ចម្ការលម៉ើកសិករនៅខេត្តបាត់ដំបង ឆក់​បេះដូង​ទេសចរជាតិ និងអន្តរជាតិទៅកម្សាន្ត​នៅ​ចុងសប្តាហ៍

ក្រៅពីដំាលម៉ើសម្រាប់លក់ ចម្ការលម៉ើរ​បស់កសិករមួយនៅខេត្តបាត់ដំបងបានក្លាយជាគោលដៅឆក់​ទាក់ទាញភ្ញៀវទេសជាតិ និងអន្តរជាតិឱ្យចូលរួមទស្សនាកម្សាន្តនាពេលចុងសប្ដាហ៍។

ជាម្ចាស់ចម្ការលម៉ើ គី ហាំង លោក គី ហាំង ប្រាប់ កម្ពុជាថ្មី ថា បច្ចុប្បន្នចម្ការលម៉ើរបស់លោក ក្រៅ​ពីការដាំលម៉ើសម្រាប់លក់ទៅកាន់ទីផ្សារ ចម្ការលម៉ើ គី ហាំង ក៏បានប្រែក្លាយជាគោលដៅទេសមួយសម្រាប់ភ្ញៀវទេសចរជាតិ និងអ​ន្តរជាតិមកទស្សនាកម្សាន្តនាពេលចុងសប្ដាហ៍យ៉ាងច្រើនកុះករផងដែរ។

លោក គី ហាំង បន្តថា ជារៀងរាល់ចុងសប្ដាហ៍លោកសង្កេតឃើញថាសម្បូរទៅដោយភ្ញៀវទេសចរជាច្រើន បាននាំគ្នាមកដើរកម្សាន្តនៅក្នុងភូមិសាស្ត្រខេត្តបាត់ដំបង ខណៈចម្ការរបស់លោកក៏មានភ្ញៀវទេសចរ​មកចូលរួមកម្សាន្ត និងបានជួយទិញលម៉ើស្រស់ៗ ដែលទើបប្រមូលផលបានថ្មីៗក្នុងរដូវកាលនេះ។ ជាក់ស្ដែង ជាមធ្យមភ្ញៀវទេសដែលបានដើរកម្សាន្តជាច្រើនក្រុមបានជួយទិញលម៉ើរបស់លោកបានចន្លោះពី ១០០គីឡូ ទៅដល់ជិត ២០០គីឡូ​ ក្នុង១ថ្ងៃផងដែរ។

យ៉ាងណាមិញ ចម្ការលម៉ើ គី ហាំង នៅឆ្នាំនេះ កាន់តែទទួលបានការគាំទ្រយ៉ាងច្រើនកុះករ បន្ទាប់ពីមានប្រព័ន្ធផ្សព្វផ្សាយ និងការចែករំលែកតាមរយៈបណ្ដេញសង្គមពីឆ្នាំមុន​ៗរួចមក។

សម្រាប់ពេលបច្ចុប្បន្ន ផ្លែលម៉ើនៅចម្ការរបស់លោក គី ហាំង អាចលក់ចេញទៅកាន់ទីផ្សារបានចន្លោះពី ១៥ដុល្លារ ទៅ ២០ដុល្លារ អាស្រ័យទៅតាមប្រភេទពូជនីមួយៗផងដែរ។

ផ្លែលម៉ើ គឺជាប្រភេទផ្លែឈើដ៏សម្បូរសារធាតុចិញ្ចឹម និងផ្ដល់អត្ថប្រយោជន៍ជាច្រើនចំពោះសុខភាព។ វាមិនត្រឹមតែជាប្រភពថាមពលដ៏រហ័សប៉ុណ្ណោះទេ ប៉ុន្តែថែមទាំងជួយសម្រួលដល់ការរំលាយអាហារ ការពារសុខភាពទូទៅ និងអាចជួយស្ត្រីមានផ្ទៃពោះបានយ៉ាងល្អទៀតផង។

ចម្ការលម៉ើរបស់លោក គី​ ហាំង ជាចម្ការលម៉ើមួយដែលមានទីតាំងស្ថិតនៅភូមិ កូនភ្នំខាងជើង ឃុំតាស្ដា ស្រុកសំពៅលូន ខេត្តបាត់ដំបង។ បច្ចុប្បន្នចម្ការលម៉ើរបស់កសិករូបនេះ មានដើមលម៉ើចំនួន ៤៥០ដើមក្នុងផ្ទៃដីសរុបជិត ២ហិកតា ដែលជាមធ្យម លម៉ើ១ដើម អាចប្រមូលផលបាន ៨០គីឡូក្រាម៕

អត្ថបទ ៖ សួស សិត