ប្រទេសមានប្រព័ន្ធសុខាភិបាលទន់ខ្សោយ រកឃើញករណី កូវីដជាលើកដំបូង

នៅទីបំផុត ប្រទេស តុងហ្គា បានកត់ត្រាករណីជំងឺកូវីដ-១៩ ជាលើកដំបូង បន្ទាប់ពីអ្នកដំណើរតាមយន្តហោះមកពីប្រទេសនូវែលសេឡង់ បានធ្វើតេស្តវិជ្ជមាននៅពេលមកដល់។

កោះមហាសមុទ្រប៉ាស៊ីហ្វិកមួយនេះ ស្ថិតក្នុងចំណោមប្រទេសមួយចំនួនដែលបានរួចផុតពីផលប៉ះពាល់នៃជំងឺរាតត្បាត ដោយសារតែការបិទព្រំដែនរបស់ខ្លួនចំពោះអ្នកដំណើរស្ទើរតែទាំងអស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ មានការភ័យខ្លាចថា ប្រសិនបើមេរោគនេះវាយលុក តុងហ្គា នោះប្រព័ន្ធសុខាភិបាលដ៏ទន់ខ្សោយរបស់ប្រទេសនេះ នឹងមិនអាចទប់ទល់បានទេ។

ប្រទេសហ្វីជី ដែលជាអ្នកជិតខាងរបស់តុងហ្គា បានខិតខំ ដើម្បីចៀសវាងការផ្ទុះឡើងនៃជំងឺកូវីដ-១៩ រហូតដល់ខែមេសាឆ្នាំនេះ។

វីរុសបំប្លែងខ្លួន Delta បានវាយប្រហារខ្សែសង្វាក់កោះនេះ ដោយឆ្លងទៅមនុស្សជាង ៥០,០០០ នាក់ និងបានសម្លាប់មនុស្សជិត ៧០០នាក់។

ឥឡូវមានការភ័យខ្លាចថា រឿងដូចគ្នានេះ អាចកើតឡើងចំពោះប្រទេសតុងហ្គាដែរ ខណៈក្រុមមន្ត្រីកំពុងសម្រេចថាតើត្រូវចាត់វិធានការបែបណា ដើម្បីបញ្ឈប់ការរីករាលដាលដែលអាចកើតមាន។

នាយករដ្ឋមន្រ្តីតុងហ្គាលោក Pohiva Tu’i’onetoa បានបង្ហើបឲ្យដឹងថា អ្នកមានផ្ទុកកូវីដគឺស្ថិតក្នុងចំណោមអ្នកដំណើរចំនួន ២១៥នាក់ដែលបានមកដល់តាមជើងហោះហើរពីទីក្រុង Christchurch នៃប្រទេសនូវែលសេឡង់កាលពីថ្ងៃពុធ។

អ្នក​ធ្វើ​ដំណើរ​ត្រូវ​បាន​ដាក់ឲ្យធ្វើចត្តាឡីស័ក​នៅ​សណ្ឋាគារមួយ ហើយមកទល់ពេលនេះមិនទាន់មានព័ត៌មានលម្អិតផ្សេងទៀតអំពីអ្នកឆ្លងនៅឡើយទេ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អ្នកវិទ្យាសាស្រ្តរកឃើញវីរុសកូវីដបំប្លែងខ្លួន គ្រោះថ្នាក់ មិនខ្លាចវ៉ាក់សាំង