ព័ត៌មានជាតិ

ផ្ទុះកូវីដក្នុងថ្នាក់រៀន ក្រសួងអប់រំប្រកាសផ្អាកដំណើរការថ្នាក់រៀនសាលាចំនួន៥នៅភ្នំពេញ

បានផុស

៥ years មុន

នៅ

ថ្ងៃសុក្រ ១៧ កញ្ញា ២០២១

ដោយ

ក្រសួងអប់រំយុជន និងកីឡា បានស្នើឱ្យមន្ទីរអប់រំយុវជន និងកីឡា រាជធានីភ្នំពេញ ធ្វើការផ្អាកដំណើរការថ្នាក់រៀននៅសាលារៀនចំនួន៥ជាបណ្តោះអាសន្ន រយៈពេល១៤ថ្ងៃ និងយកអ្នកពាក់ព័ន្ធផ្ទាល់ទៅធ្វើចត្តាឡីស័កក្រោយមានផ្ទុះជំងឺកូវីដ១៩ នៅក្នុងថ្នាក់រៀននៅក្នុងសាលាទាំងនោះរួចមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីជូនដំណឹងរបស់ក្រសួងអប់រំយុវជននិងកីឡាចុះថ្ងៃទី១៧ ខែកញ្ញានេះបានឱ្យដឹងថា ថ្នាក់រៀនដែលត្រូវផ្អាកបណ្តោះអាសន្ននោះរួមមានទី១វិទ្យាល័យពញាពន់ ផ្អាកថ្នាក់ទី៩B ។ ២ វិទ្យាល័យបឹងប្រិយ៍ ថ្នាក់រៀនផ្អាកថ្នាក់ទី១២A1, ៩C1,និង៩ D១ ។ ទី៣. វិទ្យាល័យបឹងធំ ផ្អាកថ្នាក់ទី៧A2។ ៤.វិទ្យាល័យវត្តភ្នំ ផ្អាកថ្នាក់ទី ៩H2 ៩D2 ៩B2 ៩ B1 ៩H2 ១២C2 ១២C1១២B2និង១២ H2។ ៥ វិទ្យាល័យវត្តកោះ ថ្នាក់ទី៧P។

ក្រសួងបានណែនាំបន្តថា ចំពោះថ្នាក់ដទៃទៀតត្រូវបន្តដំណើរការជាធម្មតា ប៉ុន្តែត្រូវបន្តរិតត្បិតការចេញលេង និងបន្តពាក់ម៉ាស និងលាង ដៃជាប្រចាំ។ មិនអនុញ្ញាតឲ្យមានការទាក់ទង ពីសិស្សម្នាក់១ទៅថ្នាក់១ទៀត និងមិនអនុញ្ញាតឱ្យមានការជួបជុំ ឬប្រជុំ ក្រៅពីការសិក្សាក្នុងសាលារៀនឡើយ។

សាលារដ្ឋនិងឯកជនកម្រិតចាប់ពីថ្នាក់ទី៧រហូតដល់ថ្នាក់ទី១២ចំនួន១៤២សាលាបានបើកដំណើរការឡើងវិញនៅព្រឹកថ្ងៃទី១៥ ខែកញ្ញា ឆ្នាំ២០២១កន្លងទៅនេះ ក្នុងនោះមានសាលារដ្ឋចំនួន៦៨ទីតាំងនិងសាលាឯកជនមាន១៥៩ទីតាំង។

គួរបញ្ជាក់ថា បច្ចុប្បន្ននេះមានរាជធានីខេត្តមួយចំនួនកំពុងបើកដំណើរការសាលារៀនឡើងវិញដោយផ្តោតទៅលើថ្នាក់ទៅ៩និងថ្នាក់ទី១២ប៉ុណ្ណោះដោយសារជាឆ្នាំដែលត្រូវប្រឡង។ ចំណែកខេត្តផ្សេងៗទៀតកំពុងរៀបចំបើកដំណើរការជាបន្តបន្ទាប់ទៀត ដោយសារត្រូវបោសសំអាតនិងបាញ់ថ្នាំសម្លាប់មេរោគបន្ទាប់ពីសាលារៀនទាំងនោះត្រូវយកធ្វើជាមណ្ឌលព្យាបាលជំងឺកូវីដ១៩ឬធ្វើជាមណ្ឌលចត្តាឡីស័ក ក្នុងនោះសាលាបើកមុនគេមានខេត្តព្រះសីហនុ បន្ទាប់មកទៀតរាជធានីភ្នំពេញ កណ្តាល ប៉ៃលិន បន្ទាយមានជ័យ ពោធិ៍សាត់ បើកនៅថ្ងៃទី១៥ ខែកញ្ញា និងខេត្តកំពង់ចាម បើកនៅថ្ងៃទី២០ ខែកញ្ញា និងខេត្តស្វាយរៀងបើកនៅថ្ងៃទី២៧ ខែកញ្ញាខាងមុខ៕

អត្ថបទ៖ សំអឿន

Related Topics:ក្រសួងអប់រំ យុវជន និងកីឡា