គួរដឹង! អាការលេចចេញក្រោយចាក់ AstraZeneca ដែលជាវ៉ាក់សាំង ចាក់ដូសទី៣

មាន​ប្រសា​ស​ន៍​តាមរយៈ​សា​ជាសំឡេង ដែល​ត្រូវ​បាន​ផ្សព្វផ្សាយកាលពី​រសៀល​ថ្ងៃទី​០៦ ខែសីហា សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា បាន​បញ្ជា​ឲ្យ​ចាប់ផ្តើម​ចាក់​វ៉ាក់សាំង​ដូ​ស​ទី​៣ នៅ​ស​ប្តា​ហ៍​ទី​២ នៃ​ខែសីហា​នេះ ដោយ​ចាប់ផ្តើម​ពី​ក្រុមការងារ​ជួរមុខ​នៅតាម​ព្រំដែន​កម្ពុជា​-​ថៃ។

សម្តេច​តេ​ជោ ហ៊ុន សែន ក៏បានស្នើ​ឲ្យ​លោកជំទាវ ឱ វណ្ណឌី​ន អនុវត្ត​នូវ​ការចាក់​វ៉ាក់សាំងនេះឲ្យ​ក្រុមការងារ​នៅ​ជួរមុខ នៅតាម​ជាប់​ព្រំដែន​កម្ពុជា​-​ថៃ ពីព្រោះ​បងប្អូន​ទាំងនេះ ​ទទួល​ហានិភ័យ​ខ្ពស់ ក្រោយពី​មាន​បងប្អូន​ពលករ​ខ្មែរ​យ៉ាងច្រើន បាន​ត្រឡប់​មកពី​ប្រទេស​ថៃ​ចូល​កម្ពុជា​វិញ ដូច្នេះ​ត្រូវ​ដឹក​ជាបន្ទាន់​នូវ​វ៉ាក់សាំង AstraZeneca ទៅកាន់​ព្រំដែន ដើម្បី​ចាក់​ជូន​គ្រូពេទ្យ កងទ័ព​នគរបាល អាវុធហត្ថ ក៏ដូចជា​មន្ត្រីរាជការ​នានា ដែល​ពាក់ព័ន្ធ​។

វ៉ាក់សាំង AstraZeneca ដែលកម្ពុជាទើបទទួលបាននេះ គឺជាវ៉ាក់សាំងបង្ការកូវីដ-១៩ របស់សាកលវិទ្យាល័យ Oxford នៃចក្រភពអង់គ្លេស។ វ៉ាក់សាំងនេះបានអនុម័តឲ្យប្រើប្រាស់ជាផ្លូវការដោយ អង្គការសុខភាបពិភពលោក (WHO) កាលពីថ្ងៃទី ១៥ ខែកុម្ភៈ ឆ្នាំ២០២១។ វាត្រូវបានទទួលស្គាល់គុណភាព និងប្រសិទ្ធភាពស្របតាមស្ដង់ដារបច្ចេកទេសអន្តរជាតិ។

តើវ៉ាក់សាំង AstraZeneca បង្កផលរំខានដូចម្ដេច ក្រោយពេលចាក់?

ក្រោយពេលចាក់ វ៉ាក់សាំង AstraZeneca អ្នកនឹងមានអាការដូចជា៖

• ឈឺចាប់នៅកន្លែងចាក់ថ្នាំ
• ឈឺក្បាល
• អស់កម្លាំង
• ឈឺសាច់ដុំ
• គ្រុនក្តៅនិងញាក់។ បញ្ជាក់៖ គ្រុនក្តៅច្រើនកើតលើមនុស្សអាយុក្រោម ៤០ ឆ្នាំព្រោះរាងកាយឆ្លើយតបទៅនឹងវ៉ាក់សាំងបានល្អជាងមនុស្សចាស់។ អាការនេះមិនមានគ្រោះថ្នាក់ទេ ហើយបាត់ទៅវិញដោយខ្លួនឯងក្នុងរយៈពេល ១ទៅ២ ថ្ងៃ
• ឈឺសន្លាក់និងចង្អោរ

ក៏អាចមានរោគសញ្ញាផ្សេងទៀតផងដែរ ដូចជា៖

• ហើម ឡើងក្រហមនិងឡើងកំដៅនៅកន្លែងចាក់ថ្នាំ
• ចេញស្នាមជាំស្រាល
• ចេញកន្ទួលស្រាល
• មានអារម្មណ៍មិនស្រួលខ្លួន
• រោគសញ្ញាដូចជាផ្តាសាយ
• ឈឺបំពង់ក
• ក្អួតមិនលើសពី ៥ ដង (ករណីកម្រ)

គួរបញ្ជាក់ថា រោគសញ្ញាទាំងនេះភាគច្រើនគឺ ស្រាល ហើយជាធម្មតា បាត់ទៅវិញដោយខ្លួនឯងក្នុងរយៈពេល ១ ទៅ ៣ ថ្ងៃឬក្នុងសប្តាហ៍ដំបូងបន្ទាប់ពីចាក់វ៉ាក់សាំង៕

ប្រែសម្រួល៖ Vann Vann

ប្រភព៖ Kapook

ចុចអាន៖ លម្អិត! វ៉ាក់សាំងដែលកម្ពុជាយកមកចាក់ដូសទី៣ មានប្រសិទ្ធភាពអស្ចារ្យប្រឆាំងកូវីដ និង Delta