ឣាវុធហត្ថខេត្តអំពាវនាវដល់ម្ចាស់ម៉ូតូចំនួន២២គ្រឿង ដែលបាត់ មកទំនាក់ទំនងមូលដ្ឋានកងរាជអាវុធហត្ថក្រុងប៉ោយប៉ែត

ប៉ោយប៉ែត ៖ ក្រោយ​ស្រាវជ្រាវ​រក​ឃើញ​ម៉ូតូ​ជនរងគ្រោះ ដែលបាត់ដោយសារចោរលួច​លើ​ទី​តាំង​ផ្ទះ​មួយ​កន្លែង​ក្នុងចំណោមម៉ូតូ២២គ្រឿង នៅសង្កាត់ផ្សារកណ្តាល នាថ្ងៃទី១១ មិថុនា ២០២៦នេះ ឣាវុធហត្ថខេត្តបន្ទាយមានជ័យ​បាន​អំពាវនាវ​ដល់ម្ចាស់មូតូចំនួន២២គ្រឿង ដែល​បាត់ មក​ទំនាក់ទំនង​មូលដ្ឋាន​កងរាជអាវុធហត្ថ​ក្រុងប៉ោយប៉ែត ដោយ​ភ្ជាប់​មួយ​ឯកសារមកជាមួយ។

លោក​អនុសេនីយ៍ឯក តិល តៃលីវ មេបញ្ជាការមូលដ្ឋានកងរាជអាវុធហត្ថក្រុង បាន​ឱ្យ​ដឹង​ថា កាលពីថ្ងៃទី០៥ ខែមិថុនា ឆ្នាំ២០២៦ នៅមូលដ្ឋានកងរាជអាវុធហត្ថក្រុងប៉ោយប៉ែត បាន​ទទួល​ពាក្យ​បណ្ដឹងពីជនរងគ្រោះឈ្មោះ ផា សីហា ភេទប្រុស អាយុ៣៥ឆ្នាំ ជនជាតិខ្មែរ មានទីលំនៅភូមិបាលិលេយ្យ២ សង្កាត់ក្រុងប៉ោយប៉ែតបានបាត់ម៉ូតូ (ម៉ូតូម៉ាកYAMAHA NMAX)។

ជំនាញមូលដ្ឋាន​កង​រាជអាវុធហត្ថ​ក្រុង បានចុះធ្វើការស្រាវជ្រាវរកម៉ូតតាមរយៈGPS របស់ម៉ូតូជនរងគ្រោះ រហូតដល់វេលាម៉ោង១៥ និង៣០នាទី ថ្ងៃទី១០ ខែមិថុនា ឆ្នាំ២០២៦ GPS ម៉ូតូ​ជនរងគ្រោះ​បាន​លោត​បង្ហាញ​ទីតាំង​នៅចំណុចខាងក្រោយវត្តផ្សារកណ្ដាល រហូតរកឃើញសញ្ញា GPS លោតក្នុងផ្ទះថ្ម ប្រក់ស័ង្កសីមួយខ្នង មានចាក់សោរបិទជិតដោយ លឺសំឡេង រោទិ៍ GPS ក្នុងផ្ទះ ដោយមានការសង្ស័យកម្លាំងបានមើលតាមប្រហោងទ្វារផ្នែកខាងលើ ប្រទះឃើញមានម៉ូតូជាច្រើនគ្រឿងនៅក្នុងផ្ទះនោះ។

ដោយទទួលបានការអនុញ្ញាតពីលោក ឧត្ដមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ និងមានការសម្របសម្រួលនីតិវិធីពី លោក កើត វណ្ណារ៉េត ព្រះរាជអាជ្ញា អមសាលាដំបូងខេត្តបន្ទាយមានជ័យ កម្លាំងបានសហការណ៍ជាមួយអាជ្ញាធរមូលដ្ឋានកាត់សោរផ្ទះចូលប្រទះឃើញម៉ូតូរបស់ជនរងគ្រោះ រួមនឹងម៉ូតូចំនួន២២គ្រឿងផ្សេងទៀត សរុប​ចំនួន២៣គ្រឿង ហើយក៏ប្រមូលយកម៉ូតូទាំងនោះ មករក្សាទុកនៅមូលដ្ឋានកងរាជអាវុធហត្ថក្រុងប៉ោយប៉ែត ដើម្បី​អនុវត្តតាមនីតិវិធី។ ចំពោះ​ម៉ូតូជនរងគ្រោះត្រូវបានកម្លាំងមូលដ្ឋានកងរាជអាវុធហត្ថក្រុងប្រគល់ជូនជនរងគ្រោះវិញហេីយ។

លោកឧត្តមសេនីយ៍ ត្រី បោន ប៊ិន មេបញ្ជាការកងរាជ អាវុធហត្ថខេត្តបន្ទាយមានជ័យ ក៏បានធ្វេីការអំពាវនាវដល់ម្ចាស់ម៉ូតូចំនួន២២គ្រឿងដែលបានបាត់ បេីសង្ស័យថាជារបស់ខ្លួន សូមធ្វេីការទំនាក់ទំនងមូលដ្ឋានកងរាជអាវុធហត្ថក្រុងប៉ោយប៉ែត ដោយភ្ជាប់ជាមួយឯកសារពាក់ព័ន្ធម៉ូតូរបស់ខ្លួន ដេីម្បីធ្វេីការផ្ទៀងផ្ទាត់ បេីពិតជារបស់បងប្អូនពិតប្រាកដមែន កម្លាំងជំនាញនឹងធ្វេីការប្រគល់ជូនបងប្អូនវិញតែម្តង៕

ដោយ ៖ អពៅ