គ្រាន់តែក្រដាសសរសេរដៃមួយសន្លឹករបស់អ្នកប្រាជ្ញរូបវិទ្យា Albert Einstein លក់បានថ្លៃជាងមួយលានដុល្លារ

ក្រដាសសរសេរដោយដៃមួយសន្លឹករបស់អ្នកប្រាជ្ញរូបវិទ្យា អាល់ប៊ឺត អាញស្តាញ (Albert Einstein) លក់បានថ្លៃជាង ១.២ លានដុល្លារអាមេរិក នៅក្នុងការដេញថ្លៃផ្សាយពាណិជកម្មដែលធ្វើនៅទីក្រុង បូស្តុន កាលពីសុក្រ សប្ដាហ៍មុន។

អ្នករក្សាឯកសារ មកពីគម្រោងឯកសារ Einstein នៃវិទ្យាស្ថានបច្ចេកវិទ្យាកាលីហ្វ័រញ៉ា រួមនឹងសាកលវិទ្យាល័យ Hebrew នៃទីក្រុងយេរូសាឡិមនិយាយថា ពីមុនមកមានតែឧទាហរណ៍សរសេរដៃរបស់ អាញស្តាញ តែ ៣ ប៉ុណ្ណោះត្រូវបានគេស្គាល់ ហើយនេះជាឧទាហរណ៍សមីកាសរសេរដៃទី ៤ ទើបនឹងផ្សព្វផ្សាយជាសាធារណៈនាពេលថ្មីៗ។  

វាជាក្រដាសសំខាន់មួយអំពីទ្រឹស្តីរូបវិទ្យា E = mc²  ហើយក៏ជាសមីការដ៏ល្បីល្បាញបំផុតនៅលើពិភពលោក។

លិខិតមួយទំព័រនេះសរសេរជាភាសាអាល្លឺម៉ង់ផ្ញើទៅកាន់រូបវិទូជនជាតិអាមេរិកាំង-ប៉ូឡូញគឺលោក Ludwik Silberstein ដែលវាបានចុះកាលបរិច្ឆេទនៅថ្ងៃទី ២៦ ខែតុលា ឆ្នាំ ១៩៤៦ ។

ដោយសារលោកមក Silberstein គឺជាអ្នករិះគន់និងជាអ្នកប្រឆាំងដ៏ល្បីម្នាក់ចំពោះទ្រឹស្តីរបស់ អាល់ប៊ឺត អាញស្តាញ ទើបបានជាអ្នកប្រាជ្ញរូបនេះបានសរសេរលិខិតមួយនេះដើម្បីបកស្រាយទ្រឹស្ដីរបស់ខ្លួន។ ចំណែកលិខិតនេះក៏ជាកម្មសិទ្ធិរបស់កូនចៅលោក Ludwik Silberstein និងក្រោយមកវាបានដាក់លក់នៅក្នុងការដេញថ្លៃ។

ការដេញថ្លៃបានប្រព្រឹត្តទៅយ៉ាងស្វិតស្វាញនៅពេលចាប់ផ្ដើម ក្នុងនោះដែរគេរំពឹងថា ក្រដាសមួយសន្លឹកនេះអាចលក់បានប្រហែល ៤០ ម៉ឺនដុល្លារ។ លុះតម្លៃឡើងដល់ប្រហែល ៧០ ម៉ឺនដុល្លារ មានតែពីរក្រុមប៉ុណ្ណោះនៅបន្តដេញថ្លៃ រហូតក្រដាសសមីការមួយសន្លឹកនេះអាចលក់បានជាង ១.២ លានដុល្លារអាមេរិក៕

ប្រែសម្រួល៖ សន្យា

ប្រភព៖ BBC News

ចុចអាន៖ រឿងអ្វីខ្លះដែលយើងមិនដឹងអំពីកំពូលទស្សនៈវិទូរូបវិទ្យាលោក Albert Einstein ?

ចុចអាន៖ ព័ត៌មានក្លែងក្លាយ អាចសាយភាយលឿនបានដោយរបៀបណា?