មិនចេះតិច! ករណីឆ្លងកូវីដថ្មីនៅអង់គ្លេស ៩១ ភាគរយជាវីរុសបំប្លែងខ្លួនឥណ្ឌា “Delta”

រដ្ឋមន្ត្រីក្រសួងសុខាភិបាលអង់គ្លេសលោក Matt Hancock បាននិយាយកាលពីថ្ងៃព្រហស្បតិ៍ថា វីរុសបំប្លែងខ្លួនឥណ្ឌា “Delta” កំពុងវាយលុកខ្លាំងនៅចក្រភពអង់គ្លេស ពោលក្នុងចំណោមករណីឆ្លងថ្មី នៃជំងឺកូវីដ ១៩ នៅក្នុងប្រទេសនេះរកឃើញវីរុសឥណ្ឌា ៩១ ភាគរយ ។

ថ្លែងទៅកាន់គណៈកម្មាធិការសមាជិកសភាលោក Matt Hancock បានបញ្ជាក់ថា វីរុសបំប្លែងខ្លួនដែលមានដើមកំណើត មកពីប្រទេសឥណ្ឌា ឥលូវនេះគឺជាវីរុសបំប្លែងខ្លួន ដែលលេចធ្លោជាងគេនៅក្នុងប្រទេស ហើយអាចចម្លងច្រើនជាងវីរុសបំប្លែងខ្លួន Kent ដែលមានប្រភពមកពីចក្រភពអង់គ្លេស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រីក្រសួងសុខាភិបាលបាននិយាយថា “ការវាយតម្លៃដែលខ្ញុំបានឃើញគឺថា បច្ចុប្បន្នវីរុសបំប្លែងខ្លួន Delta មានចំនួន ៩១ ភាគរយនៃករណីឆ្លងថ្មីចំនួន ៧,៣៩៣ ករណី នៅក្នុងចក្រភពអង់គ្លេស កាលពីថ្ងៃព្រហស្បតិ៍” ។

ក្រោយការរកឃើញករណីឆ្លងដ៏ច្រើនសន្ធឹកសន្ធាប់នេះ រដ្ឋាភិបាលក៏បានបង្កើតគម្រោងធ្វើតេស្ត និងចាក់វ៉ាក់សាំង នៅភាគខាងជើងនៃប្រទេសអង់គ្លេស ដែលមានការកើនឡើងនៃការឆ្លង។

នៅក្នុងទីក្រុង Bolton ទីក្រុង Manchester និងតំបន់ Midlands នៃទីក្រុង Calderdale ប្រជាជនត្រូវបានជំរុញឲ្យធ្វើតេស្ត និងទទួលការចាក់វ៉ាក់សាំងពេញ ២ ដូស ខណៈប្រជាជនក្នុងតំបន់ ក៏ត្រូវបានណែនាំមិនឲ្យធ្វើដំណើរ ទៅតំបន់ផ្សេងទៀតនៃប្រទេស ក្នុងគោលបំណងបញ្ឈប់ការរាលដាលនេះ ។

ទន្ទឹមនោះ គិតត្រឹមថ្ងៃទី ១០ មិថុនា ប្រជាជនជាង ៤០ លាននាក់ បានទទួលការវ៉ាក់សាំងដូសដំបូង ហើយមនុស្សជាង ២៨ លាននាក់ ទទួលការចាក់ដូសទី ២ ក្នុងចន្លោះរយៈពេល ៣ សប្តាហ៍ ខណៈករណីឆ្លងជំងឺកូវីដ ១៩ នៅអង់គ្លេស ពេលនេះមានជាង ៤.៥ លានករណី និងមានអ្នកស្លាប់ ១២៧,៨៦៧ នាក់ ហើយក៏មានអ្នកជាសះស្បើយជាង ៤.២ លាននាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ពល​រដ្ឋ​អង់គ្លេស​ជាង​ ៣៧ ​ម៉ឺន​នាក់​នៅ​មាន​អាការ​ធ្វើ​ទុក្ខ​ ក្រោយព្យាបាលកូវីដមួយឆ្នាំ

ចុចអាន ៖ រយៈពេល ៣ ខែ ទើបនាយករដ្ឋមន្ត្រីអង់គ្លេស Boris Johnson ទទួលការចាក់វ៉ាក់សាំងដូសទី ២