នាវាកម្សាន្ត ពូទីន ជាង ១០០លានដុល្លារ​ បើកទៅចតនៅ​​មូលដ្ឋានទ័ពជើងទឹក សង្ស័យគេចការវាយប្រហារ​ពី​ដ្រូន​អ៊ុយក្រែន

ប្រព័ន្ធផ្សព្វផ្សាយ​របស់ដាណឺម៉ាក DR បានដេញប្រមាញ់ និងរកឃើញថា នាវាកម្សាន្តលំដាប់មហាសេដ្ឋីមួយគ្រឿង ដែលមានទំនាក់ទំនងយ៉ាងអាថ៌កំបាំងជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន ត្រូវបានគេប្រទះឃើញកំពុងចតលាក់ខ្លួនយ៉ាងមានសុវត្ថិភាព នៅឯកំពង់ផែយោធា Severomorsk ភាគខាងជើងប្រទេសរុស្ស៊ី។

រូបភាពពីផ្កាយរណប ដែលថតបានយ៉ាងច្បាស់កាលពីថ្ងៃទី៥ ខែកក្កដា បានទម្លាយឱ្យឃើញវត្តមានរបស់នាវាកម្សាន្តដ៏ប្រណីតឈ្មោះ Graceful ដោយមាននាវាចម្បាំង Voyevoda បើកហែហមអមដំណើរមិនឱ្យឃ្លាតមួយជំហានឡើយ។ នាវាចម្បាំង​នេះបានធ្វើដំណើរដោយបិទ​ឧបករណ៍បញ្ជូនសញ្ញាសម្គាល់ខ្លួន ដើម្បីកុំឱ្យគេដឹងទីតាំង ប៉ុន្តែបានលួចបើកវាឡើងវិញត្រឹមរយៈពេលខ្លីប៉ុណ្ណោះ នៅពេលធ្វើដំណើរទៅ​ដល់ចម្ងាយប្រហែល ៧០គីឡូម៉ែត្រពីកំពង់ផែ។

មុនពេលទៅ​ដល់កន្លែងលាក់ខ្លួន ក្បួននាវាសម្ងាត់​នេះ ត្រូវបានគេប្រទះឃើញនៅក្បែរឆ្នេរសមុទ្រដាណឺម៉ាក កាលពីចុងខែមិថុនា ដោយកាលនោះ ពួកគេបានផ្ញើសារបោកបញ្ឆោតប្រព័ន្ធរ៉ាដាអន្តរជាតិថា ខ្លួនកំពុងធ្វើដំណើរទៅកាន់ទីក្រុងអ៊ីស្តង់ប៊ុល ប្រទេសតួកគី។ ប៉ុន្តែតាមពិតទៅ នាវាដ៏អាថ៌កំបាំងនេះបែរជាបើកលបៗកាត់តាមឆ្នេរសមុទ្រន័រវែស រួចឆ្ពោះត្រង់ចូលទៅក្នុងដែនទឹកដែលមានសុវត្ថិភាពរបស់រុស្ស៊ីតែម្តង។

សារព័ត៌មាន DR ដោយ​ដក​ស្រង់​សម្ដី​របស់​លោក Flemming Splidsboel Hansen ដែល​ជា​អ្នកស្រាវជ្រាវជាន់ខ្ពស់ នៅវិទ្យាស្ថានដាណាម៉ាកសម្រាប់ការសិក្សាអន្តរជាតិ (DIIS) បាន​ឱ្យដឹង​ថា នាវា Graceful ត្រូវបានគេបញ្ជាឱ្យរត់គេចទៅកំពង់ផែភាគខាងជើង គឺដើម្បីការពារវាពីការវាយប្រហារសងសឹកដោយហ្វូងដ្រូនរបស់អ៊ុយក្រែន ដែលមាន​សមត្ថភាព​វាយ​ប្រហារ​បាន​ឆ្ងាយ​ជាង​មុន និង​​កំពុង​​​បង្កើន​វត្តមាន​ខ្លាំង នៅក្នុងតំបន់សមុទ្របាល់ទិក។

តាមរយៈការផ្លាស់ទីនាវាទៅកាន់កំពង់ផែ​យោធា Severomorsk ដែលជាមូលដ្ឋានទ័ពជើងទឹកចម្បងរបស់កងនាវាភាគខាងជើងរុស្ស៊ី នាវា Graceful ត្រូវបានស្ថិតនៅក្នុងបន្ទាយតំបន់អាកទិកដ៏ដាច់ស្រយាលមួយ ដែលត្រូវបានការពារយ៉ាងតឹងរ៉ឹងដោយនាវាចម្បាំងផ្ទុកមីស៊ីលនុយក្លេអ៊ែរ និងប្រព័ន្ធការពារអាកាសដ៏ធំធេង ដែលធ្វើឱ្យវាស្ថិតនៅឆ្ងាយហួសពីសមត្ថភាពវាយប្រហារនាពេលបច្ចុប្បន្នរបស់ដ្រូនរយៈចម្ងាយឆ្ងាយរបស់អ៊ុយក្រែន។

គួរបញ្ជាក់​ថា នាវាដែលមានប្រវែងដល់ទៅ ៨២ម៉ែត្រ និងមានតម្លៃចន្លោះពី ១០០ ទៅ ១២០លានដុល្លារនេះ គឺជាកប៉ាល់កម្សាន្តធំជាងគេទីពីររបស់លោក ពូទីន ហើយវាក៏ធ្លាប់បង្ហាញខ្លួនជាច្រើនដងនៅទីក្រុង Sochi រាល់ពេលដែលមេដឹកនាំរុស្ស៊ីរូបនេះទៅសម្រាកលំហែកាយផង​ដែរ។

នៅដើមខែកុម្ភៈ ឆ្នាំ២០២២ ពោលគឺតែប៉ុន្មានសប្តាហ៍ប៉ុណ្ណោះ មុនពេលរុស្ស៊ីបើកការវាយប្រហារទ្រង់ទ្រាយធំលើអ៊ុយក្រែន នាវានេះត្រូវបានបញ្ជាឱ្យចាកចេញជាបន្ទាន់ពីរោងចក្រ Blohm & Voss ក្នុងប្រទេសអាល្លឺម៉ង់ ដែលពេលនោះវាកំពុងស្ថិតក្នុងដំណាក់កាលជួសជុល និងកែច្នៃបន្ថែម។ វាបានរត់គេចខ្លួនទៅកាន់តំបន់ Kaliningrad របស់រុស្ស៊ី ដើម្បីបង្ការកុំឱ្យរដ្ឋាភិបាលលោកខាងលិច ចាប់រឹបអូស។ នៅក្នុងខែមិថុនា ឆ្នាំ២០២២ ក្រសួងហិរញ្ញវត្ថុអាមេរិក បានប្រកាសជាផ្លូវការដាក់នាវា Graceful នេះចូលក្នុងបញ្ជីទ្រព្យសម្បត្តិដែលត្រូវបង្កក ដោយសារវាមានទំនាក់ទំនងផ្ទាល់ជាមួយលោក ពូទីន។ បន្ទាប់មក វិមានក្រឹមឡាំង បានផ្លាស់ប្តូរឯកសារផ្លូវការរបស់នាវានេះ ដោយប្តូរឈ្មោះពី Graceful ទៅជា Kosatka វិញ( ដែល​ជាភាសារុស្ស៊ី មានន័យថា «បាឡែនពិឃាត»)៕

ប្រែសម្រួល៖ ឈាង