ប្រសើរណាស់! ជប៉ុន ត្រៀមផ្តល់ប្រាក់ ៧០០ លានដុល្លារបន្ថែមទៅគម្រោង COVAX ទុកសម្រាប់ចាត់ចែងវ៉ាក់សាំងដល់ប្រទេសកំពុងអភិវឌ្ឍន៍

រដ្ឋាភិបាលជប៉ុន គ្រោងនឹងផ្តល់ថវិកាប្រមាណ ៧០០ លានដុល្លារបន្ថែមទៀត ដល់គម្រោង COVAX ក្នុងគោលបំណងធានាថា វ៉ាក់សាំងការពារជំងឺកូវីដ ១៩ ត្រូវបានចែកចាយឲ្យបានត្រឹមត្រូវ ។

គោលដៅរបស់គម្រោង COVAX គឺដើម្បីផ្តល់វ៉ាក់សាំង ឲ្យបណ្តាប្រទេស និងដែនដីជុំវិញពិភពលោក ចំនួន ១.៨ ពាន់លានដូស នៅចុងឆ្នាំនេះ ។

ចំនួននេះ គឺគ្រប់គ្រាន់ដើម្បីចាក់ដល់ ប្រជាជនប្រមាណ ៣០ ភាគរយ នៃប្រទេស និងតំបន់កំពុងអភិវឌ្ឍន៍ នៅលើពិភពលោក ។

ទន្ទឹមនោះគម្រោង COVAX និយាយថា ខ្លួនត្រូវការថវិកាចំនួន ៨.៣ ពាន់លានដុល្លារ សម្រាប់គម្រោងនេះ និងតិចជាង ១.៧ ពាន់លានដុល្លារ ។

បន្ថែមពីនេះ ប្រទេសជប៉ុន ក៏បានចូលរួមវិភាគទាន ២០០ លានដុល្លាររួចទៅហើយផងដែរ ។ ប្រទេសនេះ បានសម្រេចចិត្តផ្តល់ថវិកាបន្ថែម ព្រោះជឿជាក់ថា ការចាក់វ៉ាក់សាំង ចាំបាច់ត្រូវធ្វើឲ្យបានទូលំទូលាយ នៅទូទាំងពិភពលោក ដើម្បីកម្ចាត់ជំងឺរាតត្បាត ។

ស្របពេលជាមួយគ្នានោះ លោកនាយករដ្ឋមន្រ្តី Suga Yoshihide រំពឹងថានឹងធ្វើការប្រកាស អំពីការចូលរួមចំណែកបន្ថែមនេះ នៅក្នុងកិច្ចប្រជុំកំពូលវ៉ាក់សាំង តាមអនឡាញ ដែលគ្រោងនឹងធ្វើឡើងនៅថ្ងៃទី ២ ខែមិថុនា ។ កិច្ចប្រជុំកំពូលនេះ ត្រូវបានឧបត្ថម្ភដោយប្រទេសជប៉ុន និងសម្ព័ន្ធវ៉ាក់សាំង Gavi ជាអង្គការអន្ដរជាតិ ដែលព្យាយាមធ្វើឲ្យវ៉ាក់សាំង កាន់តែមានច្រើន នៅក្នុងប្រទេសកំពុងអភិវឌ្ឍន៍ ។

ជាចុងក្រោយ រដ្ឋាភិបាលជប៉ុន គ្រោងនឹងលើកទឹកចិត្តប្រទេសដទៃទៀត ឲ្យចូលរួមក្នុងកិច្ចប្រជុំកំពូលនេះ និងផ្តល់ប្រាក់ទៅឲ្យគម្រោង COVAX ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ COVAX ផ្ដល់វ៉ាក់សាំងកូវីដ ១០០ លានដូសដល់ប្រទេសក្រីក្របំផុតនៅលើពិភពលោក