កម្ពុជា និងចិន បានរៀបចំកម្មវិធីទិវាអន្តរជាតិសម្រាប់កិច្ចសន្ទនាអរិយធម៌

សមាគមមិត្តភាពកម្ពុជា-ចិន សហការជាមួយស្ថានទូតចិនប្រចាំកម្ពុជា កាលពីព្រឹកថ្ងៃទី១៣ ខែមិថុនា ឆ្នាំ២០២៦ បានរៀបចំនូវកម្មវិធីនៃទិវាអន្តរជាតិសម្រាប់កិច្ចសន្ទនាអរិយធម៌ ក្រោមប្រធានបទ៖ ភាពសុខដុមរមនានៃវប្បធម៌ចម្រុះ រៀនសូត្រពីអរិយធម៌ទៅវិញទៅមក។

លោក ឯក សំអុល ប្រធានសមាគមមិត្តភាពកម្ពុជា-ចិន បានគូសបញ្ជាក់ថា អរិយធម៌នីមួយៗមានតម្លៃ និងភាពពិសេសរៀងៗខ្លួន ហើយការគោរពគ្នាទៅវិញទៅមក ការរៀនសូត្រពីគ្នា និងការផ្លាស់ប្តូរបទពិសោធន៍វប្បធម៌ គឺជាមាគ៌ាសំខាន់ក្នុងការពង្រឹងមិត្តភាពរវាងប្រជាជន និងប្រជាជន ព្រមទាំងរួមចំណែកកសាងសហគមន៍មនុស្សជាតិដែលមានអនាគតរួមប្រកបដោយសន្តិភាព និងវិបុលភាព។

លោក Wang Wenbin ឯកអគ្គរដ្ឋទូតចិនប្រចាំនៅកម្ពុជា បានលើកឡើងថា កិច្ចសន្ទនារវាងអរិយធម៌ គឺជាស្ពានតភ្ជាប់ដួងចិត្តប្រជាជននៃបណ្តាប្រទេសផ្សេងៗឱ្យកាន់តែជិតស្និទ្ធគ្នា។ លោកបានសង្កត់ធ្ងន់ថា ភាពចម្រុះនៃអរិយធម៌មិនមែនជាឧបសគ្គនៃការអភិវឌ្ឍនោះទេ ប៉ុន្តែជាប្រភពនៃប្រាជ្ញា ការច្នៃប្រឌិត និងការរីកចម្រើនរួម ដែលគួរត្រូវបានថែរក្សា គោរព និងលើកកម្ពស់។

ការចូលរួមយ៉ាងសកម្មរបស់សិស្សនិស្សិត បានឆ្លុះបញ្ចាំងពីតួនាទីសំខាន់របស់យុវជនក្នុងការបន្តមរតកវប្បធម៌ លើកកម្ពស់ការយោគយល់គ្នាឆ្លងវប្បធម៌ និងក្លាយជាបេសកជនមិត្តភាពរវាងកម្ពុជា និងចិន។ តាមរយៈសកម្មភាពនេះ យុវជនបានទទួលនូវចំណេះដឹងថ្មីៗ និងការយល់ដឹងកាន់តែស៊ីជម្រៅអំពីតម្លៃនៃការគោរពភាពខុសគ្នា ការរៀនសូត្រពីអរិយធម៌ទៅវិញទៅមក និងការរួមរស់ប្រកបដោយភាពសុខដុមរមនាក្នុងពិភពលោកដែលមានភាពចម្រុះ។

ភាពចម្រុះបង្កើតភាពស្រស់ស្អាត ការផ្លាស់ប្តូរបង្កើនការយល់ដឹង និងការរៀនសូត្រពីគ្នាបង្កើតអនាគតរួមដ៏ភ្លឺស្វាងសម្រាប់មនុស្សជាតិ គឺជាសារដ៏មានអត្ថន័យដែលបានបន្លឺឡើងក្នុងទិវាដ៏សំខាន់នេះ៕