ព័ត៌មានអន្ដរជាតិ

អ្នកជំនាញ WHO នឹងទៅជួយវៀតណាមផលិតវ៉ាក់សាំងកូវីដ

បានផុស

៥ years មុន

នៅ

ថ្ងៃសៅរ៍ ២៦ មិថុនា ២០២១

ដោយ

កាលពីថ្ងៃព្រហស្បតិ៍ អង្គការសុខភាពពិភពលោក (WHO) និយាយថា ខ្លួននឹងបញ្ជូនអ្នកជំនាញរបស់ខ្លួនទៅប្រទេសវៀតណាមដើម្បីជួយជ្រោមជ្រែងក្នុងការស្រាវជ្រាវ និងផលិតវ៉ាក់សាំងបង្ការកូវីដ-១៩។

ក្រោយពេលជួបពិភាក្សាគ្នាតាមទូរសព្ទជាមួយ Tedros Adhanom Ghebreyesus អគ្គលេខាធិការ WHO លោកនាយករដ្ឋមន្ត្រីវៀតណាម Pham Minh Chinh បានសាទរចំពោះការសម្រេចចិត្តនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនាយករដ្ឋមន្ត្រីបន្ថែមថា វៀតណាមគាំទ្រដល់កិច្ចខិតខំប្រឹងប្រែងសម្រាប់កិច្ចសហប្រតិបត្តិការឱសថសកល និងកោតសរសើរចំពោះតួនាទីរបស់ WHO នៅក្នុងការសម្របសម្រួលកិច្ចខិតខំប្រឹងប្រែងអន្តរជាតិដើម្បីប្រយុទ្ធនឹងការរាតត្បាតរបស់កូវីដ-១៩ ខណៈកំពុងជំរុញឲ្យបណ្តាប្រទេសទទួលបានវ៉ាក់សាំងស្មើភាពគ្នា។

លោកបន្តថា នៅពេលវិបត្តិកូវីដបន្តវាយលុកតំបន់ជាច្រើន ជាពិសេសការរកឃើញវីរុសបំប្លែងខ្លួនថ្មី លោក Chinh បានស្នើដល់អង្គការសុខភាពពិភពលោកផ្តល់ការគាំទ្រ និងអាទិភាពដល់ប្រទេសវៀតណាមឲ្យទទួលបានវ៉ាក់សាំងបង្ការកូវីដ-១៩តាមរយៈគម្រោងសកល Covax។ វៀតណាមបានអនុវត្តកម្មវិធីចាក់វ៉ាក់សាំងបង្ការកូវីដ-១៩ខ្លួនប្រកបដោយប្រសិទ្ធភាព សុវត្ថិភាព និងទាន់ពេលវេលា។

មនុស្សច្រើនកកកុញនៅវៀតណាមចូលចាក់វ៉ាក់សាំង

លោក Chinh ក៏ស្នើដល់ WHO ឲ្យគាំទ្រ និងជួយដល់វៀតណាមឲ្យក្លាយជាមជ្ឈមណ្ឌលផលិតវ៉ាក់សាំងបង្ការកូវីដ-១៩ប្រចាំតំបន់ប៉ាស៊ីហ្វិកខាងលិច។ លោកបន្ថែមថា អាជីវកម្មវៀតណាម និងកម្លាំងពេទ្យមានសមត្ថភាពក្នុងការផលិតវ៉ាក់សាំងកូវីដតាមស្តង់ដារអន្តរជាតិ។

ជាការឆ្លើយតប លោកអគ្គលេខាធិការ Tedros មានប្រសាសន៍ថា WHO ទទួលយកការស្នើសុំរបស់វៀតណាមដើម្បីផ្តល់អាទិភាពសម្រាប់ការទទួលបានវ៉ាក់សាំង និងការក្លាយជាមជ្ឈមណ្ឌលផលិតវ៉ាក់សាំងមួយប្រចាំតំបន់។

លោក Tedros បានឲ្យដឹងថា កង្វះវ៉ាក់សាំងជាសកលកំពុងកើនមានប៉ះពាល់ដល់ការផ្គត់ផ្គង់របស់គម្រោង Covax ដល់បណ្តាប្រទេសជាច្រើនមានទាំងវៀតណាមផង។ លោកអរគុណដល់រដ្ឋាភិបាលវៀតណាមដែលបានប្តេជ្ញាផ្តល់ប្រាក់៥០ម៉ឺនដុល្លារអាមេរិកដល់គម្រោង Covax៕