ព័ត៌មានជាតិ

អភិបាលខណ្ឌច្បារអំពៅដឹកនាំកម្លាំងបោសសំអាតផ្លូវបន្ទាប់ពីទឹកជំនន់ស្រកទៅវិញ

បានផុស

៥ years មុន

នៅ

ថ្ងៃពុធ ៣ វិច្ឆិកា ២០២១

ដោយ

លោក ចេង មុនីរ៉ា អភិបាលខណ្ឌច្បារអំពៅ នារសៀលថ្ងៃទី៣ ខែវិច្ឆិកានេះ បានដឹកនាំកម្លាំងនៃគណៈបញ្ជាការឯកភាពខណ្ឌច្បារអំពៅ ចុះបោសសំអាតផ្លូវដែលទើបនឹងស្រកពីជំនន់ទឹកភ្លៀងនាពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គុយ គឹមហ៊ាង ប្រធានការិយាល័យសាធារណៈការសាលាខណ្ឌច្បារអំពៅ បានឲ្យដឹងថា មូលហេតុដែលលោក ចេង មុនីរ៉ា អភិបាលខណ្ឌច្បារអំពៅដឹកនាំកម្លាំងចម្រុះរួមមានកម្លាំងនគរបាល អាវុធហត្ថនិងប្រជាការពារទាំងអស់ចុះបោសសំអាតលើកំណាត់ផ្លូវចាក់ក្រាលបេតុងស្ថិតក្នុងភូមិទួលតាចាន់ សង្កាត់ព្រែកឯងខណ្ឌច្បារអំពៅរាជធានីភ្នំពេញ បន្ទាប់ពីជំនន់ទឹកភ្លៀងបានស្រកទៅវិញនាពេលថ្មីៗនេះ។

លោកប្រធានការិយាល័យបានបញ្ជាក់ថា បន្ទាប់ពីទឹកស្រកទៅគឺស្លែបានដុះនិងសំរាមពាសពេញលើផ្លូវហើយម្យ៉ាងទៀតផ្លូវចាក់បេតុងនេះអាចធ្វើឲ្យសិស្សសាលា ដែលភាគច្រើនជាក្មេងតូចៗងាយនឹងរអិលដួលបង្កឲ្យគ្រោះថ្នាក់ថែមទៀតផង។

ចំពោះសកម្មភាពបោសសំអាតផ្លូវដែលដឹកនាំដោយលោកអភិបាលខណ្ឌច្បារអំពៅ ដែលលោកតែងយកចិត្តទុកដាក់ទៅលើស្ថានភាពរស់នៅរបស់ប្រជាពលរដ្ឋការពារកុំឲ្យមានជំងឺដង្កាត់ពិសេសក្នុងការធ្វើដំណើររបស់ប្រជាពលរដ្ឋទៀតផង៕

អត្ថបទ៖ នរា