច់ខ្លួនមូស្លីម ប៉ុន្តែគ្មាននរណាម្នាក់ បាត់បង់ជីវិតឡើយ។

ក្នុងនោះទៀតសោត នៅខេត្ត Yala ឯណោះ, គ្រាប់បែកតាមចិញ្ចើមផ្លូវ បានផ្ទុះក្បែរសាលារៀន ក្នុងស្រុក Raman វាយប្រហាររថយន្តប៉ូលិស ធ្វើឲ្យក្រឡាប់ ប៉ុន្តែមិនមានមនុស្សស្លាប់ឡើយ ពោលគឺបណ្តាលឲ្យតែប៉ូលិស ២នាក់ ព្រមទាំងជនស៊ីវិល ម្នាក់ រងរបួសប៉ុណ្ណោះ៕

អត្ថបទ៖ សុខ សុវណ្ណ