​ក្រុមហ៊ុនជប៉ុន សិក្សាសក្ដានុពល​បង្កើតរោងចក្រនៅកម្ពុជា​

ក្រុមហ៊ុនរបស់ជប៉ុន Lion Corporation មានបំណងធ្វើការសិក្សា ដើម្បី​បណ្តាក់ទុនវិនិយោគ​បង្កើត​រោងចក្រនៅកម្ពុជា។ ​ក្រុមហ៊ុនមួយនេះ​មានមូលដ្ឋានផលិតកម្ម​នៅប្រ​ទេសវៀតណាម ថៃ ម៉ាឡេស៊ី និង​ឥណ្ឌូនេស៊ី។

​ក្រុមហ៊ុន ​Lion Corporation ​គឺជាក្រុមហ៊ុនជប៉ុន​ដ៏ធំមួយដែលត្រូវបានបង្កើតឡើងតាំងពីឆ្នាំ ១៩៨១ ផលិត​សាប៊ូកក់សក់ សាប៊ូបោកខោអាវ ច្រាសដុសធ្មេញ ថ្នាំដុសធ្មេញ និងផលិតផលថែរក្សា​សម្ផស្ស​ និងអនាម័យ​ផ្សេងៗទៀត។ ​​

លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា​នៅ​ថ្ងៃទី ១៣ ​កក្កដា ២០២៦ ​បានទទួល​ជួបពិភាក្សាការងារជាមួយគណៈប្រតិភូក្រុមហ៊ុន Lion Corporation ដឹកនាំដោយលោក Takenobu Yamamoto នាយកផ្នែកធុរកិច្ចអន្តរជាតិ។

​លោក ជា វុទ្ធី អគ្គលេខាធិការគណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជាបានថ្លែង​អរគុណ​ដល់គណៈប្រតិភូក្រុមហ៊ុនដែលបាន​សម្លឹងឃើញកម្ពុជាជា​គោលដៅសម្រាប់​ពង្រីក​ការ​វិនិយោគ​របស់ខ្លួន។​ ​

លោកអគ្គលេខាធិការក៏បានបញ្ជាក់ពីកិច្ចខិតខំប្រឹងប្រែងឥតឈប់ឈររបស់រាជរដ្ឋាភិបាលកម្ពុជា ក្នុងការកែលម្អបរិយាកាសវិនិយោគតាមរយៈការអភិវឌ្ឍហេដ្ឋារចនាសម្ព័ន្ធ និងការបន្តដាក់ចេញ​នូវវិធានការគាំទ្រនានាដល់ផ្នែកឯកជន សំដៅលើកកម្ពស់ភាពប្រកួតប្រជែងរបស់កម្ពុជា​ក្នុងបរិបទ​នៃស្ថានភាពពិភពលោកបច្ចុប្បន្ន។

លោកអគ្គលេខាធិការ បានជំរុញឱ្យក្រុមហ៊ុនរួសរាន់​សម្រេចចិត្តឱ្យបានឆាប់ក្នុង​ការវិនិយោគ​នៅកម្ពុជា ដោយត្រូវស្វែងរកទីតាំងសមស្របណាមួយ ជាពិសេស សូមពិចារណាទីតាំង​នៅក្នុង​តំបន់​សេដ្ឋកិច្ចពិសេស៕