ពេលសវនាការ​ជាមួយប្រមុខ​ណាតូ លោក ត្រាំ លើករឿងខកចិត្ត​ជាថ្មី​ទៀត ក្នុងសង្គ្រាម​នៅអ៊ីរ៉ង់​

ប្រធានាធិបតីអាមេរិក លោក ដូណាល់ ត្រាំ បានសម្តែងការខកចិត្ត ដែលបណ្តាសម្ព័ន្ធមិត្តណាតូ មិនបានផ្តល់ការគាំទ្រ និងជួយជ្រោមជ្រែងដល់យុទ្ធនាការយោធារបស់អាមេរិក ប្រឆាំងនឹងប្រទេសអ៊ីរ៉ង់។ នេះបើយោងតាមការចេញផ្សាយពីសារព័ត៌មាន france24 ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងជំនួបជាមួយអគ្គលេខាធិការណាតូ លោក Mark Rutte នៅសេតវិមាន កាលពីថ្ងៃទី២៤ ខែមិថុនា ប្រធានាធិបតី​ ដូណាល់ ត្រាំ បានថ្លែងថា៖ «យើងមានការខកចិត្ត! អាមេរិកបានកម្ចាត់អ៊ីរ៉ង់ទាំងស្រុងនៅក្នុងសប្តាហ៍ដំបូង ប៉ុន្តែវាជារឿងល្អ ប្រសិនបើពួកគេ (សម្ព័ន្ធមិត្ត) និយាយថា ពួកគេចង់ជួយជ្រោមជ្រែងខ្លះ»។ លោក ត្រាំ​ បានបន្ថែមថា ទីក្រុងវ៉ាស៊ីនតោន ពិតជាមិនត្រូវការជំនួយក្នុងរឿងនេះទាល់តែសោះ។

ជាការឆ្លើយតប ​អគ្គលេខាធិការ​​អង្គការណាតូ លោក Mark Rutte បានការពារបណ្តាប្រទេសជាសមាជិកណាតូ ដោយ​លើក​ឡើង​ថា យន្តហោះចម្បាំងរបស់អាមេរិកចន្លោះពី ៤០០០ ទៅ ៥០០០ គ្រឿង បានហោះចេញពីមូលដ្ឋានទ័ពនានាក្នុងតំបន់អឺរ៉ុប អំឡុងពេលធ្វើសង្គ្រាមនោះ។

ក្រោយបញ្ចប់ជំនួប មេដឹកនាំណាតូរូបនេះបានប្រាប់អ្នកយកព័ត៌មានថា ប្រធានាធិបតី ត្រាំ នៅតែបន្តប្តេជ្ញាចិត្តយ៉ាងពេញទំហឹងចំពោះសម្ព័ន្ធភាពណាតូ ហើយបានអះអាងថា អាមេរិកនឹងការពារអឺរ៉ុប «យ៉ាងពិតប្រាកដ» ក្នុងករណីមានការវាយប្រហារណាមួយកើតឡើង។

ការរិះគន់របស់លោកត្រាំ មកលើណាតូ បានកើតឡើងត្រឹមតែពីរសប្តាហ៍ប៉ុណ្ណោះ មុនពេលដែលមេដឹកនាំនៃប្រទេសជាសមាជិកទាំង ៣២ ត្រៀមលក្ខណៈចូលរួមក្នុងកិច្ចប្រជុំកំពូលនៅក្នុងទីក្រុងអង់ការ៉ា ប្រទេសតួកគី នាថ្ងៃទី៧-៨ ខែកក្កដាខាងមុខ។

គួរបញ្ជាក់ថា ប្រធានាធិបតីត្រាំ មិនបានពិគ្រោះយោបល់ជាមួយណាតូឡើយ មុនពេលអាមេរិក និងអ៊ីស្រាអែលបានបើកយុទ្ធនាការវាយប្រហារលើអ៊ីរ៉ង់ កាលពីថ្ងៃទី២៨ ខែកុម្ភៈ។ សម្ព័ន្ធមិត្តសំខាន់ៗនៅអឺរ៉ុប ក៏បានបង្ហាញការមន្ទិលសង្ស័យជាបន្តបន្ទាប់អំពីគោលបំណងនៃសង្គ្រាមនេះផងដែរ។

ក្រៅពីជម្លោះជាមួយអ៊ីរ៉ង់ អាមេរិកក៏មានភាពតានតឹងជាមួយសម្ព័ន្ធមិត្តណាតូផ្សេងទៀត រួមទាំងកោះហ្គ្រីនឡែន ដែលជាដែនដីស្វយ័តរបស់ប្រទេសដាណឺម៉ាក ដែលលោក ត្រាំ ធ្លាប់បានគំរាមកំហែងកាត់យកជាដែនដីរបស់ខ្លួន មុនពេលមានការសម្របសម្រួលគ្នាកាលពីខែមករា។

ទន្ទឹមនឹងនេះ ទីក្រុងវ៉ាស៊ីនតោនក៏បានថ្លែងចំៗថា ប្រទេសជាសមាជិកណាតូនៅអឺរ៉ុប ត្រូវតែទទួលខុសត្រូវចម្បងលើកិច្ចប្រឹងប្រែងការពារជាតិបែបធម្មតាៗ។ ក្រសួងការពារជាតិអាមេរិក បានប្រកាសពីការកាត់បន្ថយចំនួនឧបករណ៍យោធាដែលបានដាក់ពង្រាយនៅជុំវិញពិភពលោក ដែលឧបករណ៍ទាំងនោះភាគច្រើនត្រូវបានផ្គត់ផ្គង់ដល់ប្រតិបត្តិការរបស់ណាតូ។

យ៉ាងណា ចំណាត់ការនេះបានបង្កើតឲ្យមានក្តីបារម្ភថា តំបន់អឺរ៉ុប អាចនឹងងាយរងគ្រោះដោយសារការគំរាមកំហែង ដោយហេតុថាសម្ព័ន្ធមិត្តទាំងនោះនៅតែបន្តពឹងផ្អែកលើអាមេរិកសម្រាប់អាវុធគន្លឹះមួយចំនួន៕

អត្ថបទ ៖ សាង ស្រីល័ក្ខ

អាមេរិក និង អ៊ីរ៉ង់ ឈានដល់បង្កើតក្រុមការងារ​​កម្រិតបច្ចេកទេស​ចំនួន ៤