ព័ត៌មានជាតិ

ប្ដូរពីធ្វើការរោងចក្រ មកលក់ចេកចៀន ប្ដីប្រពន្ធមួយគូ ទទួលបានកម្រៃគុណជាបី

បានផុស

៦ years មុន

នៅ

ថ្ងៃចន្ទ ២៣ វិច្ឆិកា ២០២០

ដោយ

អតីតកម្មកររោងចក្រកាត់ដេរពីរនាក់ប្តីប្រពន្ធ បានចាប់យករបរចៀនចេក និងដំឡូងលក់មុខផ្ទះ ដោយទទួលប្រាក់ចំណេញខ្ពស់ នឹកស្មានមិនដល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតពីរនាក់ប្តីប្រពន្ធ ដែលកំពុងចៀនចេក និងដំឡូងលក់ នៅតាមបណ្ដោយផ្លូវបេតុងតាង៉ូវ ភូមិតាង៉ូវ សង្កាត់និរោធ ខណ្ឌច្បារអំពៅ រាជធានីភ្នំពេញ បានកំពុងញាប់ដៃញាប់ជើងវេចខ្ចប់នំជូនដល់ភ្ញៀវទាំងទឹកមុខញញឹមស្រស់ ព្រោះប្រាក់កម្រៃ ដែលបានមកពីលក់ មិនក្រោម២០ម៉ឺនរៀល ដោយផាត់ចេញប្រាក់ដើម។

អតីតកម្មកររោងចក្រទាំងពីរនាក់ប្តីប្រពន្ធ បាននិយាយថា ពីមុនមកពួកគាត់បានបម្រើការជាកម្មករកាត់ដេរមួយកន្លែង នៅតាមបណ្ដោយផ្លូវវេងស្រេង។ លុះដល់កើតជំងឺកូវីដ-១៩ នាដើមឆ្នាំ២០២០នេះ រោងចក្រកាត់ដេរ បានផ្អាកការងារបណ្ដោះអាសន្ន ធ្វើឲ្យពួកគាត់ត្រូវចាប់យករបរលក់ចេកចៀន និងដំឡូងលក់។ បន្ថែមលើនោះ បើគិតពីប្រាក់ចំណេញវិញ គឺក្នុងមួយថ្ងៃ ខ្ញុំទាំងពីរ អាចរកបានមិនក្រោម២០ម៉ឺនរៀល។

ប្ដីប្រពន្ធមួយគូនេះ បានបញ្ជាក់ថា បើគិតពីប្រាក់កម្រៃលក់ចេកចៀនរាល់ថ្ងៃនេះ គឺខុសគ្នាមេឃ និងដី។ ដែលកាលនៅបម្រើការរោងចក្រកាត់ដេរ គឺទាំងពីរនាក់ប្តីប្រពន្ធ បានប្រាក់សរុប ៥០០ដុល្លារ។ បើប្រៀបធៀបពីប្រាក់ចំណូលពីការងាររោងចក្រ និងប្រាក់កម្រៃលក់ចេក និងដំឡូងចៀនវិញ គឺខុសគ្នា ព្រោះរបរលក់នេះ បានមិនក្រោម ១ ៥០០ ដុល្លារ ឯណោះ៕

អត្ថបទ ៖ នរា

សូមចុចអាន៖ កសិករខេត្តឧត្តរមានជ័យ កំពុងប្រឈមខ្វះខាតម៉ាស៊ីនច្រូតកាត់ប្រមូលផលស្រូវ

Related Topics:មុខរបរ