កីឡា

ថ្នាក់ដឹកនាំក្រុមនារី សៀមរាប ជូនបាច់ផ្កាដល់កីឡាការិនីរបស់ខ្លួន សម្រាប់ការជាប់ជម្រើសជាតិក្រុមធំ

បានផុស

២ នាទី មុន

នៅ

ថ្ងៃសុក្រ ២៦ មិថុនា ២០២៦

ដោយ

ក្រុមបាល់ទាត់នារី សៀមរាប អេហ្វស៊ី មានកីឡាការិនីចំនួន ៤ នាក់ ត្រូវបានកោះហៅចូលជម្រើសជាតិនារី កម្ពុជា ក្រុមធំ ដើម្បីចូលរួមការប្រកួតពានរង្វាន់ ASEAN Women’s Cup 2026 នៅប្រទេស ម៉ាឡេស៊ី នាខែ កក្កដា ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហព័ន្ធបាល់ទាត់ កម្ពុជា បានប្រកាសជាផ្លូវការអំពីបញ្ជីឈ្មោះកីឡាការិនីទាំង ២៣ នាក់ ដើម្បីបោះជំរុំហ្វឹកហាត់ត្រៀមចូលរួមការប្រកួតពាន ASEAN Women’s Cup 2026 នៅប្រទេស ម៉ាឡេស៊ី ខណៈក្នុងចំណោមនោះមានកីឡាការិនីរបស់ក្រុម សៀមរាប អេហ្វស៊ី ៤ នាក់រួមមានអ្នកចាំទី ជិន សូវៀត, ខ្សែការពារស្លាប នួន ស្រីនូ, ខ្សែការពារកណ្តាល គីន រក្សា និងខ្សែបម្រើការពារ ស៊្រុន ស្រីលក្ខ ។

ក្នុងចំណោមកីឡាការិនីទាំង ៤ នាក់នោះ មានកីឡាការិនី ៣ នាក់ ធ្លាប់បានជាប់ជម្រើសជាតិនារី កម្ពុជា ក្រុមធំពីមុនរួចហើយ រួមមានកីឡាការិនី ជិន សូវៀត គីន រក្សា និង ស្រ៊ុន ស្រីលក្ខ។ ដោយឡែក មានតែកីឡាការិនី នួន ស្រីនូ ម្នាក់ប៉ុណ្ណោះ ដែលទើបជាប់ជម្រើសជាតិក្រុមធំជាលើកដំបូង។

ការណ៍ដែលកីឡាការិនីរបស់ក្រុម សៀមរាប អេហ្វស៊ី មានកីឡាការិនី ដល់ទៅ ៤ នាក់ជាប់ក្នុងជម្រើសជាតិនារី កម្ពុជា ក្រុមធំលើកនេះ ដោយសារពួកគេបង្ហាញទម្រង់លេងល្អខ្លាំង សម្រាប់ការប្រកួតនៅក្នុងលីគនារី កម្ពុជា រដូកាល ២០២៦ នេះ។ បច្ចុប្បន្ន ពួកគេកំពុងឈរលេខរៀងទី ៤ ក្នុងលីគនារី កម្ពុជា ដោយឆ្លងកាត់ ១០ ប្រកួត ក្នុងនោះឈ្នះ៥ ស្មើ ៣ និងចាញ់ ២។

សម្រាប់ការប្រកួតកាលពីថ្ងៃទី២៥ ខែមិថុនា ឆ្នាំ២០២៦ នៅលីគនារី ថ្នាក់ដឹកនាំបានជូនបាច់ផ្កាជាលើកទឹកចិត្តដល់កីឡាការិនីទាំង ៤ នាក់ដែលបានជាប់ជម្រើសជាតិ។ មិនត្រឹមតែប៉ុណ្ណោះ សមាជិករបស់ក្រុមនារីភ្នំពេញក្រោនក៏ទទួលបានបាច់ផ្កាពីថ្នាក់ដឹកនាំរបស់ក្រុមនារីសៀមរាប អេហ្វស៊ីដែរ។

មូលហេតុធំមួយ ដែលក្រុមរបស់ពួកគេ មានកីឡាការិនីជាប់ឈ្មោះ សុទ្ធតែអ្នកលេងនៅក្នុងតំបន់ខាងក្រោម ដោយសារគិតត្រឹមថ្ងៃទី ២៦ ខែ មិថុនា នេះ ពួកគេជាប់លេខ ២ ជាក្រុមរបូតគ្រាប់បាល់តិចបំផុត បន្ទាប់ពី ភ្នំពេញក្រោន ពោលគឺត្រឹមតែ ៨ គ្រាប់ប៉ុណ្ណោះ។

គួរបញ្ជាក់ ថា ក្រុមនារី កម្ពុជា ស្ថិតនៅក្នុងពូល B ជាមួយក្រុមនារី ឥណ្ឌូណេស៊ី និង ទីម័រ។ ការប្រកួតទី ១ ត្រូវជួបក្រុម ទីម័រ នៅថ្ងៃទី ១៣ ខែ កក្កដា និងប្រកួតទី ២ ត្រូវជួបក្រុម ឥណ្ឌូណេស៊ី នៅថ្ងៃទី ១៦ ខែ កក្កដា៕