កីឡា

សហព័ន្ធខ្មែរកីឡាអត្តពលកម្មស្ម័គ្រចិត្ត ប្តូរមេថ្មីសម្រាប់អាណត្តិទី៧

បានផុស

៥ years មុន

នៅ

ថ្ងៃពុធ ៣០ មិថុនា ២០២១

ដោយ

លោក សំហេង បុរស រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនិតិសម្បទា ត្រូវបានតែងតាំងជាប្រធានសហព័ន្ធខ្មែរកីឡា អត្តពលកម្មស្ម័គ្រចិត្ត សម្រាប់អាណត្តិទី៧ ជំនួសលោក អ៊ុក សិទ្ធិជាតិ អគ្គនាយកកីឡា និងជាអតីតប្រធានចាស់ ដែលលាឈប់ដោយសាររូបលោកជាប់រវល់ការងារ នាព្រឹកថ្ងៃទី៣០ ខែមិថុនា ឆ្នាំ២០២១នៅទីស្នាក់ការគណៈកម្មាធិការជាតិអូឡាំពិកកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសតែងតាំងប្រធានថ្មីនេះ បានធ្វើឡើងក្នុងឱកាសប្រារព្ធសន្និបាតវិសាមញ្ញសហព័ន្ធខ្មែរកីឡាអត្តពលកម្មស្ម័គ្រចិត្ត ដោយមានការអញ្ជើញចូលរួមពីសំណាក់លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា លោក អ៊ុក សិទ្ធិជាតិ អតីតប្រធាន និងជាអគ្គនាយកនៃអគ្គនាយកដ្ឋានកីឡា និងតំណាងនាយកដ្ឋានកីឡានានាក្រោមឱវាទក្រសួងអប់រំ យុវជន និងកីឡា។

សម្រាប់អាណត្តិថ្មីនេះ សមាជិកគណៈកម្មាធិការប្រតិបត្តិសហព័ន្ធមានចំនួន១៣រូប រួមមានលោក សំហេង បុរស ជាប្រធាន លោក ផៃ សុខ និងលោក ដាំ ភិរម្យ អនុប្រធាន លោក ធម្ម អង្គារ៉ា លោក ហ៊ុន សាមុត លោក ដួង មាសចំរើន លោក ប៉ែន វុទ្ធី លោក ប៉ុន សុខ លោក ឃួន លីវី លោក ម៉ក់ ច័ន្ទរិទ្ធ លោក ពៅ វណ្ណា និងលោក នង សារុន សមាជិក និងលោក ឡោ ម៉េង អគ្គហេរញ្ញិក។

លោក សំហេង បុរស បានមានប្រសាសន៍ថា លោកនឹងបន្តអភិវឌ្ឍកីឡាមួយនេះ បន្តពីលោក អ៊ុក សិទ្ធិជាតិ អតីតប្រធានឱ្យមានការរីកចម្រើន ហើយលោកនឹងស្នើសុំឱ្យលោកនៅជាមួយសហព័ន្ធដដែល ដើម្បីជួយគ្នាអភិវឌ្ឍឆ្ពោះទៅមុខត្រៀម SEA GAMES 2021 លើកទី៣១ នៅប្រទេសវៀតណាម និង SEA GAMES 2023 លើកទី៣២នៅកម្ពុជា៕

ដោយ ៖ វិសិទ្ធ