ព័ត៌មានជាតិ

កុមារតូចៗ តាមឪពុកម្ដាយភៀសសឹកនៅមណ្ឌលសុវត្ថិភាព វត្តចាន់ស៊ី ទទួលបានសម្លៀកបំពាក់ពីអាជ្ញាធរខេត្ត និងចូលរៀន

បានផុស

៨ ខែ មុន

នៅ

ថ្ងៃព្រហស្បតិ៍ ២០ វិច្ឆិកា ២០២៥

ដោយ

កុមារតូចៗ ជាសិស្សានុសិស្ស តាមឪពុកម្ដាយមកនៅមណ្ឌលសុវត្ថិភាព ជនភៀសសឹក នៃវត្តចាន់ស៊ី ស្ថិតក្នុងឃុំកូប ស្រុកអូរជ្រៅ ដែលកំពុងទទួលបានការសិក្សាបណ្ដោះអាសន្ននៅទីនោះផងនោះ កាលពីព្រឹកថ្ងៃទី ២០ ខែវិច្ឆិកា ឆ្នាំ ២០២៥ ទទួលបានសម្លៀកបំពាក់ពីលោក អ៊ុំ រាត្រី អភិបាល នៃគណៈអភិបាលខេត្ត និងលោកស្រី ជ័យ ណារី អនុប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដែលបើកឲ្យសិក្សាបណ្ដោះអាសន្ននៅទីនោះដោយមានការគិតគូរយកចិត្តទុកដាក់ពីថ្នាក់ដឹកនាំ ជាពិសេសពីលោក អ៊ុំ រាត្រី អភិបាលខេត្ត រួមនឹងមន្ទីរអប់រំ យុវជន និងកីឡាខេត្ត បានបង្កើតឲ្យមានថ្នាក់រៀនបណ្ដោះអាសន្ននៅមណ្ឌលសុវត្ថិភាព ជនភៀសសឹក ដើម្បីបង្ហាត់បង្រៀនដល់កុមារភៀសសឹកពីតំបន់ប្រឈម ពិសេសភូមិព្រៃចាន់ ជាទីតាំងដែលយោធាសៀមបានបាញ់ប្រហារមកលើដែនអធិបតេយ្យភាពរបស់កម្ពុជានៅភូមិព្រៃចាន់ ឃុំអូរបីជាន់ កាលពីថ្ងៃទី ១២ ខែវិច្ឆិកា កន្លងទៅ បណ្ដាលឲ្យពលរដ្ឋស្លូតត្រង់ម្នាក់ បានពលីជីវិត និង ៣ នាក់ រងរបួស កំពុងសម្រាកព្យាបាល។

លោក អ៊ុំ រាត្រី បានផ្ដាំដល់សិស្សានុសិស្ស ក្នុងដំណាក់កាលនេះ ដែលមិនទាន់បានវិលត្រលប់ទៅលំនៅឋានវិញ ត្រូវខិតខំរៀនសូត្រ ក្រេបយកចំណេះដឹង ដើម្បីក្លាយជាធនធានសម្រាប់ប្រទេស។

លោកអភិបាលខេត្ត ក៏បានអំពាវនាវដល់អាណាព្យាបាលស្នាក់នៅមណ្ឌលសុវត្ថិភាពដែលមានកូនកំពុងសិក្សា សូមបញ្ជូនកូនឲ្យមករៀននៅទីតាំងដែលអាជ្ញាធរមានរៀបចំបង្រៀន ព្រមទាំងមានបណ្ណាល័យសម្រាប់សិស្សានុសិស្សអានសៀវភៅនៅពេលទំនេរពីការសិក្សាផងដែរ៕

អត្ថបទ ៖ អពៅ