អ្នកចាក់ Johnson & Johnson​ អាចចាក់វ៉ាក់សាំងដូសជំរុញបានឬអត់?

ស្របពេលដែលសហរដ្ឋអាមេរិកប្រកាសចាក់ដូសជំរុញជូនពលរដ្ឋដែលធ្លាប់ចាក់វ៉ាក់សាំង Pfizer និង Moderna ពីរដងរួចហើយ អ្នកធ្លាប់វ៉ាក់សាំង Johnson & Johnson កំពុងមានចម្ងល់ថា តើពួកគេអាចទទួលបានការពារប៉ុនណា ហើយអាចចាក់ដូសជំរុញបានដែរទេ?

ពាក់ព័ន្ធនឹងចម្ងល់នេះ អ្នកជំនាញឆ្លើយថា វ៉ាក់សាំងទាំងអស់ដែលបានប្រើនៅសហរដ្ឋអាមេរិករួមទាំងវ៉ាក់សាំង J&J សុទ្ធសឹងអាចការពារការចូលព្យាបាលនៅមន្ទីរពេទ្យ និងបន្ថយហានិភ័យស្លាប់ដោយសារCovid-19 ។ មិនតែប៉ុណ្ណោះ ការចាក់វ៉ាក់សាំង J&J អាចប្រឆាំងនឹងវីរុសបំប្លែងខ្លួន Delta បានខ្លាំងផងដែរ។

វេជ្ជបណ្ឌិត Amesh Adalja អ្នកជំនាញខាងជំងឺឆ្លងមកពីសាលាសុខភាពសាធារណៈ Johns Hopkins Bloomberg ថ្លែងថា មិនទាន់មានទិន្នន័យបញ្ជាក់អំពីអគុណភាពនៃវ៉ាក់សាំង J&J នៅឡើយ។ លោកលើកឡើងដូច្នេះ ដើម្បីបញ្ជាក់ថា អ្នកចាក់វ៉ាក់សាំង J&J នៅតែអាចទទួលបានការការពារ ទោះបីជាមិនទាន់ចាក់ដូសជំរុញ។

ចំណែក វេជ្ជបណ្ឌិត Vivek Murthy គ្រូពេទ្យវះកាត់ទូទៅអាមេរិក និយាយថា ការចាក់ដូសជំរុញទំនងជាត្រូវការវ៉ាក់សាំង J&J ។ ប៉ុន្តែពេលនេះ មន្ត្រីសុខាពិបាលកំពុងប្រមូលទិន្នន័យបន្ថែម រួចនឹងសម្រេចក្នុងប៉ុន្មានសប្តាហ៍ខាងមុខថា តើវ៉ាក់សាំង J&J ត្រូវប្រើជាដូសជំរុញឬយ៉ាងណា។

ការចាក់វ៉ាក់សាំង J&J ត្រូវបានធ្វើឡើងខុសគ្នាពីវ៉ាក់សាំងផ្សេង ដោយសារតម្រូវការចាក់តែមួយដូសប៉ុណ្ណោះ។ ការសិក្សាមួយរបស់មន្ត្រីសុខាភិបាលនៅអាហ្វ្រិកខាងត្បូងបានបង្ហាញថា វ៉ាក់សាំងនេះអាចការពារបាន ៧១ភាគរយប្រឆាំងនឹងការចូលសម្រាកនៅមន្ទីរពេទ្យដោយវីរុសបំប្លែងខ្លួន Delta និងចន្លោះពី ៩១-៩៦ភាគរយមានប្រសិទ្ធភាពប្រឆាំងនឹងការស្លាប់។

ក្រុមហ៊ុន J&J ក៏បានបង្ហាញទិន្នន័យមន្ទីរពិសោធន៍ស្តីពីអង់ទីគ័រប្រឆាំងទៅនឹងវីរុសថា វ៉ាក់សាំងរបស់ខ្លួន អាចការពារប្រឆាំងកូវីដបំប្លែងខ្លួនប្រភេទ Delta រយៈពេល ៨ខែ។

ដោយឡែកចម្ងល់ដែលថា គួរឬមិនគួរចាក់វ៉ាក់សាំង J&J ជាដូសជំរុញ ទាំងអ្នកជំនាញ និងក្រុមហ៊ុនផ្ទាល់ កំពុងតែស្ថិតក្នុងដំណើរការសិក្សានៅឡើយ៕

ប្រែសម្រួល៖ សន្យា

ប្រភព៖ nbc news

ចុចអាន៖ ចាក់វ៉ាក់សាំងរួច ដូសទីប៉ុន្មានក៏ដោយ សកម្មភាពទាំងនេះ ដាច់ខាតកុំធ្វើឱ្យសោះ

ចុចអាន៖ អ្នកមានជំងឺរ៉ាំរ៉ៃប៉ុន្មានមុខនេះ អាចចាក់វ៉ាក់សាំង Johnson & Johnson បានដោយសុវត្ថិភាព

ចុចអាន៖ ក្រោយចាក់វ៉ាក់សាំង Johnson & Johnson រួច យុវវ័យ និងមនុស្សចាស់ ត្រូវប្ដូរទម្លាប់ហូបចុកភ្លាមៗ