កីឡា

«ទិវាអូឡាំពិក ឆ្នាំ២០២៦» បំផុសយុវជនឲ្យលេងកីឡា និងរួមគ្នាគាំទ្រកម្ពុជាឆ្ពោះទៅព្រឹត្តិការណ៍អូឡាំពិក LA

បានផុស

១ minute មុន

នៅ

ថ្ងៃអាទិត្យ ២៨ មិថុនា ២០២៦

ដោយ

នៅព្រឹកថ្ងៃទី២៨ ខែមិថុនា ឆ្នាំ២០២៦ នេះគណៈកម្មាធិការជាតិអូឡាំពិកកម្ពុជា បានប្រារព្ធ «ទិវាអូឡាំពិក ឆ្នាំ២០២៦» ជាការរំលឹកខួបលើកទី១៣២ និងបំផុសយុវជនឲ្យលេងកីឡាផងដែរនៅឯទីលានបាល់ទាត់ក្នុងពហុកីឡដ្ឋានមរតកតេជោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាព NOCC

ប្រធានគណៈកម្មាធិការអូឡាំពិកកម្ពុជា លោក ថោង ខុន បានបញ្ជាក់ក្នុងសំណេរថា ថ្ងៃនេះគឺជាថ្ងៃពិសេសសម្រាប់ចលនាអូឡាំពិកកម្ពុជា ក្នុងការប្រារព្វខួបលើកទី១៣២ នៃទិវាអូឡាំពិក ដើម្បីរំលឹកដល់ការបង្កើតចលនាអូឡាំពិកសម័យទំនើប (២៣ មិថុនា ១៨៩៤ – ២៣ មិថុនា ២០២៦) ដែលផ្តួចផ្តើមដោយស្ថាបនិកជនជាតិបារាំងគឺលោក Pierre de Coubertin។ ទិវាអូឡាំពិក ឆ្នំា២០២៦នេះ ក្រោមមូលបទ “ក្រុមកីឡាកម្ពុជាឆ្ពោះទៅកីឡាអូឡាំពិក ទីក្រុង LA ឆ្នាំ២០២៨” ជាមួយយុទ្ធនាការ “ប្រជាជនម្នាក់ លេងកីឡាមួយប្រភេទ យ៉ាងតិច” ដែលផ្តួចផ្តើមដោយ សម្តេចអគ្គមហាសេនាបតីតេជោ ហ៊ុន សែន ដែល សម្តេច បានប្រកាសជាផ្លូវការនាឱកាសព្រឹត្តិការណ៍កីឡាជាតិលើកទី១ ឆ្នាំ២០១៦។

រូបភាព NOCC

លោក ថោង ខុន ក្នុងឱកាសប្រារព្វទិវាអូឡាំពិកនាឆ្នាំ២០២៦ នេះសូមអំពាវនាវឱ្យយុវជន សិស្សានុសិស្ស និងអត្តពលិកទាំងអស់ចូលរួមបំផុសចលនា “ហាត់ប្រាណនិងលេងកីឡាអស់មួយជីវិត” ដើម្បីទទួលបានសុខភាពល្អ ទាំងសុខភាព រាងកាយ ស្មារតី និងបញ្ញាញាណ ក្នុងគោលដៅ អភិវឌ្ឍមូលធនមនុស្ស ប្រកបដោយគុណភាពខ្ពស់ និងសុខភាព ដែលជាលក្ខខណ្ឌចាំបាច់មិនអាចខ្វះបានសម្រាប់អភិវឌ្ឍសេដ្ឋកិច្ច និងសង្គមជាតិ។

រូបភាព NOCC

ចំណែកលោក ប៊ុយ សុភ័ណ្ឌ អគ្គលេខាធិការរង NOCC បានលើកឡើងថា នាឱកាសជួបជុំ និងរៀបចំទិវាអូឡាំពិកនេះផងដែរថ្នាក់ដឹកនាំក៏បានបំផុសស្មារតីដល់អ្នកចូលរួមទាំងអស់ឲ្យគាំទ្រ «ក្រុមកីឡាកម្ពុជាឆ្ពោះទៅកីឡាអូឡាំពិក ទីក្រុង LA ឆ្នាំ២០២៨» ដើម្បីឈានទៅសម្រេចផែនការធំមួយនេះ។

បញ្ជាក់ដែរថា ទិវាអូឡាំពិក ឆ្នាំ២០២៦ ដែលរៀបចំដោយគណៈកម្មាធិការជាតិអូឡាំពិកកម្ពុជាកាលពីព្រឹកថ្ងៃទី២៨ ខែមិថុនាឆ្នាំ២០២៦ នេះមានការចូលរួមពីអត្តពលិកឆ្នើមៗរបស់កម្ពុជា ថ្នាក់ដឹកនាំ សិស្សានុសិស្ស គ្រូបង្វឹក មកពីប្រភេទកីឡាផ្សេងៗជាច្រើនផងដែរ៕