អ៊ីរ៉ង់ ព្រមាន​ជាថ្មី​ថា​ កប៉ាល់ឆ្លងកាត់ច្រក Hormuz ត្រូវតែ​សុំអនុញ្ញាត ​បើ​មិនចង់​ឲ្យ​ចាត់ការ​

កងឆ្មាំបដិវត្តន៍ឥស្លាមអ៊ីរ៉ង់ (IRGC) នៅព្រហស្បតិ៍ ទី២៤ ខែមិថុនា បានចេញការព្រមានដ៏ម៉ឺងម៉ាត់​មួយ​ប្រឆាំងនឹងការឆ្លងកាត់ច្រកសមុទ្រ Hormuz ដែលគ្មានការអនុញ្ញាត ដោយបញ្ជាក់ថា នាវាទាំងឡាយណាដែលមិនអនុវត្តតាម នឹងត្រូវរងការចាត់ការជាធរមាន។ នេះបើយោងតាមសារព័ត៌មាន cnbc របស់​អាមេរិក​​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាគីអ៊ីរ៉ង់ បានប្រកាសថា ខ្លួនមានគម្រោងដាក់ចេញនូវអ្វីដែលខ្លួនហៅថា កម្រៃសេវាកម្មផ្លូវសមុទ្រ មិនមែនជាការយកពន្ធផ្លូវនោះទេ ខណៈដែលអាមេរិកបានវែកញែកថា ច្រកនេះជាផ្លូវទឹកអន្តរជាតិ ដូច្នេះមិនគួរមានការទារប្រាក់នោះឡើយ។

កងទ័ព IRGC បានគូសបញ្ជាក់នៅក្នុងសេចក្តីថ្លែងការណ៍ថា ផ្លូវតែមួយគត់ដែលត្រូវបានអនុញ្ញាតឲ្យឆ្លងកាត់ច្រក Hormuz គឺមានតែផ្លូវដែលប្រកាសដោយសាធារណរដ្ឋឥស្លាមអ៊ីរ៉ង់ប៉ុណ្ណោះ។ ពួកគេ បានព្រមានទៀតថា ការឆ្លងកាត់ណាមួយដោយគ្មានការអនុញ្ញាត គឺជាទង្វើ មិនអាចទទួលយកបាន និងមានគ្រោះថ្នាក់បំផុត។

ជាមួយគ្នានោះ ពួកគេក៏បានថ្កោលទោសចំពោះអ្វីដែលពួកគេហៅថាជា «ផ្លូវសមុទ្រថ្មី» កាត់តាមច្រកទឹកនេះ ដែលត្រូវបានប្រកាសឡើងដោយអាជ្ញាធរមួយចំនួន ប៉ុន្តែមិនបានបញ្ជាក់លម្អិតនោះឡើយ។

សេចក្តីថ្លែងការណ៍នេះបានលេចឡើង ត្រឹមតែមួយថ្ងៃប៉ុណ្ណោះ បន្ទាប់ពីប្រទេសអូម៉ង់បានប្រកាសពីគន្លងផ្លូវនាវាចរណ៍បណ្តោះអាសន្នកាត់តាមច្រកសមុទ្រនេះ ក្រោមការសម្របសម្រួលជាមួយអង្គការសមុទ្រអន្តរជាតិ (IMO)។ ការព្រមានដ៏តឹងរ៉ឹងនេះ បានសង្កត់ធ្ងន់ពីការប្តេជ្ញាចិត្តរបស់ទីក្រុងតេហេរ៉ង់ ក្នុងការរក្សាការគ្រប់គ្រងលើច្រក Hormuz និងការប្រឆាំងនឹងការធ្វើដំណើរឆ្លងកាត់ណាដែលរំលងការអនុញ្ញាតរបស់ខ្លួន។

មិនតែប៉ុណ្ណោះ វាក៏បានបង្ហាញពីភាពមិនច្បាស់លាស់ដែលម្ចាស់កប៉ាល់កំពុងជួបប្រទះក្នុងការធ្វើដំណើរឆ្លងកាត់ច្រកមួយនេះ បើទោះបីជាអាមេរិក និងអ៊ីរ៉ង់បានចុះហត្ថលេខាលើអនុស្សរណៈនៃការយោគយល់គ្នា (MoU) កាលពីសប្តាហ៍មុន ដើម្បីបញ្ចប់សង្គ្រាមរបស់ពួកគេ ដែលចែងថា នាវាពាណិជ្ជកម្មអាចធ្វើដំណើរឆ្លងកាត់ច្រកសមុទ្រនេះដោយឥតគិតថ្លៃក្នុងរយៈពេល ៦០ ថ្ងៃខាងមុខ។ ប៉ុន្តែស្របពេលដែលអ៊ីរ៉ង់ និងអាមេរិកកំពុងស្ថិតក្នុងកិច្ចចរចា គេនៅមិនទាន់ដឹងច្បាស់ថា ការរៀបចំបែបណានឹងត្រូវអនុវត្ត បន្ទាប់ពីរយៈពេលកំណត់នោះឡើយ៕

អត្ថបទ ៖ សាង ស្រីល័ក្ខ

ពេលសវនាការ​ជាមួយប្រមុខ​ណាតូ លោក ត្រាំ លើករឿងខកចិត្ត​ជាថ្មី​ទៀត ក្នុងសង្គ្រាម​នៅអ៊ីរ៉ង់​