​ទំហំពាណិជ្ជកម្មទ្វេភាគីកម្ពុជា-អង់គ្លេស ​សម្រេចបានជាង ៤០០ ​លានដុល្លារ ​នៅរយៈពេល ៥ ​ខែ

ការ​ដោះ​ដូរ​ទំនិញ​កម្ពុជា-អង់គ្លេស​ សម្រេច​បាន​នូវ​ទំហំ​ទឹក​ប្រាក់​ជាង ​៤០០ ​លានដុល្លារ ​នៅ​ក្នុង​រយៈ​ពេល​ ៥ ​ខែ ឆ្នាំ ២០២៦ ​ធ្លាក់ចុះ ៣,២% ​ធៀប​នឹង​រយៈពេល​ដូចគ្នា​កាលពីឆ្នាំមុន។​

​ទិន្នន័យ​របស់​អគ្គនាយកដ្ឋានគយ ​និង​រដ្ឋាករកម្ពុជា ​(GDCE) ​បង្ហាញ​ថា គិត​ចាប់​ពី​ខែ​មករា ដល់​ខែ​ឧសភា ២០២៦ ​ទំហំ​ពាណិជ្ជ​កម្ម​ទ្វេ​ភាគី​កម្ពុជា-​អង់គ្លេស​សរុប​ចំនួន ៤០១ លានដុល្លារ ក្នុងនោះ​កម្ពុជា​​នាំ​ទំនិញ​ចេញ​​ទៅ​អង់គ្លេស​មាន​ទំហំទឹក​ប្រាក់ជិត ​៣៧៩ លានដុល្លារ ធ្លាក់ចុះ ៧,៦% ចំណែក​អង់គ្លេស​នាំចូល​មកវិញ​មាន​តម្លៃ ២២ លានដុល្លារ កើនឡើង ៧,៧%។ ​

​អ្នកឧកញ៉ា ​លឹម ​ហេង ​អនុប្រធានសភាពាណិជ្ជកម្មកម្ពុជា ​មានប្រសាសន៍ថា ​ទំហំពាណិជ្ជកម្មរបស់កម្ពុជាអាស្រ័យ​ទៅលើទីផ្សារ​ដែលយើងមានស្រាប់ ​ដែលមាន EBA នឹង​កិច្ចព្រមពៀងផ្សេងៗ​ ជាមួយ​កូរ៉េ ចិន អង់គ្លេស​ ដែលនឹងធ្វើឱ្យពាណិជ្ជកម្មមានកំណើននៅពេលខាងមុខ។​

​លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម មានប្រសាសន៍ថា ​កម្ពុជា និង​ចក្រភពអង់​គ្លេស​មានទំនាក់ទំនងជិតស្និទ្ធលើគ្រប់វិស័យ ជាពិសេសក្នុងវិស័យពាណិជ្ជកម្ម និងវិនិយោគ។ ​

​លោក​បណ្ឌិត ជ័យ តិច អ្នក​ស្រាវ​ជ្រាវ​ការ​អភិវឌ្ឍ​សង្គម-សេដ្ឋកិច្ច បានបញ្ជាក់ឱ្យដឹងថា​ ពាណិជ្ជកម្មទ្វេ​ភាគី​កម្ពុជា-អង់គ្លេស មានលក្ខណៈល្អប្រសើរនៅឆ្នាំនេះ ដែលយើទទួលបានការ​អនុគ្រោះ​ពន្ធពី​អង់គ្លេស ពិសេស​គឺការនាំចេញវិស័យវាយ​នភណ្ឌ កាត់ដេរ និងគ្រឿងបង្គុំអគ្គិសនី នាំចេញទៅអង់​គ្លេស​ក្នុង​អត្រាសូន្យភាគ​រយ។ ​

​យោងតាម​ក្រសួងពាណិជ្ជកម្ម ​នៅ​ក្នុងឆ្នាំ​ ២០២៥ ​ទំហំពាណិជ្ជកម្មទ្វេភាគីកម្ពុជា-អង់គ្លេស ​មានតម្លៃ សរុបប្រមាណជាង ១,០៦ ពាន់លានដុល្លារ កើនឡើង ៥,៧% ធៀបនឹងឆ្នាំ ២០២៤ ក្នុងនោះកម្ពុជានាំចេញទៅអង់គ្លេសមានទំហំ ១,០១ ពាន់លានដុល្លារ ចំណែកអង់គ្លេសនាំមកវិញមានតម្លៃ ៥៤ កើនឡើង ២,២% ចុះជាង ២%៕

អត្ថបទ៖ ឡេង ដេត