ករណីកាប់សម្លាប់បុរសម្នាក់នៅស្រុកព្រៃកប្បាស នគរបាលជំនាញឃាត់ខ្លួនជនដៃដល់៣នាក់

ជនសង្ស័យ ៣នាក់ដែលពាក់ព័ន្ធករណីកាប់ និងអាកសម្លាប់បុរសម្នាក់យ៉ាងសាហាវនៅភូមិថ្លុកដូនទុំ ឃុំបានកាម ស្រុកព្រៃកប្បាស ខេត្តតាកែវ ត្រូវបានកម្លាំងនគរបាលស្រាវជ្រាវតាមចាប់ខ្លួនបានទាំងអស់ ក្នុងរយៈពេលត្រឹមប៉ុន្មានម៉ោងប៉ុណ្ណោះបន្ទាប់ពីកើតហេតុ។

ករណីនេះបានបង្កការភ្ញាក់ផ្អើលនៅព្រឹកថ្ងៃទី២៦ ខែមិថុនា ឆ្នាំ២០២៦ ដែលជនរងគ្រោះឈ្មោះ ប៉ុក លី ភេទប្រុស អាយុ ៤៧ឆ្នាំ រស់នៅភូមិកើតហេតុខាងលើ។ ភ្លាមៗក្រោយទទួលព័ត៌មាន កម្លាំងនៃស្នងការដ្ឋាននគរបាលខេត្តតាកែវ សហការជាមួយនគរបាលស្រុកព្រៃកប្បាស បានចុះពិនិត្យកន្លែងកើតហេតុ ប្រមូលវត្ថុតាង និងបើកការស្រាវជ្រាវយ៉ាងយកចិត្តទុកដាក់ រហូតដល់វេលាម៉ោង ០៧និង២៥នាទី​យប់ ថ្ងៃដដែល សមត្ថកិច្ចបានកំណត់អត្តសញ្ញាណ និងឃាត់ខ្លួនជនសង្ស័យទី១ ឈ្មោះ ឈុំ ភក្តី ហៅ តី អាយុ ២៥ឆ្នាំ។ ក្រោយការសាកសួរ ជនសង្ស័យបានសារភាព និងបង្ហាញពីបក្ខពួក ២នាក់ទៀត ដែលបានរួមគ្នាធ្វើសកម្មភាពសម្លាប់ជនរងគ្រោះ។

ផ្អែកលើចម្លើយសារភាព សមត្ថកិច្ចបានបន្តឃាត់ខ្លួនជនសង្ស័យឈ្មោះ សួន សុខណេង អាយុ ២៩ឆ្នាំ និងឈ្មោះ ស៊ឹម រី អាយុ ៥២ឆ្នាំ ដែលរស់នៅភូមិជាមួយគ្នា យកមកសាកសួរ និងកសាងសំណុំរឿងតាមនីតិវិធី។

តាមចម្លើយសារភាព ជនសង្ស័យទាំង ៣នាក់ បានប្រើកាំបិតផ្គាក់ និងកាំបិតប៉័ងតោ រួមគ្នាកាប់ និងអាកជនរងគ្រោះឈ្មោះ ប៉ុក លី អាយុ ៤៧ឆ្នាំ បណ្តាលឱ្យស្លាប់នៅកន្លែងកើតហេតុ៕

​អត្ថបទ​៖ វីរៈ