ព័ត៌មានអន្ដរជាតិ

សភាបារាំង បើកផ្លូវឱ្យអ្នកជំងឺធ្ងន់ធ្ងរមានសិទ្ធិបញ្ចប់ជីវិត ដោយស្របច្បាប់

បានផុស

៣ ម៉ោង មុន

នៅ

ថ្ងៃសុក្រ ១៧ កក្កដា ២០២៦

ដោយ

តំណាងរាស្រ្តបារាំង បានអនុម័តសេចក្តីព្រាងច្បាប់មួយ ដែលនឹងបង្កើតសិទ្ធិស្របច្បាប់ក្នុងការជួយបញ្ចប់ជីវិតសម្រាប់មនុស្សពេញវ័យណាដែលមានជំងឺមិនអាចព្យាបាលបាន ឬក៏គ្មានលទ្ធភាពព្យាបាល បន្ទាប់ពីការជជែកវែកញែកខាងសីលធម៌ និងនយោបាយអំពើបញ្ហានេះ។

ទីភ្នាក់ងារសារព័ត៌មាន AFP និង Al Jazeera ផ្សាយនៅថ្ងៃទី១៥ ខែកក្កដា ឆ្នាំ២០២៦ ឱ្យដឹងថា ច្បាប់នេះ ត្រូវបានអនុម័តកាលពីថ្ងៃពុធនៅក្នុងសភាបារាំង នឹងអនុញ្ញាតឱ្យមនុស្សម្នាក់ទទួលបានសារធាតុមួយក្រោមលក្ខខណ្ឌតឹងរ៉ឹង ប្រសិនបើពួកគេស្នើសុំ។ សារធាតុនោះអាចត្រូវបានគ្រប់គ្រងដោយខ្លួនឯង ឬគ្រប់គ្រងដោយវេជ្ជបណ្ឌិត ឬគិលានុបដ្ឋាយិកា ប្រសិនបើអ្នកជំងឺមិនអាចធ្វើបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការទទួលបានជំនួយសម្រាប់ការបញ្ចប់ជីវិតនឹងត្រូវបានកំណត់ ចំពោះមនុស្សពេញវ័យជាពលរដ្ឋបារាំង ឬអ្នករស់នៅស្របច្បាប់នៅប្រទេសបារាំង និងអ្នកទទួលរងពីជំងឺណាមិនអាចព្យាបាលបាន ស្ថិតក្នុងដំណាក់កាលធ្ងន់ធ្ងរ ឬដំណាក់កាលចុងក្រោយ។

គួរបញ្ជាក់ថា ច្បាប់នេះក៏នឹងត្រូវបានរក្សាទុកសម្រាប់អ្នកជំងឺដែលជួបប្រទះនឹងទុក្ខវេទនាខាងរាងកាយ ឬផ្លូវចិត្តជាប់លាប់ទាក់ទងនឹងស្ថានភាពជាក់ស្តែង និងមានសមត្ថភាពពេញលេញក្នុងការធ្វើការសម្រេចចិត្តដោយសេរី។

សភាជាន់ទាប គឺរដ្ឋសភាបារាំង បានអនុម័តសេចក្តីសម្រេចនេះដោយសំឡេងគាំទ្រ ២៩១ ទល់នឹង ២៤១ ។ ជុំវិញរឿងនេះ ប្រធានាធិបតីបារាំង លោក Emmanuel Macron លើកឡើងលើបណ្តាញសង្គម X ថា៖ « ស្តីពីបញ្ហានេះ ជារឿងផ្ទាល់ខ្លួន ក៏ដូចជារឿងធ្ងន់ធ្ងរ និងទាក់ទងនឹងអាយុជីវិត ទុក្ខវេទនា និងសេចក្តីថ្លៃថ្នូរ មានតែវិធីសាស្រ្តមួយដែលអាចធ្វើទៅបាន គឺចំណាយពេលស្តាប់ ចូលរួមក្នុងការសន្ទនា និងធ្វើការជជែកពិភាក្សា»។

លោកបន្តថា៖ « នៅឆ្នាំ២០២២ ខ្ញុំបានប្តេជ្ញាចិត្តក្នុងការបង្កើតផ្លូវនេះ[ច្បាប់បញ្ចប់ជីវិត] រួមគ្នាជាមួយប្រជាជនបារាំង។ ដោយមានភាពជាមនុស្ស និងការគោរពយ៉ាងពេញលេញ ចំពោះលទ្ធិប្រជាធិបតេយ្យរបស់យើង ខ្ញុំបានគោរពការប្តេជ្ញាចិត្តនេះ»។

ប្រសិនបើក្រុមប្រឹក្សាធម្មនុញ្ញរបស់ប្រទេសនេះអនុម័តច្បាប់បញ្ចប់ជីវិត ប្រទេសបារាំងនឹងចូលរួមជាមួយប្រទេសហូឡង់ បែលហ្ស៊ិក ស្វីស និងកាណាដា ក្នុងការបញ្ចប់ជីវិតដោយមានជំនួយស្របច្បាប់។

ក្រុមអ្នកគាំទ្រនិយាយថា ច្បាប់នេះនឹងផ្តល់ឱ្យមនុស្សដែលប្រឈមនឹងទុក្ខវេទនាដែលមិនអាចទ្រាំទ្របាននៅចុងបញ្ចប់នៃជីវិត នូវស្វ័យភាព និងការគ្រប់គ្រងកាន់តែច្រើនលើរបៀបពួកគេជ្រើសរើស ខណៈរក្សាបាននូវការការពារយ៉ាងតឹងរ៉ឹង។

លោកស្រី Anne Raynaud តំណាងសមាគមបារាំងសម្រាប់សិទ្ធិអ្នកស្លាប់ដោយសេចក្តីថ្លៃថ្នូរ និយាយថា៖ « មនុស្សនឹងអាចសម្រេចចិត្តដោយខ្លួនឯងថាពេលណា និងរបៀបណាដែលពួកគេចង់ស្លាប់ ពេលដែលទុក្ខវេទនារបស់ពួកគេមិនអាចទ្រាំទ្របាន»៕

សម្រួល៖ ណឺ មិនា

Related Topics:បារាំង